एमआयडीसीसाठी शेती महामंडळाची जागा उपलब्ध करुन देण्याचा मंत्रिमंडळाचा निर्णय; उपमुख्यमंत्री पवारांच्या पाठपुराव्याला यश
बारामती : इंदापूर तालुक्यातील प्रस्तावित जंक्शन ‘एमआयडीसी’साठी महाराष्ट्र राज्य शेती महामंडळाच्या ताब्यातील १३१ हेक्टर ५० आर जमीन महाराष्ट्र औद्योगिक विकास महामंडळाला हस्तांतरण करण्याचा महत्वपूर्ण निर्णय आजच्या मंत्रिमंडळाच्या बैठकीत घेण्यात आला. उपमुख्यमंत्री अजित पवार यांच्या पुढाकाराने जंक्शन ‘एमआयडीसी’चा प्रश्न मार्गी लागला असून, इंदापूरकरांना रोजगाराची मोठी संधी उपलब्ध होणार आहे. या निर्णयाबद्दल इंदापूरचे आमदार दत्तात्रय भरणे यांच्यासह इंदापूर तालुक्यातील जनतेने उपुख्यमंत्री अजित पवार यांचे आभार मानले आहेत.
याबाबत अधिक माहिती अशी, इंदापूर तालुक्यातील तरुणांसाठी रोजगाराची संधी उपलब्ध करुन देण्यासाठी जंक्शन येथील एमआयडीसी प्रस्तावित करण्यात आली होती. या एमआयडीसीसाठी महाराष्ट्र राज्य शेती महामंडळाच्या ताब्यातील मौजे जंक्शन येथील 20 हेक्टर 38 आर., मौजे भरणेवाडी येथील 24 हेक्टर 24 आर., मौजे अंथुर्णे येथील 21 हेक्टर 18 आर., मौजे लासुर्णे येथील 65 हेक्टर 70 आर. अशी एकूण 131 हेक्टर 50 आर एवढे क्षेत्र महाराष्ट्र औद्योगिक विकास महामंडळाला हस्तांतरण करण्याचा रनिर्णय मंत्रिमंडळाच्या बैठकीत घेण्यात आला. या निर्णयामुळे अनेक उद्योग इंदापूर तालुक्यात येणा आहेत.
तसेच तालुक्यातील तरुणांना रोजगार उपलब्ध होणार आहे. इंदापूरसह बाजूच्या बारामती, फलटण तालुक्यांतील तरुणांना रोजगाराची संधी उपलब्ध करुन देण्यासाठी ही एमआयडीसी उपयुक्त ठरणार आहे. उपमुख्यमंत्री अजित पवार यांनी पुढाकार घेऊन इंदापूर तालुक्याचा हा प्रश्न मार्गी लावला. त्यामुळे इंदापूरचे आमदार दत्तात्रय भरणे यांच्यासह इंदापूरकरांनी उपुख्यमंत्री अजित पवार यांचे आभार मानले आहेत.
इंदापूर तालुक्यामध्ये जंक्शन या ठिकाणी प्रस्तावित एमआयडीसीसाठी शेती महामंडळाची १३१.५० हेक्टर जमीन हस्तांतरण करण्याचा महत्त्वपूर्ण निर्णय राज्य मंत्रिमंडळाच्या बैठकीत घेण्यात आल्याने राज्याचे मुख्यमंत्री एकनाथ शिंदे, उपमुख्यमंत्री अजितदादा पवार, उपमुख्यमंत्री देवेंद्र फडणवीस यांचे मनापासून आभार मानतो. विशेषत: उपमुख्यमंत्री अजित दादा पवार यांचे विशेष आभार. इंदापूर तालुक्याच्या वतीने मी मानतो. या ठिकाणी एमआयडीसीचा प्रश्न लवकरच मार्गी लागणार आहे. या ठिकाणी अनेक उद्योगांना वाव मिळणार असून नवीन उद्योजक तयार होतील. तसेच विविध उद्योगामुळे इंदापूर तालुक्यातील तरुण-तरुणींना मोठ्या प्रमाणावर रोजगाराची संधी उपलब्ध होणार आहे.
