2 गोष्टी लक्षात ठेवा, या पद्धतीने घरातील कुंडीत लावा लवंग सुगंध दरवळेल संपूर्ण घरात

Gardening Tips: लवंग हा आपल्या स्वयंपाकघरातील महत्त्वाचा मसाला आहे. बाजारातूनच लवंग आपण आणतो पण तुम्हाला माहीत आहे का? घरातही तुम्ही लवंग कुंडीत उगवू शकता. फक्त त्यासाठी काही गोष्टींची काळजी घेणे महत्त्वाचे ठरेल.

लवंग हा प्रत्येकाकडे वापरण्यात येणारा मसाला आहे. दातदुखी असो वा पदार्थांमध्ये स्वाद आणायचा असो लवंगेचा वापर आपण करतोच.  प्रत्येक घरात मोठ्या प्रमाणात लवंग वापरली जाते. औषधी गुणधर्मांनी समृद्ध लवंग जेवणाची चवही वाढवते आणि अनेक आजारांपासून बचाव करते. 

जवळपास प्रत्येकजण बाजारातून लवंग विकत घेतो आणि वापरतो. पण तुम्हाला माहितेय का? आपण लवंग घरीदेखील लाऊ शकता. बागकामाची आवड असलेले लोक एका सोप्या पद्धतीचा अवलंब करून घरातच लवंगेचे झाड लाऊन त्याची लागवड करू शकतात. मात्र त्याआधी कशा पद्धतीने याची लागवड घरी करावी याचा आपण या लेखातून आढावा घेऊया. सांताक्रुझ कालिना येथे नर्सरी (रोपटे विकणारे) चालविणारे संजय पाटील यांनी काही सोप्या टिप्स आपल्यासह शेअर केल्या आहेत. (फोटो सौजन्य – iStock) 

[read_also content=”बाजारात मिळणारे नकली केशर कसे ओळखाल https://www.navarashtra.com/lifestyle/how-to-identify-fake-saffron-in-the-market-read-this-before-buying-nrsk-534771.html”]

लवंगेचे रोप कसे वाढवायचे?

आवश्यक साहित्य

• लवंगा : तुम्ही बाजारातून वाळलेल्या लवंगा विकत घेऊ शकता
• माती: लवंगांच्या रोपट्याला वालुकामय-चिकण मातीची आवश्यकता असते. तुम्ही यासाठी माती घरीदेखील बनवू शकता, ज्यामध्ये 2 भाग वाळू, 1 भाग माती आणि 1 भाग गांडूळ खताचा उपयोग करावा. यामुळे लवंग येण्यास मदत मिळते
• कुंडी: लवंगाच्या रोपासाठी 6-8 इंच खोल आणि रुंद कुंडी असणे गरजेचे आहे
• पाणी: लवंगाच्या झाडाला नियमित पाणी लागते.

लवंग वाढवण्याची पद्धत

• 4-5 लवंगा 24 तास पाण्यात भिजत ठेवा
• भांडे मातीच्या मिश्रणाने भरा आणि थोडेसे ओले करा 
• पाण्यात भिजवलेल्या लवंगा जमिनीत 1 इंच खोलीपर्यंत कुंडीत पेरा 
• माती थोडीशी ओलसर करा आणि भांडे ऊनाच्या ठिकाणी ठेवा 
• लवंग बियाणे अंकुरित होण्यासाठी 2-3 आठवडे लागू शकतात. यावेळी, माती ओलसर ठेवा. या 2-3 दिवसात अजिबात दुर्लक्ष करू नका 

झाड उंच होऊ लागल्यावर

• जेव्हा झाडे 3-4 इंच उंच होतात तेव्हा त्यांना छाटून पातळ करा आणि फक्त तुम्हाला जे रोप मजबूत आहे असं वाटतंय ते ठेवा 
• रोपाला नियमित पाणी द्या आणि ऊन येणाऱ्या ठिकाणीच ठेवा 
• 2-3 महिन्यांनी एकदा झाडाला सेंद्रिय खत द्या
• लवंगेचे झाड हे 3-4 वर्षांत फुलांनी बहरेल आणि मग लवंग त्यातून निर्माण होण्यास सुरूवात होईल

काय काळजी घ्यावी 

• लवंगाचे रोप हे कायम उन्हाच्या जागीच ठेवावे. तसंच माती ओलसर ठेवा मात्र ती कायम ओली ठेऊ नका.  याचा अर्थ पाण्याने ओथंबून वाहतेय अशी माती ठेऊ नका
• रोपाला नियमितपणे खत द्या. मृत पाने आणि फुले काढत रहा
• आवश्यकतेनुसार रोपाची छाटणी करा