तेच तेच बोरिंग पदार्थ खाणं सोडा, नवरात्रीच्या उपवासात घरी बनवा साबुदाण्याची लुसलुशीत पुरी

Sabudana Puri Recipe : कुरकुरीत आणि रुचकर साबुदाणा पुरी नवरात्रीच्या उपवासात खास चव देणारी आणि पोटभरीची डिश ठरते. यंदाच्या उपवासात साबुदाणा खिचडी सोडा आणि काही हटके ट्राय करा.

नवरात्रीच्या पवित्र दिवसांत अनेकजण उपवास करतात. उपवासाच्या दिवसात खाण्यासाठी पारंपरिक पदार्थ जसे की साबुदाणा खिचडी, साबुदाणा वडा, खीर यांचा समावेश असतो. पण कधी कधी रोजच्याच पदार्थांमध्ये थोडा बदल करून नवीन चविष्ट डिश खाल्ला तर उपवासातही वेगळा आनंद मिळतो. बऱ्याचदा तेच तेच पदार्थ खाऊन आपल्यालाही कंटाळा येतो. अशा वेळी साबुदाणा पुरी हा उत्तम पर्याय ठरतो. साबुदाणा खिचडी आपण बऱ्याचदा चाखली असेलच पण तुम्हाला माहिती आहे का? साबुदाण्यापासून चविष्ट आणि कुरकुरीत अशी पुरी देखील तयार केली जाऊ शकते.

सकाळच्या नाश्त्यासाठी १० मिनिटांमध्ये झटपट बनवा चमचमीत Potato Bites, चहा- कॉफीसोबत लागेल सुंदर

साबुदाण्याची ही चविष्ट पुरी चवीला फार अप्रतिम लागते आणि फार कमी वेळेत, कमी साहित्यापासून तयार होते. कुरकुरीत, चविष्ट आणि पोटभरीची ही पुरी उपवासात खाल्ल्यास समाधान मिळते. दही, शेंगदाण्याची चटणी किंवा साध्या लोणच्यासोबत ही पुरी अतिशय छान लागते. चला तर मग जाणून घेऊया साबुदाणा पुरी बनवण्यासाठी लागणारे आवश्यक साहित्य आणि कृती.

साहित्य

• साबुदाणा – १ कप (६-७ तास भिजवून निथळलेला)
• बटाटे – २ मध्यम (उकडून कुस्करलेले)
• शेंगदाणा पूड – ½ कप
• हिरव्या मिरच्या – २-३ (बारीक चिरलेल्या)
• मीठ – चवीनुसार (सेंधा मीठ वापरावे)
• साखर – १ टीस्पून (ऐच्छिक)
• जीरे – ½ टीस्पून
• कोथिंबीर – थोडीशी (बारीक चिरलेली)
• तेल – तळण्यासाठी

Upvas Recipe : नवरात्री स्पेशल; भगरीपासून सकाळच्या नाश्त्याला बनवा चविष्ट आणि कुरकुरीत डोसा

कृती :

• यासाठी सर्वप्रथम साबुदाणा ६-७ तास आधी स्वच्छ धुऊन पाण्यात भिजत ठेवा. नंतर जास्त पाणी काढून कोरडेसर करून घ्या.
• बटाटे उकडून घेतलेले असावेत. त्यांची साल काढून नीट कुस्करून घ्या.
• एका मोठ्या भांड्यात भिजवलेला साबुदाणा, कुस्करलेले बटाटे, शेंगदाणा पूड, हिरव्या मिरच्या, मीठ, जीरे,
• साखर आणि कोथिंबीर टाका. हे मिश्रण छान एकजीव मळून घ्या.
• तयार केलेल्या मिश्रणाचे लहान लहान गोळे करून त्याची पुरी लाटून घ्या. लाटताना ताटलीवर प्लास्टिक शीट किंवा केळीचे पान ठेवले तर पुरी सहज लाटता येते.
• यानंतर कढईत पुरेसे तेल गरम करा.
• गरम तेलात एकेक पुरी टाकून दोन्ही बाजूंनी सोनेरी आणि कुरकुरीत होईपर्यंत पुरीला छान तळून घ्या.
• गरमागरम साबुदाणा पुरी दही, शेंगदाण्याची चटणी किंवा लोणच्यासोबत खाण्यासाठी सर्व्ह केली जाऊ शकते.