दापोली शहरात गॅस सिलेंडरचा स्फोट; मोठा अनर्थ होता-होता टळला, पती पत्नीने गमावली ऐकण्याची क्षमता

दापोलीच्या रूपनगर येथे गॅस सिलेंडरच्या स्फोटात पती-पत्नी गंभीर जखमी झाले असून, त्यांना पुढील उपचारासाठी मुंबईला हलवण्यात आले आहे. या दुर्घटनेत घराचे मोठे नुकसान झाले, परंतु मुलांच्या शाळेत असल्यामुळे मोठा अनर्थ टळला.

दापोली शहरातील रूपनगर येथे गॅस सिलेंडरचा स्फोट होऊन पती-पत्नी गंभीर भाजल्याची दुर्दैवी घटना घडली आहे. या स्फोटामुळे घराचे मोठ्या प्रमाणात नुकसान झाले असून स्थानिकांमध्ये भीतीचे वातावरण पसरले आहे. शुक्रवारी (दि. 3) दुपारी 2:30 च्या सुमारास ही घटना घडली. या घटनेची नोंद दापोली पोलीस ठाण्यात करण्यात आली आहे.

Devendra Fadnavis News: देवेंद्र फडणवीसांचा मोठा निर्णय; 963 शेतकऱ्यांना त्यांच्या जमिनी परत मिळणार

अविनाश श्रीकांत शिर्के हे दापोली शहरातील एचपी गॅस वितरण कंपनीत नोकरीला आहेत. त्यांचे वय ३५ वर्षे आहे. ते काही वर्षांपासून ते दापोली परिसरात घराघरांमध्ये गॅस सिलेंडर पोहोचविण्याचे काम करतात. शुक्रवारी दुपारी दोनच्या सुमारास ते घरी आले होते. त्या वेळी त्यांच्या पत्नी अश्विनी अविनाश शिर्के यांनी गॅस लीक झाल्याचा वास येत असल्याचे त्यांना सांगितले. अविनाश यांनी तातडीने गॅस लीक होत असल्याचे ठिकाण शोधण्याचा प्रयत्न केला. त्या संबंधित देखरेख केली. याचवेळी घरातील लाईट आणि टीव्ही चालू होते. काही समजण्याच्या आतच गॅसने पेट घेतला आणि घरात मोठा स्फोट झाला. या स्फोटामुळे दोघे पती-पत्नी गंभीर जखमी झाले.

स्थानिकांची तातडीची मदत आणि प्राथमिक उपचार

घटनेच्या काही वेळातच स्थानिक समाजसेविका संपदा पारकर आणि काही शेजाऱ्यांनी जखमींना उपजिल्हा रुग्णालय, दापोली येथे दाखल केले. डॉक्टरांनी प्राथमिक तपासणीनंतर सांगितले की, स्फोटामुळे दोघांनाही गंभीर भाजल्यामुळे ऐकू येणे बंद झाले आहे. त्यामुळे परिस्थिती पाहता त्यांना तातडीने पुढील उपचारासाठी मुंबई येथे हलवण्यात आले. या स्फोटामुळे घराचे मोठ्या प्रमाणात नुकसान झाले आहे. घरातील एक भिंत कोसळली असून सोफा, टीव्ही आणि इतर महत्त्वाच्या वस्तू जळून खाक झाल्या आहेत. यामुळे आर्थिकदृष्ट्या मोठा तोटा झाला आहे. विशेष म्हणजे, अविनाश शिर्के यांची दोन्ही मुले त्या वेळी शाळेत गेल्यामुळे मोठा अनर्थ टळला आहे. घरात मुले असती, तर परिस्थिती अधिक गंभीर होण्याची शक्यता होती.

आंबा खवय्यांसाठी महत्त्वाची बातमी, अस्सल हापूस ओळखण्यासाठी सरकारचा महत्त्वपूर्ण निर्णय

दापोली पोलीस ठाण्याचे कर्मचारी या प्रकरणाचा सखोल तपास करत आहेत. गॅस सिलेंडर लीक होण्याचे नेमके कारण शोधण्यासाठी आणि कोणतीही चूक घडली असल्यास ती निश्चित करण्यासाठी संबंधित अधिकाऱ्यांची मदत घेतली जात आहे. ही घटना स्थानिकांसाठी एक धडा आहे की गॅस सिलेंडर वापरताना योग्य ती काळजी घेणे किती महत्त्वाचे आहे. दापोलीतील ही दुर्घटना सर्वांसाठी वेदनादायक आहे, परंतु सुदैवाने मोठा अनर्थ टळल्याने स्थानिकांनी थोडासा दिलासा व्यक्त केला आहे.