दिवाळीत प्रवाशांची अडचण होणार दूर; 1200 जादा एसटी बस धावणार, विदर्भ, खान्देश, मराठवाड्यासाठी 900 लालपरी

सोलापूर, कोल्हापूर, सांगली आणि सातारा या भागांत जाणाऱ्या प्रवाशांसाठी स्वारगेट बसस्थानकातून जादा बस सोडण्यात येणार आहेत. शिवाजीनगर बसस्थानकातूनही विशेष गाड्यांची व्यवस्था करण्यात आली आहे.

• दिवाळीच्या पार्श्वभूमीवर प्रवाशांच्या सोयीसाठी १२०० जादा एसटी बस सोडण्यात येणार.
• यापैकी ९०० लालपरी बस विदर्भ, खानदेश आणि मराठवाड्याच्या दिशेने धावणार.
• दिवाळीच्या सुट्टीत गावी जाणाऱ्या प्रवाशांची वाढती गर्दी लक्षात घेऊन एसटी महामंडळाचा निर्णय

पुणे : दिवाळीनिमित्त गावी जाणाऱ्या प्रवाशांची वाढती गर्दी लक्षात घेऊन पुणे एसटी विभागाने यंदा १२०० जादा बस सोडण्याचे नियोजन केले आहे. विदर्भ, खानदेश आणि मराठवाड्यात जाणाऱ्या प्रवाशांसाठी ९००, तर सोलापूर, कोल्हापूर, सांगली आणि सातारा या भागांसाठी ३०० जादा बस धावणार आहेत. या विशेष बस ४ ते ७ नोव्हेंबरदरम्यान पिंपरी-चिंचवड, स्वारगेट आणि शिवाजीनगर येथून सोडण्यात येणार आहेत.

दिवाळीच्या काळात पुण्यात नोकरी, व्यवसाय आणि शिक्षणानिमित्त राहणारे नागरिक मोठ्या संख्येने गावी जातात. त्यामुळे विदर्भ, मराठवाडा, खानदेश आणि पश्चिम महाराष्ट्राकडे जाणाऱ्या बसला मोठी मागणी असते. दुसरीकडे, रेल्वेगाड्यांचे आरक्षण फुल्ल झाल्याने ऐनवेळी प्रवास करणाऱ्या नागरिकांसाठी एसटीचा पर्याय महत्त्वाचा ठरणार आहे. प्रवाशांची गैरसोय टाळण्यासाठी नियमित बससेवेसह जादा गाड्यांचे नियोजन करण्यात आले आहे.

पुणे जिल्ह्याच्या कालवा समितीच्या बैठकीची प्रतीक्षा; शेतकरी, नागरिकांचे लक्ष

विदर्भ, मराठवाडा आणि खानदेशात जाणाऱ्या प्रवाशांसाठी यंदा पिंपरी-चिंचवड आगारातून विशेष बस सोडण्यात येणार आहेत. यापूर्वी खडकी कॅन्टोन्मेंट परिसरातून जादा बस सोडल्या जात होत्या. मात्र, जागेची अडचण लक्षात घेऊन पिंपरी-चिंचवड आगाराला प्राधान्य देण्यात आले आहे. बसच्या पार्किंगसाठी जवळचे मैदान भाड्याने घेण्यात आले असून, नियोजित वेळेनुसार गाड्या रवाना होतील. हे आगार मेट्रोशी जोडलेले असल्याने प्रवाशांना तेथे पोहोचणेही सोयीचे ठरणार आहे.

दरम्यान, सोलापूर, कोल्हापूर, सांगली आणि सातारा या भागांत जाणाऱ्या प्रवाशांसाठी स्वारगेट बसस्थानकातून जादा बस सोडण्यात येणार आहेत. शिवाजीनगर बसस्थानकातूनही विशेष गाड्यांची व्यवस्था करण्यात आली आहे. या जादा बसचे ऑनलाइन आरक्षण सुरू करण्यात आले असून, प्रवाशांनी आगाऊ आरक्षण करून प्रवासाचे नियोजन करावे, असे आवाहन एसटी प्रशासनाने केले आहे.

पिंपरी-चिंचवडमधून जादा बस सोडण्याचे नियोजन

दिवाळीनिमित्त पुण्यातून यंदाही पिंपरी-चिंचवडमधून जादा बस सोडण्याचे नियोजन करण्यात आले आहे. ४ ते ७ नोव्हेंबरदरम्यान पिंपरी-चिंचवड, स्वारगेट आणि शिवाजीनगर येथून या जादा बस धावणार आहेत. यंदा पुण्यातून १२०० बस सोडण्याचे नियोजन करण्यात आले आहे. प्रवाशांनी आरक्षण करून सुरक्षित प्रवासाला प्राधान्य द्यावे.

– अरुण सिया, विभाग नियंत्रक, पुणे एसटी विभाग.

FAQ

1. दिवाळीसाठी किती जादा एसटी बस सोडण्यात येणार आहेत?
दिवाळीच्या पार्श्वभूमीवर १२०० जादा एसटी बस सोडण्यात येणार आहेत.

2. ९०० जादा बस कुठल्या भागांसाठी धावणार आहेत?
९०० लालपरी बस विदर्भ, खानदेश आणि मराठवाड्याच्या दिशेने धावणार आहेत.

3. जादा एसटी बस सोडण्याचा निर्णय का घेण्यात आला?
दिवाळीच्या सुट्टीत गावी जाणाऱ्या प्रवाशांची संख्या वाढत असल्याने गर्दीचा सामना करण्यासाठी जादा बसचे नियोजन करण्यात आले आहे.