Yedashi fire jaydatta kshirsagar
धाराशिव, जिल्हा प्रतिनिधी : येडशीतील भीषण अग्नितांडवात एकाच करंडे कुटुंबातील सहा जणांचा होरपळून मृत्यू झाल्याने संपूर्ण जिल्हा हादरला आहे. मात्र, या दुर्घटनेने केवळ एका कुटुंबाचा संसार उद्ध्वस्त केला नाही, तर जिल्ह्याच्या आपत्ती व्यवस्थापन यंत्रणेतील त्रुटीही उघड केल्या आहेत. आग लागल्यानंतर वेळेत मदत का पोहोचली नाही? जिल्ह्यात सक्षम अग्निशमन आणि बचाव यंत्रणा का नाही? अशा परखड प्रश्नांची सरबत्ती करीत माजी मंत्री तथा अखिल भारतीय तैलिक महासभेचे राष्ट्रीय अध्यक्ष जयदत्त क्षीरसागर यांनी प्रशासनाच्या कार्यपद्धतीवर तीव्र नाराजी व्यक्त केली.
दिवाळीच्या आनंदावर काळाने घाला घातलेल्या येडशी येथील या दुर्घटनेत उत्तम त्रिंबक करंडे, चंद्रकला उत्तम करंडे, गोविंद उत्तम करंडे, ज्योती गोविंद करंडे, गायत्री गोविंद करंडे आणि सिद्धी गोविंद करंडे या सहा जणांचा दुर्दैवी मृत्यू झाला. मध्यरात्री अडीचच्या सुमारास किराणा दुकानाला लागलेल्या आगीने रौद्ररूप धारण केले आणि क्षणार्धात करंडे कुटुंबाचा संसार राखरांगोळी झाला.
या घटनेची माहिती मिळताच क्षीरसागर यांनी येडशी येथे भेट देऊन दुर्घटनास्थळाची पाहणी केली. शोकाकुल करंडे कुटुंबीयांची भेट घेऊन त्यांचे सांत्वन केले. यावेळी धाराशिव जिल्हा तेली समाज संघटनेचे जिल्हाध्यक्ष रवि कोरे आळणीकर यांनी आगीची घटना, मदतकार्यात आलेल्या अडचणी आणि संपूर्ण घटनाक्रमाची माहिती दिली.
धाराशिव जिल्ह्यात मोठ्या प्रमाणावर साखर कारखाने आणि फटाका उद्योग असताना आपत्कालीन परिस्थितीला सामोरे जाण्यासाठी अत्याधुनिक अग्निशमन व बचाव यंत्रणा सक्षम का नाही, असा सवाल क्षीरसागर यांनी उपस्थित केला. दुर्घटनेच्या वेळी तातडीने मदत पोहोचणे अपेक्षित असताना विलंब झाल्याच्या नागरिकांच्या तक्रारी गंभीर असल्याचे त्यांनी नमूद केले. केवळ दुर्घटनेनंतर सांत्वन आणि आश्वासन देण्यापेक्षा अशा घटना रोखण्यासाठी तसेच जीवितहानी टाळण्यासाठी कायमस्वरूपी यंत्रणा उभारण्याची गरज असल्याचे त्यांनी स्पष्ट केले.
करंडे कुटुंबावर कोसळलेल्या या संकटाची माहिती मुख्यमंत्री देवेंद्र फडणवीस यांची भेट घेऊन देणार असून, पीडित कुटुंबीयांना शासनाकडून योग्य आर्थिक मदत मिळवून देण्यासाठी पाठपुरावा करणार असल्याचे क्षीरसागर यांनी सांगितले. या दुःखाच्या प्रसंगी आपण कुटुंबीयांच्या पाठीशी खंबीरपणे उभे असल्याची ग्वाहीही त्यांनी दिली.
यावेळी माजी जिल्हा परिषद सदस्य विलास बडगे, अरुण बोगाने, रवि कोरे आळणीकर यांच्यासह तेली समाजाचे पदाधिकारी आणि नागरिक उपस्थित होते.
सहा निष्पाप जीवांचा बळी गेल्यानंतर तरी प्रशासनाला जाग येणार का? आपत्ती व्यवस्थापनाच्या त्रुटी दूर करून जिल्ह्यात सक्षम अग्निशमन यंत्रणा उभी राहणार का? येडशीच्या दुर्घटनेने उपस्थित केलेले हे प्रश्न आता केवळ करंडे कुटुंबापुरते मर्यादित राहिलेले नाहीत, तर संपूर्ण जिल्ह्याच्या सुरक्षिततेशी निगडित झाले आहेत.
Shivajinagar Bus Depot: ८२५ कोटी, महामेट्रोसोबत मोठा करार; शिवाजीनगर एसटी बसस्थानकाचा होणार कायापालट
Ans: धाराशिव जिल्ह्यातील येडशी येथे किराणा दुकानाला लागलेल्या भीषण आगीत एकाच करंडे कुटुंबातील सहा जणांचा होरपळून मृत्यू झाला.
Ans: जयदत्त क्षीरसागर यांनी जिल्ह्यातील आपत्ती व्यवस्थापन आणि अग्निशमन यंत्रणेवर प्रश्न उपस्थित केले. साखर कारखाने आणि फटाका उद्योग असलेल्या जिल्ह्यात आधुनिक अग्निशमन यंत्रणा का नाही, असा सवाल त्यांनी केला.
Ans: मुख्यमंत्री देवेंद्र फडणवीस यांची भेट घेऊन दुर्घटनेची माहिती देणार असून, पीडित कुटुंबीयांना शासनाकडून योग्य आर्थिक मदत मिळावी यासाठी पाठपुरावा करणार असल्याचं जयदत्त क्षीरसागर यांनी सांगितलं.
.png "Videos"){kind=small}
