उन्हाळ्यात अवकाळी पावसात भिजण्याचा मोह आवरा; पडू शकतं महागात…

उन्हाळ्यात अचानक आलेल्या पावसात भिजल्यास सर्दी, ताप, फंगल इन्फेक्शन यांसारख्या आजारांचा धोका वाढतो. अशा वेळी योग्य काळजी घेणे आणि घरगुती उपाय करणे आरोग्यासाठी फायदेशीर ठरते.

उन्हाळ्याच्या कडाक्यात अचानक पडणारा पाऊस हवेत गारवा निर्माण करतो आणि अनेकांना आनंददायी वाटतो. अशा वेळी अनेकजण अंगावर पाऊस झेलत भिजण्याचा आनंद घेतात. पण आपल्या वडीलधाऱ्यांनी यासाठी नेहमीच सावध राहण्याचा सल्ला दिला आहे. कारण, उन्हाळ्यात पडणाऱ्या पावसात भिजल्यामुळे तब्येत बिघडण्याचा धोका खूप असतो. यामागे काही महत्त्वाची कारणं आहेत.

तुमचा DNA तर तुमच्या स्ट्रेसचे कारण नाही? हे आहेत Genetic Stress चे 3 संकेत; वेळीच व्हा सावध

प्रथम, उन्हाळ्यात शरीराचे तापमान आधीच उष्ण असते. जेव्हा अचानक थंड पावसाचे पाणी अंगावर पडते, तेव्हा शरीराच्या तापमानात झपाट्याने बदल होतो. त्यामुळे रोगप्रतिकारक शक्ती तात्पुरती कमकुवत होते आणि सर्दी, खोकला, ताप, अंगदुखी अशा समस्या होऊ शकतात. दुसरे कारण म्हणजे उन्हाळ्याच्या अवकाळी पावसात वातावरणातील धूळ, प्रदूषण आणि हानिकारक रसायनं खाली येतात, त्यामुळे ते पाणी त्वचेवर पडल्यास खाज, एलर्जी, त्वचासंक्रमण किंवा डोळ्यांत जळजळ यांसारखे त्रास उद्भवू शकतात.

तिसरे महत्त्वाचे कारण म्हणजे पावसात भिजल्यानंतर जर तुम्ही भिजलेल्या कपड्यांमध्येच अधिक वेळ राहिलात, तर तुमचं शरीर थंड होऊन सर्दी, ताप किंवा अंगदुखी होण्याची शक्यता वाढते. याशिवाय, अशा भिजलेल्या अवस्थेत जास्त वेळ राहिल्याने फंगल इन्फेक्शनचा धोका वाढतो, विशेषतः पायाच्या बोटांमध्ये, काखेत आणि इतर संवेदनशील भागांत. पावसामुळे निर्माण झालेल्या साचलेल्या पाण्यामुळे डास वाढतात, जे डेंग्यू, मलेरिया यांसारख्या आजारांना आमंत्रण देतात. त्यामुळे अशा पावसात भिजण्याचा मोह झाला तरीही काळजी घेणे आवश्यक आहे.

मुंबईतील चाळ आणि अजूनही जाणवतंय ‘ती’चं अस्तित्व विहिरीत; शरीर सोडलं पण आत्मा मात्र….

बचावासाठी काही महत्त्वाचे उपाय म्हणजे, पावसात भिजल्यावर त्वरित कोरडे कपडे घालावेत आणि अंग व्यवस्थित पुसून घ्यावं. केस ओले राहिल्यास सर्दी होण्याचा धोका वाढतो, त्यामुळे केस व्यवस्थित टॉवेलने वाळवावेत किंवा सॉफ्ट ड्रायर वापरावा. शरीराचे तापमान संतुलित ठेवण्यासाठी गरम पाणी प्यावे, किंवा गरमागरम सूप, हळद-दूध, किंवा लिंबू-हळदीचा काढा घ्यावा. अती थंडी वाटल्यास आले, तुळस, हळद, मिरे यांचा काढा उपयोगी ठरतो, कारण यामध्ये नैसर्गिक रोगप्रतिकारक घटक असतात जे शरीराला बळकटी देतात. भिजल्यानंतर लगेचच एसीच्या थंड हवेत जाणं टाळावं, कारण शरीर आधीच थंड झालेलं असतं आणि अशा वेळी पुन्हा थंडीचा सामना केल्यास ताप किंवा अंगदुखी होऊ शकते. तसेच, पायातील ओले मोजे किंवा बूट लवकरात लवकर बदलावेत, कारण त्यातून फंगल इन्फेक्शन होण्याचा धोका वाढतो. त्वचेवर कुठलीही अ‍ॅलर्जी, लालसरपणा, जळजळ किंवा खाज जाणवली, तर ती दुर्लक्ष न करता त्वरीत डॉक्टरांचा सल्ला घ्यावा. अशा प्रकारे थोडीशी खबरदारी घेतली, तर तुम्ही पावसाचा आनंद घेत असतानाच तुमचं आरोग्यही सुरक्षित राहील.