शुक्रवार, 23 ऑक्टोबर 2026
अमरावती घटनेने आरोग्य यंत्रणा अलर्ट! रुग्णालयातील उपारणांची तपासणी; अग्नीशमन यंत्र हाताळण्याचे प्रशिक्षण
अमरावती येथील स्त्री रुग्णालयातील नवजात शिशू अतिदक्षता विभागात व्हेंटिलेटरचा स्फोट होऊन तीन नवजात बालकांचा मृत्यू झाल्याच्या धक्कादायक घटनेच्या पार्श्वभूमीवर यवतमाळ जिल्ह्यातील आरोग्य यंत्रणा सतर्क झाली आहे. खबरदारीचा उपाय म्हणून वसंतराव नाईक शासकीय वैद्यकीय महाविद्यालय व रुग्णालयातील विविध विभागांमधील सुरक्षा यंत्रणा आणि विद्युत साहित्याची मंगळवारी (दि.२५) तपासणी करण्यात आली. तसेच आपत्कालीन परिस्थितीत अग्निशमन यंत्रणा प्रभावीपणे हाताळता यावी, यासाठी डॉक्टर, परिचारिका, सुरक्षा रक्षक आणि आरोग्य कर्मचाऱ्यांना प्रात्यक्षिकासह प्रशिक्षण देण्यात आले.(फोटो सौजन्य – AI)
अमरावती येथील स्त्री रुग्णालयातील नवजात शिशू अतिदक्षता विभागात व्हेंटिलेटरचा स्फोट झाल्याची घटना समोर आली होती. या घटनेत तीन नवजात बालकांना जीव गमवावा लागला. घटनेचे गांभीर्य लक्षात घेता रुग्णालयांमधील सुरक्षा व्यवस्थेचा आढावा घेण्याचे निर्देश आरोग्य विभागाच्या वरिष्ठ अधिकाऱ्यांकडून देण्यात आले आहेत. त्यानुसार यवतमाळ येथील शासकीय वैद्यकीय महाविद्यालय व रुग्णालय प्रशासनाने तातडीने सुरक्षाविषयक उपाययोजनांची पाहणी केली.
महाविद्यालयाचे अधिष्ठाता डॉ. प्रशांत उईके, अग्निशमन विभागाचे अधिकारी विनोद खरात तसेच संबंधित विभागांचे प्रमुख यांच्या उपस्थितीत नवजात शिशू अतिदक्षता विभागाची प्रत्यक्ष पाहणी करण्यात आली. या वेळी तेथील विद्युत साहित्य, व्हेंटिलेटर आणि अन्य उपकरणांची पाहणी करण्यात आली. तसेच एनआयसीयू, आयसीयू आणि जनरल वॉर्डमधील अग्निसुरक्षा यंत्रणा कार्यरत आहे की नाही, याचीही तपासणी करण्यात आली.
रुग्णालयात अचानक आग लागणे किंवा विद्युत उपकरणामध्ये बिघाड होण्यासारखी आपत्कालीन परिस्थिती निर्माण झाल्यास कोणती खबरदारी घ्यावी, याबाबत कर्मचाऱ्यांना मार्गदर्शन करण्यात आले. अग्निशमन विभागाच्या कर्मचाऱ्यांनी अग्निशामक यंत्राचा वापर कसा करावा, आग लागल्यास सुरुवातीच्या काही मिनिटांत कोणती पावले उचलावीत आणि रुग्णांना सुरक्षितपणे बाहेर कसे हलवावे, याचे प्रात्यक्षिक अग्नीशमन विभागाच्या कर्मचाऱ्यांनी करून दाखविले.
नर्सेस, सुरक्षा रक्षक, आरोग्य विभागातील कर्मचारी यांनी या प्रशिक्षणात सहभाग घेतला. रुग्णालयातील अतिदक्षता विभागांमध्ये अत्याधुनिक वैद्यकीय उपकरणांचा वापर मोठ्या प्रमाणावर होत असल्याने विद्युत सुरक्षेला विशेष महत्त्व असल्याचे यावेळी सांगण्यात आले. वैद्यकीय उपकरणांची नियमित तपासणी, विद्युत यंत्रणेची देखभाल आणि कर्मचाऱ्यांना आपत्कालीन परिस्थितीचे प्रशिक्षण देण्यात आले.
