आमदार रवींद्र धंगेकरांनी 100 कोटींची वक्फ बोर्डाची मालमत्ता हडपली, गणेश बीडकर यांचा आरोप

गणेश बीडकर यांनी आमदार रवींद्र धंगेकर यांच्यावर वक्फ बोर्डाची 100 कोटींची मालमत्ता हडपाल्याचा आरोप केला आहे. चला याबद्दल सविस्तर माहिती जाणून घेऊया.

डॉ. महमंदखान करीमखान व त्यांच्या पत्नी बिबी राबियाबी यांनी 1925 साली लक्ष्मी रस्त्यावरील सतरा हजार तीनशे फूट क्षेत्रफळ असलेली सुमारे 100 कोटी रुपयांची मालमत्ता आमदार रवींद्र धंगेकर यांची पत्नी प्रतिभा यांच्यासह अन्य साथीदारांच्या साथीने हडप केल्याचा प्रकार उघड झाला आहे. महाराष्ट्र राज्य वक्फ मंडळ, छत्रपती संभाजीनगर यांनी नुकत्याच दिलेल्या निकालात ही मालमत्ता ‘वक्फ’ बोर्डाची असल्याचे घोषित केल्यानंतर याठिकाणी सुरू असलेल्या बांधकामाला महापालिकेने तातडीने स्थगिती दिली आहे. लक्ष्मी रस्त्यावर हामजेखान चौकात असलेला हा १७ हजार चौरस फुटाच्या भूखंडाची किंमत १०० कोटी रुपयांहून अधिक आहे.

याठिकाणी होणारी उलाढाल ही करोडो रुपयांमध्ये असल्याने या भूखंडावर डोळा ठेवून तो लाटण्यात आल्याचा आरोप पत्रकार परिषदेत पुणे महानगर पालिकेच्या स्थायी समितीचे माजी अध्यक्ष गणेश बीडकर यांनी केला आहे.

हे देखील वाचा: राजापूरमध्ये ठाकरे गटाच्या राजन साळवींची डोकेदुखी वाढणार, काँग्रेसच्या जिल्हाध्यक्षांंची बंडखोरी, प्रचारालाही सुरुवात

गणेश बीडकर म्हणाले, “डॉ. महमंदखान करीमखान यांनी ही मालमत्ता वक्फला देताना या मालमत्तेचा कशासाठी वापर करण्यात यावा, हे आपल्या वक्फनाम्यात स्पष्ट केले होते. या मालमत्तेपासून मिळणारे उत्पन्न मशिदीसाठी, गरजवंत विद्यार्थ्यांना शिष्यवृत्ती, दफनविधी, गरिबांचे लग्नकार्य आदी समाजउपयोगी कार्यासाठी खर्च करावे, असा उदार विचार डॉ. महमंदखान करीमखान यांनी १९३६ साली वक्फनाम्यात मांडला होता. मात्र, त्यांच्या पश्चात या जमिनीचा गैरवापर सुरू होता. या प्रकरणी रसुल अन्सर चित्तारी व त्यांचे सहकारी डॉ. एहेतेशाम शेख, वसीमभाई शेख, महिबूब सय्यद, वाहिद शेख, साबीर सय्यद, जमीर मोमीन, हमजा एहेतेशाम शेख, फारुख शेख, शफी मामु यांनी वक्फ मंडळाकडे पाठपुरावा सुरू केल्यानंतर हा गैरप्रकार लक्षात आला आहे.

या जमिनीचा सध्याचा ताबा हा आमदार धंगेकर यांची पत्नी प्रतिभा यांच्यासह सहकारी व्यक्तींकडे आहे. गेली अनेक वर्षे याप्रकरणी सुरू असलेल्या न्यायालयीन संघर्षानंतर ७ ऑक्टोबर रोजी वक्फ मंडळाने हा भूखंड वक्फ असल्याचे घोषित केले. त्यामुळे मुस्लिम समाजाला एक मोठा दिलासा मिळाला आहे.

हे देखील वाचा: लातूर ग्रामीण मध्ये भाजपची पुन्हा तीच खेळी, धीरज देशमुख यांच्या विरोधात रमेश कराड यांना तिकीट

महापालिका प्रशासनाने या बांधकामास परवानगी दिल्याने वक्फ मंडळाने महापालिका आयुक्तांनाही पत्र पाठवून हे बांधकाम थांबविण्याच्या सूचना केल्या आहेत. त्यानुसार महापालिकेच्या बांधकाम विभागाने तातडीने या बांधकाम थांबविण्याचे आदेश मे. उत्कर्ष असोसिएटसतर्फे प्रतिक सुनील आहिर व इतरांना 18 ऑक्टोबर रोजी दिले आहेत.

याशिवाय वक्फ मंडळाने जिल्हाधिकारी तसेच संबंधित यंत्रणांना आदेश देत या मालमत्ता पत्रकाच्या मालकी हक्कात वक्फ संस्थेचे (डॉ. महमंदखान करीमखान बीबी राबिया वक्फ) यांचे नाव लावण्यात यावे, तसेच या मालमत्ता पत्रकात असलेल्या खासगी व्यक्तींची नावे कमी करावीत, असे आदेश दिल्याने खळबळ उडाली आहे.

रवींद्र धंगेकर धंगेकरांकडून आरोपांचे खंडन

आमदार रवींद्र धंगेकर यांनी हे आरोप राजकीय हेतूने प्रेरित असल्याचे सांगत फेटाळून लावले आहे. ही जमीन त्यांच्या मालकीची नसून पत्नीच्या नावावर असल्याचे त्यांनी सांगितले. याला केवळ निवडणुकीचे राजकारण म्हणत भाजप नेते देवेंद्र फडणवीस यांच्या सांगण्यावरून आपल्याला लक्ष्य केले जात असल्याचे त्यांनी सांगितले. माझ्यावर 100 रुपयांच्या भ्रष्टाचाराचा आरोप सिद्ध झाला तर मी राजकारण सोडेन, असे धंगेकर म्हणाले.