‘इंडिगो’कडून प्रवाशांना धक्का; आता पसंतीच्या सीट्ससाठी द्यावे लागणार जास्त पैसे

विमान कंपनी इंडिगोने नवीन वर्षाच्या सुरुवातीलाच प्रवाशांना मोठा झटका दिला आहे. इंडिगोचे आसन निवडणे महाग झाले आहे. कंपनीने काही निवडक आसनांच्या किमती वाढवल्या आहेत.

मुंबई : विमान कंपनी इंडिगोने नवीन वर्षाच्या सुरुवातीलाच प्रवाशांना मोठा झटका दिला आहे. इंडिगोचे आसन निवडणे महाग झाले आहे. कंपनीने काही निवडक आसनांच्या किमती वाढवल्या आहेत. यानुसार 222 आसनी A321 विमानासाठी समोरच्या आसनावरील खिडकी किंवा बाजूचे आसन निवडण्यासाठी 2 हजार रुपये शुल्क आकारण्यात येणार आहे.

याशिवाय त्याच रांगेतील मधल्या आसनासाठी प्रवाशाला 1,500 रुपये मोजावे लागतील. याआधी इंडिगो या आसनांसाठी 150 ते 1500 रुपये जादा आकारत होती. इंडिगोने यापूर्वी 4 जानेवारी रोजी भाडे कमी करण्याची घोषणा केली होती. विमान इंधन दरात कपात झाल्यानंतर हा निर्णय घेण्यात आला होता. मात्र, आता कंपनीने पुन्हा एकदा काही आसनांच्या भाड्यात वाढ जाहीर केली आहे.

आता प्रवाशांना ठराविक आसनावर बसण्यासाठी पूर्वीपेक्षा जास्त पैसे खर्च करावे लागणार आहेत. इंडिगोने म्हटले आहे की, प्रवाशांना समोरच्या लेग्रूमसह एक्सएल आसनासाठी अधिक भाडे द्यावे लागेल. कंपनीच्या ए320 किंवा ए320 निओ विमानात 180 किंवा 186 आसनापैकी 18 अशी आसने आहेत ज्या समोरच्या एक्सएल सीट्स आहेत.

याआधी दिला होता दिलासा

इंडिगोने हवाई इंधनाच्या किमती कमी केल्यानंतर 4 जानेवारी रोजी इंधन शुल्क लागू करण्याचा निर्णय मागे घेतला होता. कच्च्या तेलाच्या दरात सातत्याने होत असलेल्या कपातीनंतर सरकारी तेल कंपन्यांनी हवाई इंधनाच्या किमती कमी केल्या असून त्याचा फायदा आता इंडिगो प्रवाशांना देत आहे.