Akola News : मध्य रेल्वेच्या कर्मचाऱ्यांचा सन्मान! सुरक्षा सेवेत उत्कृष्ट कामगिरी

मध्य रेल्वेचे महाव्यवस्थापक विवेक कुमार गुप्ता यांनी रेल्वे सुरक्षेसाठी उत्कृष्ट कामगिरी करणाऱ्या ११ कर्मचाऱ्यांना महाव्यवस्थापक सुरक्षा पुरस्काराने गौरव केले.

• स्वर्ण जयंती एक्स्प्रेस थांबवून सुरक्षित मार्गाने वळवण्यात आली
• त्वरित कार्यवाही करत त्यांनी लटकणारा भाग सुरक्षितरीत्या वेगळा करून अपघाताचा धोका कमी केला
• कर्मचाऱ्यांनाही सुरक्षेतील उल्लेखनीय भूमिकेसाठी सन्मानित करण्यात आले

Akola News : मध्य रेल्वेचे महाव्यवस्थापक विवेक कुमार गुप्ता यांच्या हस्ते रेल्वे सुरक्षेसाठी उल्लेखनीय कार्य करणाऱ्या ११ कर्मचाऱ्यांचा महाव्यवस्थापक सुरक्षा पुरस्काराने गौरव करण्यात आला. या पुरस्कारात मुंबई विभागातील ३, पुणे विभागातील ४, नागपूर विभागातील २, सोलापूर विभागातील १ आणि भुसावळ विभागातील १ कर्मचाऱ्यांचा समावेश आहे. या कर्मचाऱ्यांनी कर्तव्य बजावताना दाखवलेली सतर्कता, संभाव्य अपघात टाळण्यासाठी केलेली योग्यवेळी माहिती देणे आणि रेल्वे वाहतूक सुरक्षित करण्यासाठी केलेले विशेष प्रयत्न याची मध्य रेल्वेने नोंद घेतली. प्रत्येक विजेत्याला प्रशस्तीपत्र, पदक आणि ₹3,500 इतके रोख बक्षीस प्रदान करण्यात आले.

सदाशिवराव पाटील यांच्या 50 वर्षांच्या सत्तेला सुहास बाबर सुरुंग लावणार? ‘या’ तारखेला होणार फैसला

चंद्रपूर येथील इलेक्ट्रिक सिग्नल मेंटेनर राजेश राऊत यांनी ८ नोव्हेंबर रोजी ब्लॉकचे काम करताना चंद्रपूर डाउन लूप लाइनवर रेल्वे रुळांना तडे गेलेले ओळखले. तात्काळ माहिती दिल्यामुळे स्वर्ण जयंती एक्स्प्रेस थांबवून सुरक्षित मार्गाने वळवण्यात आली. त्यांच्या जागरूकतेमुळे मोठी दुर्घटना टळली. भुसावळ विभागाचे मालवाहतूक लोकोपायलट एल. जे. चौधरी यांनी ५ नोव्हेंबर रोजी निंभोरा स्टेशनवर तपासणीदरम्यान तिसऱ्या वॅगनचे हँड असेंब्ली तुटून लटकत असल्याचे पाहिले. त्वरित कार्यवाही करत त्यांनी लटकणारा भाग सुरक्षितरीत्या वेगळा करून अपघाताचा धोका कमी केला.

आता सर्वांना निकालाची लागली उत्सुकता; मात्र करावी लागणार 17 दिवसांची प्रतिक्षा

नागपूर विभागातील बल्लारशाह मालवाहतूक रेल्वे व्यवस्थापक रवी वर्मा यांनी ३१ ऑक्टोबर रोजी ड्युटीवर असताना बुटीबोरी यार्डातून जाताना एका वॅगनमधून धूर येताना पाहिला. त्यांनी तातडीने लोको पायलटला आणि कॅरेज-वॅगन कंट्रोलला माहिती देत ट्रेन सुरक्षित थांबवून संभाव्य धोका टाळला. याशिवाय अमरेशकुमार सिंग, संदीप पाटील, मोहनसिंग डागर, डी. के. यादव, नरेंद्र कुंभार, चेतन भालवणकर, महेश उमेश, विक्रम मीना या कर्मचाऱ्यांनाही सुरक्षेतील उल्लेखनीय भूमिकेसाठी सन्मानित करण्यात आले. मध्य रेल्वेच्या या पुरस्कारामुळे सतर्कता, जबाबदारी आणि रेल्वे सुरक्षेसाठी दिलेल्या योगदानाचे महत्त्व पुन्हा अधोरेखित झाले आहे.