हिंगोलीत अघोरी कृत्य; कांस्य धातूच्या तांब्यांची केली पूजा, हळद-कुंकू अन्…

मध्यरात्री वसमत तालुक्यातील महमंदपुरवाडी रस्त्याच्या मधोमध नक्षीकाम केलेला जुना कांस्य धातूचा तांब्या तसेच पूजेचे साहित्य ठेवण्यात आले होते. त्या तांब्याला हळद-कुंकू लावलेले असल्याचेही दिसून आले.

हिंगोली : नाशिकचा भोंदूबाबा अशोक खरातचे प्रकरण समोर आल्यानंतर राज्यात एकच खळबळ उडाली आहे. त्यातच हिंगोलीत एक विचित्र प्रकार समोर आला आहे. रस्त्याच्या मधोमध अज्ञात व्यक्तींनी नक्षीकाम केलेला जुना कांस्य धातूचा तांब्या, त्याला हळद-कुंकू लावून पूजेचे साहित्य २९ मार्चच्या मध्यरात्री आढळून आले. हा नेमका काय प्रकार आहे? कोणत्या उद्देशाने केला आहे? याबाबत वसमत तालुक्यातील महमंदपुरवाडी परिसरात तर्कवितर्क लढवले जात असून, भीतीचे वातावरण पसरले आहे.

याप्रकरणी गंभीर दखल घेत पोलिसांनी सदर साहित्य जप्त करून काही लोकांची चौकशी सुरू केली आहे. याबाबत मिळालेल्या माहितीनुसार, २९ मार्चच्या मध्यरात्री वसमत तालुक्यातील महमंदपुरवाडी रस्त्याच्या मधोमध नक्षीकाम केलेला जुना कांस्य धातूचा तांब्या तसेच पूजेचे साहित्य ठेवण्यात आले होते. त्या तांब्याला हळद-कुंकू लावलेले असल्याचेही दिसून आले. सोमवारी (दि.३०) सकाळी येणाऱ्या-जाणाऱ्या नागरिकांच्या हा प्रकार लक्षात आल्यानंतर घटनेची माहिती कुरुंदा पोलिस ठाण्याचे सहाय्यक पोलिस निरीक्षक रामदास निरदोडे यांना देण्यात आली. त्यानंतर निरदोडे यांनी सहकाऱ्यांसह घटनास्थळी भेट देऊन घटनेचा पंचनामा करून संबंधित तांब्या व पूजेचे साहित्य ताब्यात घेतले आहे.

हेदेखील वाचा : Kolhapur Crime: 20 गुंठे जमिनीच्या वादातून भावाचा संताप अनावर; वडील आणि भावाची कुऱ्हाडीने निर्घृण हत्या

दरम्यान, हा प्रकार नेमका कोणी आणि कोणत्या उद्देशाने केला याचा शोध पोलिस घेत असून, परिसरातील काही व्यक्तींची चौकशी केली आहे. भररस्त्यात अशा प्रकारे साहित्य ठेवून भीतीचे वातावरण निर्माण करण्याचा हा प्रयत्न तर नाही ना, याचाही तपास केला जात आहे.

अफवांवर विश्वास ठेवू नका : निरदोडे

नागरिकांना अफवांवर विश्वास ठेवू नये. याप्रकारणी पोलिसांकडून सखोल चौकशी सुरू असून, संबंधितांचा शोध घेतला जात आहे. त्यामुळे कुणी घाबरून जावू नये, असे आवाहन सहाय्यक पोलिस निरीक्षक रामदास निरदोडे यांनी केले आहे.

हेदेखील वाचा : Beed Crime: प्रेमप्रकरणातून तरुणाची आत्महत्या; मुलीच्या घरच्यांकडून मारहाण व बदनामीमुळे टोकाचा निर्णय, सुसाईड नोट सापडली