कोयनेतून सिंचनासाठी विसर्ग सुरू; सांगली पाटबंधारे विभागाकडून मागणी वाढली

कोयना धरणातून सिंचनासाठी पाणी सोडण्यात आल्याने नदीकाठच्या शेतकऱ्यांना दिलासा मिळाला असून, परिसरातील गावांना सतर्कतेचा इशारा देण्यात आला आहे.

पाटण : सांगली पाटबंधारे विभागाकडून सिंचनाची मागणी वाढली आहे. शुक्रवारपासून कोयना धरणातून पूर्वेकडे कोयना नदीपात्रात प्रतिसेकंद ३ हजार ६०० क्युसेक पाणी सोडण्यात आल्याची माहिती कोयना धरण व्यवस्थापनाकडून देण्यात आली. यापूर्वी कोयना धरण पायथा वीज गृहातील २० मेगावॅट क्षमतेच्या दोन जनित्रांद्वारे ४० मेगावॅट वीजनिर्मिती करून प्रतिसेकंद २ हजार १०० क्युसेक पाणी पूर्वेकडे सिंचनासाठी सोडण्यात येत होते.

आता सांगली पाटबंधारे विभागाकडून सिंचनासाठीच्या पाण्याची मागणी वाढल्याने शुक्रवारी दुपारी २.१५ वाजता नदी विमोचकातून अतिरिक्त १ हजार ५०० व पायथा वीजगृहातून २१०० असे प्रतिसेकंद एकूण ३ हजार ६०० क्युसेक पाणी कोयना नदीपात्रात सोडण्यात आले आहे. धरणात ६२.२३ टक्के पाणीसाठा शिल्लक आहे. पाण्याची पातळी २१२४ फूट १० इंच (६४७.६४९ मीटर) असून, कोयना धरणात एकूण साठा ६५.५० टीएमसी (६२.२३ %) इतका आहे.

सध्या कोयना धरणाच्या पायथा वीजगृहातून २ हजार १०० क्यूसेक व नदी विमोचकातून १ हजार ५०० असा एकूण विसर्ग ३ हजार ६०० क्यूसेक सुरू आहे. जून २०२६ मध्ये एकूण पर्जन्यमान कोयना – ४८७९, नवजा – ६१२१, महाबळेश्वर – ५९७३ मिलिमीटर इतके आहे. कोयना धरणातून सिंचनासाठी पाणी सोडण्यात आल्याने नदीकाठच्या शेतकऱ्यांना दिलासा मिळाला असून, परिसरातील गावांना सतर्कतेचा इशारा देण्यात आला आहे.

वीज निर्मितीसाठी पाणी ठेवले जाते राखीव 

१ जून ते ३१ मे हे कोयना धरणातील पाणीसाठ्याचे तांत्रिक वर्ष आहे. कृष्णा पाणी वाटप लवादानुसार ६७.५ टीएमसी पाणी वीज निर्मितीसाठी राखीव ठेवले जाते. तर उर्वरित पाणी सिंचनासाठी वापरले जाते. यावर्षी पाणलोट क्षेत्रात अपेक्षित पाऊस झाल्याने धरण पूर्ण क्षमतेने भरले होते. पर्जन्यकाळात धरणात तब्बल १८३.५ टीएमसी पाण्याची आवक झाली.

हेदेखील वाचा : महाराष्ट्राची भाग्यलक्ष्मी! कोयना धरणाच्या १,२ टप्प्यांमधून ‘या’ दिवसापासून होणार वीजनिर्मिती