
दुधाच्या दरात चार रुपयांची वाढ; पाचशे रुपयांनी महागले पशुखाद्य
काही महिन्यांपूर्वी बाराशे सत्तर रुपयांना मिळणारी पशुखाद्याची गोणी आता एक हजार आठशे ऐंशी रुपयांपर्यंत पोहोचल्याने दुग्धव्यवसायाचे गणितच कोलमडले आहे. त्यामुळे दुधाला भाव वाढला, पण हातात पैसा उरला कुठे? असा सवाल दूध उत्पादकांकडून उपस्थित केला जात आहे. शासनाकडून दूध दरवाढीचा गाजावाजा केला जात असला, तरी प्रत्यक्षात पशुखाद्य, सरकी पेंड, खळ, कडबा आणि हिरव्या चाऱ्याच्या वाढत्या खर्चामुळे शेतकऱ्यांच्या उत्पन्नातील मोठा हिस्सा जनावरांच्या संगोपनावरच खर्च होत आहे. मागील महिन्यात पशुखाद्याच्या एका पोत्यामागे ८० ते १२० रुपयांची वाढ झाली होती. त्यानंतर पुन्हा दरवाढ झाल्याने काही ठिकाणी पशुखाद्याची गोणी ४५० ते ५०० रुपयांनी महागल्याची दूध उत्पादकांची तक्रार आहे.
दुग्धव्यवसायात केवळ जनावरांना खाद्य देऊन भागत नाही, तर हिरवा चारा, सुका चारा, औषधोपचार, मजुरी आणि देखभाल यांचाही मोठा खर्च करावा लागतो. हिरवा चारा पिकवण्यासाठी एकरी सव्वा लाख रुपयांपेक्षा अधिक खर्च येत असल्याचे शेतकरी सांगतात. जर्सी गायीच्या दैनंदिन खाद्यावरील खर्चही मोठा असल्याने दूध विक्रीतून मिळणारे उत्पन्न आणि प्रत्यक्ष खर्च यांचा ताळमेळ बसवणे कठीण झाले आहे.
पाणी टंचाई आणखी तीव्र होण्याची शक्यता
नोव्हेंबर महिन्यातच परिसरात शेतीच्या तसेच पिण्याच्या पाण्याची टंचाई जाणवू लागली आहे. उन्हाळ्यात पाणी टंचाई अधिक तीव्र होण्याची चिन्हे दिसत असल्याने हिरवा चारा उपलब्ध होणार कसा, हा प्रश्न शेतकऱ्यांसमोर आहे. विकतचा चारा घेणे परवडत नाही आणि स्वतःच्या शेतात चारा पिकवणेही महाग झाले आहे. अशा परिस्थितीत पशुधन जगवायचे तरी कसे,असा प्रश्न दूध उत्पादकांना सतावत आहे.
१. दुधाच्या दरात किती वाढ झाली?
दुधाच्या दरात प्रतिलिटर चार रुपयांची वाढ झाली आहे.
२. पशुखाद्याच्या दरात किती वाढ झाली?
काही ठिकाणी पशुखाद्याची गोणी ४५० ते ५०० रुपयांनी महागली आहे.
३. पशुखाद्याच्या गोणीची सध्याची किंमत किती आहे?
पूर्वी १,२७० रुपयांना मिळणारी गोणी आता सुमारे १,८८० रुपयांपर्यंत पोहोचली आहे.