पुण्यात परवानगीशिवाय ड्रोन उडवला तर होणार कारवाई; व्लॉगर्स, फोटोग्राफर्सवर पोलिसांचा ‘अँटी ड्रोन’ बडगा
पुणे : गणेशोत्सव काळात परवानगीशिवाय ड्रोन उडवणाऱ्यावर आता पुणे पोलिसांकडून थेट ड्रोन जप्ती तसेच संबंधितांवर कायदेशीर कारवाई केली जाणार आहे. गणेश चतुर्थीच्या दिवशी शहराच्या मध्यवर्ती भागात अनेक ठिकाणी अनधिकृतपणे ड्रोनद्वारे चित्रिकरण करण्यात आल्याचे पोलिसांच्या निदर्शनास आले आहे. या पार्श्वभूमीवर पुणे पोलिसांनी ‘अँटी ड्रोन पथक’ स्थापन करण्याचे आदेश दिले आहेत.
गणेशोत्सवाच्या पहिल्याच दिवशी शहरातील विविध भागांत गणेशमूर्तींच्या आगमन मिरवणुका आणि प्राणप्रतिष्ठा सोहळ्यांना मोठी गर्दी झाली होती. या गर्दीचा फायदा घेत अनेक व्लॉगर्स तसेच फोटोग्राफर्सकडून ड्रोन उडवून व्हिडिओ आणि रिल्स तयार करण्यात येत असल्याचे पोलिसांच्या निदर्शनास आले. विशेषतः मध्यवर्ती पुण्यातील गर्दीच्या भागात अनेक ड्रोन ऑपरेटर कार्यरत असल्याचे आढळून आले.
गणेशोत्सव काळात गर्दीचे व्यवस्थापन, महत्त्वाच्या ठिकाणांची सुरक्षा तसेच ड्रोनमुळे निर्माण होणारा संभाव्य धोका लक्षात घेता पोलिसांनी याची गंभीर दखल घेतली आहे. परवानगीशिवाय ड्रोन उडवणाऱ्यांवर कारवाई करण्यासाठी अँटी ड्रोन पथक सक्रिय करण्यात येणार आहे. या पथकाकडून संशयास्पद अथवा विनापरवाना ड्रोनच्या हालचालींवर लक्ष ठेवण्यात येणार आहे.
ड्रोन उडविण्यासाठी आवश्यक परवानगी न घेता चित्रिकरण करणाऱ्या ऑपरेटरवर कायदेशीर कारवाई करण्याबरोबरच संबंधित ड्रोनही जप्त केला जाणार आहे. त्यामुळे केवळ सोशल मीडिया रिल्स, यूट्यूब व्हिडिओ अथवा गणेशोत्सवाचे चित्रिकरण करण्यासाठी नियम धाब्यावर बसविणाऱ्या व्लॉगर्सना आता पोलिसांच्या कारवाईला सामोरे जावे लागणार आहे.
सुरक्षेचा निर्माण होऊ शकतो प्रश्न
गणेशोत्सवातील गर्दीच्या ठिकाणी ड्रोन उडवल्याने सुरक्षेचा प्रश्न निर्माण होऊ शकतो. त्यामुळे पोलिसांनी ड्रोन ऑपरेटर, व्लॉगर्स आणि फोटोग्राफर्स व इतरांनी नियमांचे पालन करण्याचे आवाहन केले आहे.
.png "Videos"){kind=small}
