सौजन्य - सोशल मिडीया
पुणे : पुणेकरांसाठी आनंदाची बातमी आहे. आजपासून प्रवाशांसाठी जिल्हा न्यायालय ते स्वारगेट हा मेट्रो मार्ग सुरू होणार आहे. पंतप्रधान नरेंद्र मोदी यांच्या हस्ते ऑनलाईन पद्धतीने या मार्गाचे लोकार्पण झाले असून संध्याकाळी 4 वाजता हा मार्ग प्रवाशांसाठी खुला करण्यात येणार आहे. जिल्हा न्यायालय ते स्वारगेट हा पुण्यातील पहिला भूमिगत मेट्रो मार्ग आहे. या मार्गावर जिल्हा न्यायालय, कसबा पेठ, मंडई, स्वारगेट असे 4 मेट्रो स्थानके आहेत.
या कार्यक्रमासाठी राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार हे पुण्यात उपस्थित आहेत, या मेट्रोमधून आता मुख्यमंत्री, उपमुख्यमंत्री आणि उपस्थित नेते महिला आणि लहान मुले पहिल्यांदा प्रवास करणार आहेत, त्यांनतर आज दुपारी ४ वाजल्यानंतर हा मार्ग सर्वसामान्य प्रवाशांसाठी खुला करण्यात येणार आहे.
या मार्गावरचा तिकीट दर किती?
जिल्हा न्यायालय ते कसबा पेठ: 10 रुपये
जिल्हा न्यायालय ते मंडई: 15 रुपये
जिल्हा न्यायालय ते स्वारगेट: 15 रुपये
स्वारगेट ते मंडई: 10 रुपये
स्वारगेट ते कसबा पेठ: 15 रुपये
स्वारगेट ते जिल्हा न्यायालय: 15 रुपये
मागचा दौरा पावसामुळे झाला होता रद्द
26 सप्टेंबर रोजी निश्चित झालेला पंतप्रधान नरेंद्र मोदींचा पुणे दौरा पावसामुळे रद्द झाला होता. आज पंतप्रधान मोदी ऑनलाईन उपस्थितीत पाहून प्रतीक्षेत असलेल्या जिल्हा न्यायालय मेट्रो स्थानक ते स्वारगेट मेट्रो स्थानक या मार्गाचे लोकार्पण केला आहे. या कार्यक्रमासाठी स्वतः राज्याचे मुख्यमंत्री एकनाथ शिंदे यांच्यासह दोन्ही उपमुख्यमंत्री देवेंद्र फडणवीस आणि अजित पवार उपस्थितीत आहेत.
