Recipe : अस्सल महाराष्ट्रीयन चवीची झणझणीत ‘मिसळ’ बनवा घरीच, चव अशी की बोटं चाटत राहाल!

Misal Recipe : महाराष्ट्रीयन फूड लव्हर्ससाठी खास! आता तिखट, मसालेदार आणि पाहताच तोंडाला पाणी सुटणारी मिसळ अवघ्या १५ मिनिटांत बनवा घरीच. ही रेसिपी सकाळच्या नाश्त्यासाठी ठरेल परफेक्ट.

• मिसळ हा महाराष्ट्रीयन खाद्यसंस्कृतीतील एक लोकप्रिय नाश्त्याचा प्रकार आहे.
• झणझणीत चवीची ही मिसळ घरीदेखील तयार करता येते.
• चला मिसळची चवदार रेसिपी नोट करुन घेऊयात.

महाराष्ट्राच्या खाद्यसंस्कृतीत मिसळीला एक खास स्थान आहे. तिखट, मसालेदार आणि चविष्ट अशी मिसळ म्हणजे अनेकांच्या सकाळची आवडती न्याहारी. पुणेरी मिसळ, कोल्हापुरी मिसळ, नाशिकची मिसळ अशा वेगवेगळ्या प्रकारांनी हा पदार्थ राज्यभर प्रसिद्ध झाला आहे.

५० वर्षांखालील महिलांमध्ये ओव्हेरियन कॅन्सर ओळखणे का आहे कठीण? जाणून घ्या गंभीर आजाराचे निदान उशिरा होण्याची कारणे

मिसळ हा फक्त पदार्थ नाही, तर महाराष्ट्राच्या चवीचा एक अविभाज्य भाग आहे. अनेक ठिकाणी सकाळी गरमागरम मिसळ खाण्यासाठी लोकांच्या रांगा लागतात. तिखटपणा आणि मसाल्यांचा सुगंध यामुळे हा पदार्थ खवय्यांच्या मनावर राज्य करतो. घरच्या घरी बनवलेली मिसळ अधिक चविष्ट आणि आरोग्यदायी असते. झणझणीत रस्सा, त्यात कुरकुरीत चिवडा, कांदा, लिंबाची फोड आणि मऊसर पाव या सर्वांमुळे याची चव सर्वांच्याच मनात घर करते. चला महाराष्ट्रीयन चवीची ही मिसळ घरी कशी बनवायची याची पांरपारिक रेसिपी जाणून घेऊया.

साहित्य

उसळीसाठी

• २ कप मोड आलेली मटकी
• १ कांदा बारीक चिरलेला
• १ टोमॅटो चिरलेला
• १ चमचा आलं-लसूण पेस्ट
• २ चमचे लाल तिखट
• १/२ चमचा हळद
• १ चमचा गोडा मसाला
• मीठ चवीनुसार
• २ चमचे तेल
• पाणी आवश्यकतेनुसार

कट किंवा रस्स्यासाठी

• १ कांदा
• १/२ कप सुका खोबरा
• ४-५ लसूण पाकळ्या
• १ चमचा धणे
• १ चमचा जिरे
• २ चमचे लाल तिखट
• तेल आवश्यकतेनुसार

इतर साहित्य

• फरसाण
• बारीक चिरलेला कांदा
• कोथिंबीर
• लिंबाच्या फोडी
• पाव

रोगप्रतिकारशक्ती वाढवण्यासाठी उन्हाळ्यात नियमित प्या आलं आवळ्याचे सरबत, पचनक्रिया राहील सक्रिय

कृती

• सर्वप्रथ मोड आलेली मटकी स्वच्छ धुवून कुकरमध्ये थोडे मीठ आणि पाणी घालून २ ते ३ शिट्ट्या होईपर्यंत शिजवून घ्या.
• कढईत तेल गरम करून त्यात कांदा परता. कांदा सोनेरी झाल्यावर आलं-लसूण पेस्ट आणि टोमॅटो घालून मऊ होईपर्यंत शिजवा.
• आता त्यात हळद, लाल तिखट, गोडा मसाला आणि मीठ घालून मसाला छान परता. त्यात शिजवलेली मटकी घालून काही मिनिटे शिजवा.
• कट तयार करण्यासाठी दुसऱ्या पॅनमध्ये कांदा, खोबरे, लसूण, धणे आणि जिरे भाजून घ्या. हे मिश्रण थंड झाल्यावर बारीक वाटून घ्या.
• कढईत तेल गरम करून तयार वाटण परता. त्यात लाल तिखट आणि पाणी घालून उकळी आणा. हा रस्सा थोडा तिखट आणि पातळ असावा.
• सर्व्हिंग बाउलमध्ये आधी उसळ घाला. त्यावर फरसाण, कांदा आणि कोथिंबीर घाला. वरून गरम कट ओता.
• लिंबाचा रस पिळून गरम पावासोबत मिसळ सर्व्ह करा.
• गरमागरम महाराष्ट्रीयन मिसळ सकाळच्या नाश्त्यासाठी किंवा संध्याकाळच्या खाण्यासाठी उत्तम पर्याय ठरते.