Ahilyanagar News: बिबटयांना पकडा म्हणजे आम्ही अंगणात खेळू शकू, देवठाणच्या विद्यार्थ्यांची भाबडी विनंती

ग्रामीण भागात मोठ्या प्रमाणात बिबट्याच्या हल्ल्यांचे प्रमाण वाढत आहे. अशातच अहिल्यानगरमधील देवठाणच्या विद्यार्थ्यांनी चक्क वनविभागाच्या अधिकाऱ्यांना एक भाबडी विनंती केली आहे.

• ग्रामीण भागात मोठ्या प्रमाणात बिबट्याच्या हल्ल्यांचे प्रमाण वाढताय
• बिबटयांना पकडा म्हणजे आम्ही अंगणात खेळू शकू
• देवठाणच्या विद्यार्थ्यांचे वनविभागाला साकडे

अहिल्यानगर जिल्ह्यातील अकोले परिसरात बिबट्यांची संख्या अचानक वाढल्याने विद्यार्थी मोठ्या प्रमाणात भयभीत झाले आहेत. “खूप बिबटे झालेत. ते लहान मुलांवर हल्ला करतात. आम्हाला खूप भीती वाटते. घरचे आम्हाला बाहेर खेळायला जाऊ देत नाहीत. तुम्ही सगळे बिबटे पकडून पिंजऱ्यात टाका, म्हणजे आम्ही अंगणात सुरक्षितपणे खेळू शकू आणि छोट्या मुलांचे जीव धोक्यात जाणार नाहीत,” अशा शब्दांत मुलांनी आपली भावना व्यक्त केली. जंगलातून मानवी वस्तीत आलेल्या बिबट्यांनी मुलांचे हक्काचे खेळण्याचे अंगण व्यापून टाकल्याचा अनुभव त्यांनी अधिकाऱ्यांसमोर मांडला. मुलांची ही परिस्थिती पाहून अधिकारीही चिंतित झाले.

देवठाण परिसरातील वाढत्या बिबट्या-उपद्रवाच्या पार्श्वभूमीवर जिल्हा परिषदेच्या देवठाण शाळेत वनविभागाच्या अधिकाऱ्यांनी विद्यार्थ्यांशी संवाद साधला. त्यांच्या शंकांचे निरसन करताना अधिकाऱ्यांनी सर्व प्रश्नांना सोप्या अशा भाषेत उत्तरे दिली.

जागांबाबत मित्रपक्षांशी चर्चा करा, सन्मानजनक जागा मिळाल्या नाहीत तर…; हसन मुश्रीफांचे कर्यकर्त्यांना आवाहन

भयग्रस्त विद्यार्थ्यांना अधिकाऱ्यांचे मोलाचे मार्गदर्शन

अधिकाऱ्यांनी विद्यार्थ्यांना आत्मविश्वास देत सांगितले की, योग्य सावधगिरी बाळगल्यास बिबट्यांचे हल्ले टाळता येऊ शकतात. अलीकडेच बिबट्याच्या हल्ल्यात एका बालकाचा मृत्यू झाल्याने परिसरात निर्माण झालेली भीती मुलांच्या वागण्यात स्पष्ट दिसत होती. या भीतीतून मुलांना बाहेर काढण्यासाठी आणि सुरक्षित वर्तनाबाबत मार्गदर्शन करण्यासाठी वनपाल देविदास जाधव, विठ्ठल पारधी, वनरक्षक अंकुश काकडे आणि एकनाथ पारेकर यांनी मुलांशी सविस्तर चर्चा केली.

BMC Election : महापालिका निवडणुका मार्चनंतर? मुंबई, ठाणे, पुण्यासह 28 मनपांच्या निवडणुका होणार?

मुलांना दिलेल्या महत्त्वाच्या सूचना

• शाळेतून घरी जाताना नेहमी गटाने व बोलत-बोलत चालावे.
• सायंकाळी किंवा अंधारात एकट्याने बाहेर पडू नये.
• कुत्रे-मांजरे यांच्या आसपास न खेळणे.
• वस्तीच्या मार्गानेच शाळेत येणे-जाणे.
• अंधारात बाहेर पडताना टॉर्च सोबत ठेवणे.
• घराजवळ गिन्नी गवत, ऊस, मका यांसारखी दाट पिके न लावणे.
• शौचालय नसल्यास बाहेर जाताना मोठ्यांना सोबत घेणे.
• अचानक बिबट्या समोर आला तर दोन्ही हात वर करून स्थिर उभे राहणे.

वनपाल पारधी यांनी स्पष्ट केले की, जंगलाची तोड, जंगलातील आग आणि बिबट्याला नैसर्गिक भक्ष्य न मिळणे या कारणांमुळे ते मानवी वस्तीत येतात. माणसांपासून दूर राहण्याचा त्यांचा स्वभाव असला तरी आपण निष्काळजीपणा केला तर धोका वाढतो. त्यामुळे सुरक्षा नियम पाळणे अत्यावश्यक आहे.