रमाई योजनेतील 113 घरकूल रद्द; 3 कोटींचा निधी शासनाकडे, मंजुरीनंतरही बांधकामाला सुरुवात नाही

मंजूर घरकुलाच्या बांधकामासाठी प्रत्येक लाभार्थ्याला दोन लाख रुपयांचा निधी देण्यात येतो. हा निधी चार टप्प्यांत वितरित केला जातो. मात्र, घरकुलाच्या पायाभरणीसाठी आवश्यक असलेला सुरुवातीचा खर्च लाभार्थ्यांनी स्वतः करणे अपेक्षित आहे.

अकोला : अनुसूचित जाती घटकातील आर्थिकदृष्ट्‌या दुर्बल कुटुंबांना हक्काचे घर मिळावे, यासाठी शासनाने सुरू केलेल्या रमाई घरकूल योजनेला अकोला महापालिका क्षेत्रात संमिश्र प्रतिसाद मिळाला आहे. मंजूर झालेल्या १ हजार २२५ घरकुलांपैकी ९२२ घरकुलांची कामे पूर्ण झाली असून, १९० घरकुलांची कामे सध्या सुरू आहेत. मात्र, मंजुरी मिळूनही ११३ लाभार्थ्यांनी घरकुलाच्या बांधकामाला सुरुवातच केली नसल्याने त्यांची घरकुले रद्द करण्यात आली आहेत.

या घरकुलांसाठी उपलब्ध असलेला ३ कोटी ६० लाख रुपयांचा निधी शासनाकडे जमा करण्याची वेळ महापालिकेवर आली आहे. पंतप्रधान आवास योजना सुरू होण्यापूर्वी अनुसूचित जाती घटकातील कमी उत्पन्न असलेल्या कुटुंबांना पक्के घर उपलब्ध करून देण्यासाठी शासनाने २००२ मध्ये रमाई घरकूल योजना सुरू केली. या योजनेंतर्गत अकोला महापालिका क्षेत्रातील १ हजार २२५ घरकुलांना मंजुरी देण्यात आली होती. योजनेचा लाभ घेण्यासाठी लाभार्थ्याकडे किमान ३२५ चौरस फूट जागा असणे तसेच तो दारिद्र्यरेषेखालील कुटुंबातील असणे आवश्यक होते.

योग्य जागृतीचा अभाव

रमाई घरकुल योजनेचे लाभार्थी हे अनुसूचित घटकातील असल्याने गरीब आणि अडाणी असल्याची शक्यता गृहीत धरून या योजनेबाबत आवश्यक जागृती करण्याची गरज असताना ती मनपाने केली नसल्याने अनेकांना त्याचे निकष पूर्ण करता आले नाहीत. त्यामुळे त्यांची घरे रद्द झाल्याचे दिसून आले, केवळ योजना जाहीर न करता त्याची माहिती न देण्याचा दोष मानपावर जात असल्याचे बोलले जात आहे.

९२२ घरकुलांचे काम पूर्ण

मंजूर घरकुलाच्या बांधकामासाठी प्रत्येक लाभार्थ्याला दोन लाख रुपयांचा निधी देण्यात येतो. हा निधी चार टप्प्यांत वितरित केला जातो. मात्र, घरकुलाच्या पायाभरणीसाठी आवश्यक असलेला सुरुवातीचा खर्च लाभार्थ्यांनी स्वतः करणे अपेक्षित आहे. आतापर्यंत ९२२ घरकुलांची कामे पूर्ण झाली असून, १९० घरकुलांचे बांधकाम सुरू आहे.

दरम्यान, मंजुरी मिळाल्यानंतरही ११३ लाभार्थ्यांनी घरकुलाचे बांधकाम सुरू केले नाही. महापालिकेने संबंधित लाभार्थ्यांना वारंवार पत्रे देऊन बांधकाम सुरू करण्याच्या सूचना केल्या. मात्र, त्यानंतरही कोणतीही कार्यवाही न झाल्याने अखेर या ११३ घरकुलांची मंजुरी रद्द करण्यात आली.

LPG Connection New Rule : कधीपासून मिळणार एलपजी सिलेंडरचे नवे कनेक्शन, सरकारने दिली अपडेट