सांगलीत पावसामुळे पाणीपातळीत होतीये वाढ; नदीकाठच्या गावांना पुन्हा सतर्कतेचा इशारा

कोयना धरण पाणलोट क्षेत्रात सुरु असलेल्या संततधार पावसामुळे कोयना धरणसाठ्यामध्ये मोठ्या प्रमाणावर पाण्याची आवक अपेक्षित आहे.

सांगली : कोयना धरण पाणलोट क्षेत्रात सुरु असलेल्या संततधार पावसामुळे कोयना धरणसाठ्यामध्ये मोठ्या प्रमाणावर पाण्याची आवक अपेक्षित आहे. कोयना धरणातील पाणी पातळी नियंत्रित करण्यासाठी रविवारी (दि. 12) दुपारी दोन वाजल्यापासून 10 हजार 264 क्युसेक विसर्ग चालू असून, त्यामध्ये वाढ करुन सायंकाळी पाच वाजल्यापासून 25 हजार क्युसेक इतका विसर्ग नदीपात्रात सोडण्यात येणार आहे. त्यामुळे नदीकाठच्या गावातील नागरिकांनी सतर्क राहावे, अफवांवर विश्वास ठेवू नये, असे आवाहन जिल्हाधिकारी डॉ. अभिजीत चौधरी यांनी केले आहे.

सद्यस्थितीत धरणातील पाणीसाठा व विसर्गाचा माहिती पुढीलप्रमाणे –

कोयना धरण आजचा पाणीसाठा 103.84 धरण भरलेली टक्केवारी 99.00, विसर्ग (क्युसेक) 25000, धोम धरण आजचा पाणीसाठा 12.14 धरण भरलेली टक्केवारी 90.00, विसर्ग (क्युसेक)622, कन्हेर धरण आजचा पाणीसाठा 9.49 धरण भरलेली टक्केवारी 94.00, विसर्ग (क्युसेक)24, उरमोडी धरण आजचा पाणीसाठा 8.62 धरण भरलेली टक्केवारी 86.00, विसर्ग (क्युसेक)350, तारळी धरण आजचा पाणीसाठा 5.59 धरण भरलेली टक्केवारी 96.00, विसर्ग (क्युसेक) 270 धरण क्षेत्रात असाच पाऊस सुरु राहिल्यास धरणामधील आवक वाढल्यास विसर्गामध्ये वाढ होण्याची शक्यता आहे.

तरी नदी काठच्या विशेषत: वाळावा, शिराळा, मिरज, पलूस तालुक्यातील तसेच महानगपालिका क्षेत्रातील नदी काठावरील व सखल भागातील नागरिकांनी सावधानता बाळगावी व नदी पात्रात कोणीही जाऊ नये. कोरोनाच्या पार्श्वभूमीवर अधिकची सतर्क बाळगण्याचे आवाहनही जिल्हाधिकारी डॉ. अभिजीत चौधरी यांनी केले आहे.