पंतप्रधान नरेंद्र मोदी आज देणार आसामला भेट; कोट्यवधी रुपयांच्या विकास प्रकल्पांचे उद्घाटन करणार

आसाममधील 18530 कोटी रुपयांपेक्षा जास्त किमतीच्या प्रमुख पायाभूत सुविधा आणि औद्योगिक विकास प्रकल्पांचे उद्घाटन आणि पायाभरणी पंतप्रधान मोदी करणार आहेत.

नवी दिल्ली : पंतप्रधान नरेंद्र मोदी यांनी मणिपूरचा दौरा केला. त्यानंतर आज आसामचा दौरा करणार आहेत. आसाममधील 18530 कोटी रुपयांपेक्षा जास्त किमतीच्या प्रमुख पायाभूत सुविधा आणि औद्योगिक विकास प्रकल्पांचे उद्घाटन आणि पायाभरणी करणार आहेत. यामध्ये दरंग वैद्यकीय महाविद्यालय आणि रुग्णालय, जीएनएम शाळा आणि बी.एससी. नर्सिंग कॉलेज यांचा समावेश आहे.

काही ठराविक कार्यक्रमानंतर पंतप्रधान मोदी हे नुमालीगड रिफायनरी लिमिटेड (एनआरएल) येथे आसाम बायोइथेनॉल प्लांटचे उद्घाटन करतील. यानंतर, मजबूत, सुरक्षित आणि स्वावलंबी भारताच्या वचनबद्धतेच्या अनुषंगाने, पंतप्रधान मोदी 15 सप्टेंबर रोजी कोलकाता येथे 16 व्या संयुक्त कमांडर्स कॉन्फरन्स-2025 चे उद्घाटन करतील आणि सशस्त्र दलांच्या कमांडर्सना संबोधित करतील. दर दोन वर्षांनी एकदा होणारी १६ वी संयुक्त कमांडर्स कॉन्फरन्स १५ ते १७ सप्टेंबर दरम्यान कोलकाता येथे आयोजित केली जात आहे.

एका महिन्यातील दुसऱ्यांदा बिहार दौऱ्यावर

पंतप्रधान मोदी १५ सप्टेंबर रोजी एका महिन्याच्या आत दुसऱ्यांदा बिहारला भेट देणार आहेत, जिथे ते राष्ट्रीय मखाना मंडळाचे उद्घाटन करतील. हे मंडळ नवीन तंत्रज्ञानाचे उत्पादन आणि विकासाला प्रोत्साहन देईल, कापणीनंतरचे व्यवस्थापन मजबूत करेल, मूल्यवर्धन आणि प्रक्रियांना प्रोत्साहन देईल आणि मखानाचे बाजार, निर्यात आणि ब्रँड विकास सुलभ करेल.

पूर्णियामध्ये विमानतळ टर्मिनलचे उद्घाटन

पंतप्रधान मोदी हे पूर्णियामध्ये विमानतळाच्या अंतरिम टर्मिनल इमारतीचे उद्घाटन करतील, ज्यामुळे या प्रदेशात प्रवासी हाताळणी क्षमता वाढेल. पूर्णियामध्ये सुमारे ३६००० कोटी रुपयांच्या अनेक विकास प्रकल्पांची पायाभरणी आणि उद्घाटन त्यांच्या हस्ते केले जाणार आहे.

बिहारमध्ये 25000 कोटी रुपयांची सर्वात मोठी  गुंतवणूक

ते भागलपूरमधील पीरपैंती येथे औष्णिक वीज प्रकल्पाची पायाभरणी करतील, जी बिहारमध्ये २५००० कोटी रुपयांची सर्वात मोठी खाजगी क्षेत्रातील गुंतवणूक असेल. या दरम्यान, पंतप्रधान २६८० कोटी रुपयांपेक्षा जास्त खर्चाच्या कोसी-मेची आंतरराज्यीय नदी जोडणी प्रकल्पाच्या पहिल्या टप्प्याची पायाभरणी देखील करतील.