Dharashiv Health Department: धाराशिव आरोग्य विभागात गैरप्रकार? कंत्राटी कर्मचाऱ्यांच्या शोषणाचा आ. हेमंत ओगलेंनी केला आरोप

धाराशिव जिल्ह्यातील आरोग्य विभागातील कथित गैरप्रकारांचा मुद्दा सोमवारी राज्य विधानसभेत जोरदार चर्चेत आला. श्रीरामपूरचे काँग्रेस आमदार हेमंत ओगले यांनी प्रश्नोत्तराच्या तासात हा विषय उपस्थित गंभीर आरोप केले.

• धाराशिव आरोग्य विभागातील गैरप्रकार विधानसभेत गाजले
• श्रीरामपूरचे आ. हेमंत ओगले यांनी उठविला आवाज
• कंत्राटी कर्मचाऱ्यांच्या शोषणाचा गंभीर आरोप

 

Dharashiv Health Department: धाराशिव जिल्ह्यातील आरोग्य विभागातील कथित गैरप्रकारांचा मुद्दा सोमवारी राज्य विधानसभेत जोरदार चर्चेत आला. श्रीरामपूरचे काँग्रेस आमदार हेमंत ओगले यांनी प्रश्नोत्तराच्या तासात हा विषय उपस्थित करत कंत्राटी कर्मचाऱ्यांवर अन्याय होत असल्याचा गंभीर आरोप केला. त्यांनी सभागृहात मांडलेल्या माहितीनुसार, शासनाच्या नियमांनुसार कंत्राटी कर्मचाऱ्यांना दररोज किमान ६२६ ते ७८३ रुपये वेतन देणे बंधनकारक आहे. मात्र प्रत्यक्षात अनेक ठिकाणी यापेक्षा कमी वेतन दिले जात असल्याचे उघड झाले आहे.

ओगले यांनी सांगितले की, काही प्रकरणांमध्ये कामगारांकडून पूर्ण वेळ काम करून घेतले जात असूनही त्यांना ठरलेल्या दरापेक्षा कमी मोबदला दिला जात आहे. त्यामुळे या कर्मचाऱ्यांना वेठबिगारासारखी वागणूक दिली जात असल्याची टीका त्यांनी केली. यामुळे केवळ आर्थिक अन्यायच होत नाही, तर कामगारांच्या हक्कांचेही उल्लंघन होत असल्याचे त्यांनी स्पष्ट केले.

या मुद्द्यामुळे राज्यभरातील कंत्राटी कर्मचाऱ्यांच्या वेतन आणि सेवा अटींबाबत मोठा प्रश्न उपस्थित झाला आहे. अनेक ठिकाणी वेतन वेळेवर न मिळणे, कपात होणे आणि स्पष्ट सेवा अटी नसणे यामुळे कर्मचाऱ्यांमध्ये नाराजी असल्याचेही समोर आले. त्यामुळे संपूर्ण राज्यातील कंत्राटी भरती आणि वेतन व्यवस्थेचा सखोल आढावा घेण्याची मागणी करण्यात आली.

याशिवाय कंत्राटी भरती प्रक्रियेतील पारदर्शकतेवरही प्रश्नचिन्ह उपस्थित करण्यात आले. काही ठिकाणी कंत्राटदारांकडून नियमांचे उल्लंघन होत असल्याचे आरोप करण्यात आले. या पार्श्वभूमीवर संबंधित कंत्राटदार आणि जबाबदार अधिकाऱ्यांवर कठोर कारवाई करण्याची मागणी सभागृहात करण्यात आली.

या सर्व आरोपांवर उत्तर देताना आरोग्यमंत्री प्रकाश आबिटकर यांनी प्रकरणाची गंभीर दखल घेतल्याचे सांगितले. त्यांनी स्पष्ट केले की, या प्रकरणाची चौकशी केली जाईल आणि दोषी आढळल्यास संबंधितांवर कठोर कारवाई करण्यात येईल. तसेच, कंत्राटी कर्मचाऱ्यांना न्याय मिळावा यासाठी शासन आवश्यक ती पावले उचलेल, अशी हमी त्यांनी दिली.

या प्रकरणामुळे धाराशिव जिल्ह्यातील आरोग्य विभागाच्या कामकाजावर प्रश्नचिन्ह निर्माण झाले असून, संबंधित कर्मचाऱ्यांना योग्य वेतन आणि न्याय मिळणार का, याकडे सर्वांचे लक्ष लागले आहे.

डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.