Smart City White Paper: “लिपस्टिक-पावडर लावून शहर स्मार्ट होत नाही!” पिंपरीच्या महासभेत स्मार्ट सिटी प्रकल्पाचे वाभाडे

शिवसेनेचे गटनेते विश्वजीत बारणे यांनी आकडेवारीनिशी प्रशासनाचे वाभाडे काढले. शहरात बसवण्यात आलेल्या ८,७९० सीसीटीव्ही कॅमेऱ्यांपैकी निम्म्याहून अधिक बंद आहेत.

• स्मार्ट सिटी’ प्रकल्पावरून शुक्रवारी झालेल्या महासभेत सर्वपक्षीय नगरसेवकांकडून टिका
• रस्ते छोटे करून पदपथ मोठे करण्याच्या धोरणामुळे शहराचे नियोजन कोलमडली
• स्मार्ट सिटीचा जास्तीत जास्त निधी केवळ पिंपळे सौदागर सारख्या ठराविक भागातच खर्च

Smart City Mission : पिंपरी-चिंचवड शहरात राबविला जाणारा ‘स्मार्ट सिटी’ प्रकल्प हा खरोखरच नागरिकांच्या हिताचा आहे की केवळ प्रशासकीय अधिकारी आणि कंत्राटदारांच्या फायद्याचा? असा संतप्त सवाल उपस्थित करत शुक्रवारी महासभेत सर्वपक्षीय नगरसेवकांनी प्रशासनाचे वाभाडे काढले. शहरात पाण्याचा पत्ता नाही, कचऱ्याचे ढीग साचले आहेत आणि भटक्या कुत्र्यांनी हैदोस घातला असताना, केवळ प्रशस्त रस्ते छोटे करून पदपथ मोठे करण्याच्या ‘स्मार्ट’ उद्योगामुळे शहराचे नियोजन कोलमडले असल्याचा घणाघाती आरोप यावेळी करण्यात आला. १३०० कोटी रुपये खर्च करूनही शहराला एक रुपयाचे उत्पन्न मिळत नसल्याने, या संपूर्ण कारभाराची ‘श्वेतपत्रिका’ काढण्याची मागणी करत नगरसेवकांनी शुक्रवारी झालेल्या महासभेत प्रशासनाला अक्षरशः धारेवर धरले.

महापौर रवी लांडगे यांच्या अध्यक्षतेखाली झालेल्या महासभेत सर्वपक्षीय नगरसेवकांनी स्मार्ट सिटी प्रकल्पाच्या नावाखाली कोट्यवधी रुपयांचा खर्च होऊनही शहरात मूलभूत सुविधांचा अभाव असल्याचा आरोप करत लोकप्रतिनिधींनी प्रशासनावर केला.

Murlidhar Mohol News:  मुरलीधर मोहोळ यांच्यावर शस्त्रक्रिया; डॉक्टरांचा १ महिना विश्रांतीचा सल्ला

अधिकारी निरुत्तर, प्रश्नांची सरबत्ती

स्मार्ट सिटी कंपनीवर शिवसेनेचे निलेश बारणे यांची नियुक्ती करण्याचा विषय चर्चेला आला असता, नगरसेवकांनी स्मार्ट सिटीच्या कारभाराचे अक्षरशः वाभाडे काढले. सहमुख्य कार्यकारी अधिकारी किरणराज यादव नगरसेवकांच्या प्रश्नांच्या सरबत्तीने घायाळ झाले. ३००० हून अधिक सीसीटीव्ही बंद का? १५ हजारांचे मीटर १ लाखाला का घेतले? आणि कोट्यवधींच्या गुंतवणुकीतून पालिकेला उत्पन्न का मिळत नाही? या प्रश्नांना यादव यांना समाधानकारक उत्तरे देता आली नाहीत.

‘लिपस्टिक-पावडर’ लावून शहर स्मार्ट होत नाही!

“केवळ लिपस्टिक-पावडर लावून शहर स्मार्ट होत नाही, लोकांच्या गरजा पहा,” असा टोला योगेश बहल यांनी लगावला. तर, भाऊसाहेब भोईर यांनी “ही स्मार्ट सिटी आहे की डर्टी सिटी?” असा बोचरा प्रश्न विचारला. पिंपळे सौदागर सारख्या भागातच सर्व निधी खर्च करून उपनगरांना वाऱ्यावर सोडल्याची टीकाही यावेळी करण्यात आली. राहुल कलाटे, अनंत कोऱ्हाळे, डॉ. वैशाली घोडेकर आणि विश्वजीत बारणे यांनी स्मार्ट पार्किंग, कमांड सेंटर आणि रखडलेल्या सायकल प्रकल्पावरून प्रशासनावर जोरदार प्रहार केला.

पिंपरी-चिंचवड महापालिकेत सत्ताधारी अन् विरोधक आमनेसामने; ‘या’ मुद्द्यावरुन मोठा गदारोळ

कोट्यवधींचा चुराडा; सीसीटीव्ही बंदच

शिवसेनेचे गटनेते विश्वजीत बारणे यांनी आकडेवारीनिशी प्रशासनाचे वाभाडे काढले. शहरात बसवण्यात आलेल्या ८,७९० सीसीटीव्ही कॅमेऱ्यांपैकी निम्म्याहून अधिक बंद आहेत. ९८० कोटींची गुंतवणूक होऊनही स्मार्ट पार्किंग आणि कमांड कंट्रोल सेंटर पूर्ण क्षमतेने सुरू नाही. सायकल शेअरिंग प्रकल्प गुंडाळला गेल्याने आणि मेट्रो-पीएमपीच्या ‘वन कार्ड’चे स्वप्न भंगल्याने नागरिकांमध्ये असंतोष असल्याचे नगरसेवकांनी सांगितले.

अधिकाऱ्यांवर घोटाळ्याचे आरोप

स्मार्ट सिटी अंतर्गत झालेल्या कामांमध्ये मोठा प्रशासकीय घोटाळा झाल्याचा आरोप काही सदस्यांनी केला. १५ हजारांचे पाण्याचे मीटर १ लाख रुपयांना खरेदी केल्याचा मुद्दा उपस्थित करत या संपूर्ण प्रकरणाची चौकशी करण्याची मागणी संदीप वाघेरे यांनी केली. यावेळी सहमुख्य कार्यकारी अधिकारी किरणराज यादव नगरसेवकांच्या प्रश्नांच्या सरबत्तीने निरुत्तर झाले होते.