Poha Jaggery Modak Recipe: बाप्पांसाठी झटपट मोदक! पोहे आणि गुळापासून १० मिनिटांत बनवा स्वादिष्ट मोदक

Poha Jaggery Modak Recipe: गणपती बाप्पांच्या नैवेद्यासाठी मोदक हा आवर्जून केला जातो. यंदा नेहमीच्या उकडीच्या, तळणीच्या किंवा खव्याच्या मोदकांपेक्षा पोहे आणि गुळापासून तयार होणारे मऊसूत मोदक नक्की ट्राय करता येतील. ही रेसिपी सोपी असून त्यासाठी जास्त साहित्याचीही गरज नाही.

• पोहे आणि गुळापासून बनवा मऊसूत आणि चविष्ट मोदक.
• रेसिपीसाठी लागणारं बहुतांश साहित्य घरातच उपलब्ध.
• गणपती बाप्पांच्या नैवेद्यासाठी झटपट आणि हटके पर्याय.

 

गणपती बाप्पा आले की घरात एक वेगळीच ऊर्जा निर्माण होते. नैवेद्य म्हटलं की मोदक हा येतोच. घरात सहसा तळणीचे, उकडीचे किंवा खव्याचे मोदक तयार केले जातात. आता मात्र आपण अजून एका प्रकारचे मोदक आम्ही आज तुम्हाला सांगणार आहोत.आता पोहे आणि गुळापासून तयार करा एकदम मऊसूत मोदक. करायला एकदम सोपो आणि खायला एकच नंबर लागतात. या मोदकाचं खास म्हणजे याला जास्त सामान लागत नाही. आणि चव तर अशी की बाप्पा पण खुश होतील. चला तर मग रेसिपी बघूया.लागणारं सामान काय?हे मोदक करायला बाजारात जायची गरजच नाही. सगळं सामान घरातच असतं. Poha Jaggery Modak Recipe:

साहित्य

• एक वाटी पोहे
• एक वाटी दूध
• पाऊण वाटी गूळ किसलेला
• एक चमचा साजूक तूप
• अर्धी वाटी सुकं खोबरं किंवा डेसिकेटेड नारळ
• थोडं मीठ
• वेलची आणि जायफळ पूड
• थोडे काजू बदामाचे तुकडे आणि मोदकाचा साचा

कृती

पोहे शिजवून घेणे

सगळ्यात आधी पोहे स्वच्छ करून घ्या. पोह्यात बारीक कचरा असतो तो काढून टाका. दोन तीन वेळा चाळून घ्या. हवं तर एकदा पाण्याने धुवून पण घेऊ शकता.आता एक कढई घ्या, त्यात एक वाटी दूध टाका आणि त्यातच पोहे टाका. गॅस एकदम बारीक ठेवा. मोठा गॅस केला तर दूध लगेच खाली लागेल. दोन तीन मिनिटं हलवत राहा. पोहे दुधात मऊ होतील आणि सगळं दूध पिऊन घेतील. थोडं झाकण ठेवलं तर अजून मऊ होतात. दूध पूर्ण आटलं की गॅस बंद करून टाका.

गूळ मिक्स करणे

पोहे थोडे गार झाले की ते मिक्सरच्या भांड्यात टाका. त्यात पाऊण वाटी किसलेला गूळ टाका. अख्खा गूळ टाकू नका, किसून टाका म्हणजे पटकन मिक्स होईल. गोड किती हवंय त्यानुसार गूळ कमी जास्त करू शकता.आता मिक्सरमध्ये फिरवून घ्या. एकदम मऊ आणि चिकट असं मिश्रण तयार होईल. यात साखर अजिबात टाकायची नाही. गुळामुळेच छान रंग आणि गोडवा येतो.

नारळ भाजून घेणे

आता परत कढई गॅसवर ठेवा. त्यात एक चमचा तूप टाका. तूप गरम झालं की त्यात अर्धी वाटी नारळ टाका. फक्त दोन मिनिटं परता. जास्त लाल करायचं नाही. तुमच्याकडे डेसिकेटेड नारळ नसेल तर साधं सुकं खोबरं किसून टाका, तरीही चालतं. ओला नारळ पण चालेल.नारळ थोडा परतला की त्यात आपलं पोहे आणि गुळाचं मिश्रण टाका. आता सगळं मंद गॅसवर चार पाच मिनिटं परता. सारखं हलवत राहा नाहीतर खाली लागेल. हळू हळू ते घट्ट होईल आणि कढई सोडायला लागेल.याच वेळी त्यात चिमूटभर मीठ टाका. गोडात थोडं मीठ टाकलं की चव अजून खुलते. मग वेलची पूड आणि थोडं जायफळ किसून टाका. गूळ आणि जायफळची जोडी एकदम भारी लागते. आवडत असतील तर काजू बदामाचे काप पण टाकू शकता.

मोदक कसे वळायचे?

मिश्रण थोडं गार झालं की हाताला थोडं तूप लावा. मोदकाच्या साच्याला पण आतून तूप लावा. मग थोडं थोडं मिश्रण साच्यात भरा आणि दाबा. साचा उघडला की मस्त आकाराचा मोदक बाहेर येईल. साचा नसेल तर हातानेच छोटे लाडू वळले तरी चालतात, बाप्पाला आकारापेक्षा भावना महत्त्वाच्या असतात. हे मोदक फ्रिजमध्ये 2 दिवस आरामात टिकतात. ऐनवेळी पाहुणे आले किंवा नैवेद्यासाठी काही गोड हवं असेल तर ही रेसिपी एकदम बेस्ट आहे. खवा, मावा काहीच न लागता, कमी वेळात आणि कमी खर्चात तयार होणारे हे गूळ-पोह्याचे मोदक एकदा नक्की करून बघा.