Mahakumbh 2025: महाकुंभ 2025 मध्ये जगाला दिसणार चंद्रशेखर आझाद यांचे ‘बमतुल बुखारा’, कुंभमेळा ठरणार अनोखं आकर्षण

13 जानेवारी 2025 रोजी कुंभ मेळ्याला सुरुवात होणार असून 26 फेब्रुवारी 2025 रोजी सांगता होणार आहे. प्रयागराज, हरिद्वार, उज्जैन व नाशिकमध्ये कुंभमेळा आयोजित केला जातो. महाकुंभाची पौराणिक कथा समुद्रमंथनाशी संबंधित आहे.

Prayagraj Mahakumbh 2025: हिंदू धर्मात कुंभमेळा विशेष मानला जातो. लाखो भाविक कुंभात स्नान करण्यासाठी जमतात यावरून कुंभाची भव्यता आणि महत्त्व कळू शकते. पुढील महाकुंभ प्रयागराज, अलाहाबाद येथे होणार आहे. 13 जानेवारी 2025 रोजी पौष पौर्णिमा स्नानाने महाकुंभ सुरू होतो. 26 फेब्रुवारी 2025 रोजी महाशिवरात्रीच्या दिवशी शेवटच्या स्नानाने कुंभ महोत्सवाची सांगता होणार आहे.

हेदेखील वाचा- मेक्सिकोच्या जंगलात सापडले प्राचीन माया संस्कृतीतील लुप्त शहर; उलगडणार इतिहासातील अनेक रहस्ये

महाकुंभ 2025 मध्ये संगमच्या वाळूवर एक अनोखे आकर्षण पाहायला मिळणार आहे. देशाचे महान क्रांतिकारक चंद्रशेखर आझाद यांचे ऐतिहासिक पिस्तूल बमतुल बुखाराची प्रतिकृती महाकुंभावेळी प्रदर्शित करण्यात येणार आहे. हे पिस्तूल आझाद यांच्या इंग्रजांविरुद्धच्या लढ्याचे प्रतीक आहे. याशिवाय सांस्कृतिक आणि पर्यटन मंत्रालयाच्या पुढाकाराने महाकुंभात इतरही अनेक कार्यक्रम आणि प्रदर्शने आयोजित केली जाणार आहेत. महाकुंभ पूर्वीच्या कार्यक्रमांपेक्षा मोठा आणि भव्य करण्याची तयारी सुरू आहे. (फोटो सौजन्य – pinterest)

यामध्ये सांस्कृतिक आणि पर्यटन मंत्रालयाच्या पुढाकाराने चंद्रशेखर आझाद यांच्या अमर बलिदानाच्या ऐतिहासिक पिस्तुलाची प्रतिकृतीही दाखवण्यात येणार आहे. चंद्रशेखर आझाद यांनी देशाला ब्रिटिश राजवटीपासून स्वातंत्र्य मिळवून देण्यात मोठे योगदान दिले आहे, त्यांचे पिस्तूल महाकुंभात आकर्षणाचे केंद्र ठरणार आहे.

संग्रहालयाचे उपक्युरेटर डॉ. राजेश मिश्रा म्हणाले की, महान क्रांतिकारकांच्या जीवनाशी संबंधित प्रदर्शन भरवण्याची तयारी सुरू आहे. राज्य सरकार महाकुंभमेळा परिसरात संग्रहालयासाठी जागा उपलब्ध करून देत आहे. हेरिटेज वस्तूंचे प्रदर्शन, आझाद यांच्या पिस्तुलाची प्रतिकृतीही प्रदर्शित करण्यात येणार आहे. या महाकुंभमेळ्यात प्राचीन शस्त्रांच्या प्रतिकृती विशेष आकर्षणाचे केंद्र असतील.

हेदेखील वाचा- ग्रीसमध्ये सापडला प्राचीन रहस्यमयी सोन्याचा डेथ मास्क; जाणून घ्या हा ट्रोजन युद्धाचा पुरावा की आणखी काही?

चंद्रशेखर आझाद यांचे ‘बमतुल बुखारा’

ज्या पिस्तुलाने चंद्रशेखर आझाद यांनी सहा इंग्रजांचा पराभव केला होता. चंद्रशेखर आझाद यांच्या ‘बमतुल बुखारा’ या पिस्तुलमधून गोळीबार करताना धूर निघत नव्हता. त्यामुळे गोळ्या कुठून येतात हे इंग्रजांना कळत नव्हते. डॉ. राजेश मिश्रा यांनी सांगितले की हे कोल्ट कंपनीचे पॉइंट 32 बोअर हॅमरलेस सेमी ऑटोमॅटिक पिस्तूल आहे. यात एका वेळी आठ गोळ्यांचे मॅगजीन असते. अलाहाबाद म्युझियममध्ये हे हेरिटेज स्वरूप असून आता जगाला ते महाकुंभमेळ्यात पाहायला मिळणार आहे.

महाकुंभ 2025 साठी संगमच्या वाळूवर टेंट सिटी उभारण्यासाठी जमिनीचे वाटप 12 नोव्हेंबरपासून सुरू होणार आहे. परंपरेनुसार आधी आखाड्यांना जमीन दिली जाईल. यावेळी आखाड्यांना झुंसी बाजूला सेक्टर 18 आणि 19 मध्ये जमीन दिली जाणार आहे. पौष पौर्णिमेच्या मुहूर्तावर 13 जानेवारी 2025 रोजी महाकुंभ सुरू होणार आहे. दुसऱ्याच दिवशी 14 जानेवारीला मकर संक्रांतीचे शाही स्नान होणार आहे.

जमीन आणि सुविधांसाठी ऑनलाइन नोंदणी सुरू झाली आहे. जागा आणि सुविधांसाठी 12 नोव्हेंबरपर्यंत ऑनलाइन अर्ज करता येणार आहेत. या दिवसापासूनच जमिनीचे वाटप सुरू होणार आहे. सर्वप्रथम आखाड्यांना जमीन दिली जाईल. यानंतर आचार्य महामंडलेश्वर आणि महामंडलेश्वर, नंतर खाल्स आणि नंतर शंकराचार्यांना जमीन दिली जाईल. या सर्वानंतर दांडीबाडा, आचार्य बडा आणि खाक चौकात जमीन दिली जाणार आहे.

24 नोव्हेंबरपर्यंत सर्वांना जमिनीचे वाटप केले जाईल. त्यानंतर संस्थांना जमीन दिली जाईल. एडीएम महाकुंभ विवेक चतुर्वेदी यांनी सांगितले की, जमिनीचे वाटप 12 नोव्हेंबरपासून सुरू होणार असून ते 28 नोव्हेंबरपर्यंत चालणार आहे.