पुणे : पुणे जिल्हा परिषदेने (Pune Zilla Parishad) शंभर दिवसांत कामे पूर्ण करण्याच्या केलेल्या मोहिमेंतर्गत जिल्ह्यातील विविध तालुक्यांतील सुमारे २४६ किलोमीटर लांबीचे रस्ते पूर्ण करण्याचा विक्रम केला आहे.
पुणे जिल्हा परिषदेने शंभर दिवसांत कामे पूर्ण करण्याच्या मोहिमेंतर्गत जिल्ह्यातील विविध तालुक्यांतील सुमारे २४६ किलोमीटर लांबीचे रस्ते पूर्ण करण्याचा विक्रम केला आहे. यामध्ये १२५ किलोमीटर लांबीचे पक्के डांबरीकरण केलेल्या रस्त्यांचा समावेश आहे.
जिल्हा परिषदेने सुरू केलेल्या १०० दिवसांच्या मोहिमेअंतर्गत रस्ते बांधणीसह अन्य कामांचा समावेश होता. त्यात रस्त्यांची सुमारे दोन हजार ६३५ रस्त्यांच्या कामांचा समावेश होता. त्यापैकी मंगळवारी, एका दिवसात ६८२ कामे सुरू झाली. त्यात रस्त्यांचा समावेश होता. या संदर्भात बांधकाम समितीच्या बुधवारी झालेल्या बैठकीत मोहिमेचा अहवाल सादर करण्यात आला.
‘या मोहिमेअंतर्गत तयार करण्यात आलेल्या कामांमध्ये प्रत्येक काम सुमारे २५ मीटर डांबरीकरण किंवा काँक्रिटीकरणाचे उद्दिष्ट ठेवले होते. मंगळवारी दिवसभरात दोन हजार ६३५ कामांमधून २४६ किलोमीटर लांबीचे रस्ते तयार करण्यात आले आहेत. त्यात १२५ किलोमीटर लांबीचे पक्के डांबरीकरण केलेले रस्ते, सुमारे ४६ किलोमीटर काँक्रिटीकरण आणि ७४ किलोमीटर लांबीचे खडीकरण झाले आहे. उर्वरीत कामांची प्रशासकीय कार्यवाही पूर्ण करण्यात येणार आहे. निविदा प्रक्रिया ही वेगाने राबविण्यात येत आहे,’असे बांधकाम व आरोग्य सभापती प्रमोद काकडे यांनी सांगितले.
दरम्यान, जिल्ह्यात सर्वाधिक रस्त्यांची कामे आंबेगाव, इंदापूर, दौंड, बारामती तालुक्यात कामे झाली आहेत. वेल्हा, पुरंदर, शिरुर तालुक्यात सर्वाधिक कमी रस्त्यांची कामे झाली आहेत. मंगळवारी झालेल्या एकूण कामांमध्ये जिल्ह्यातील १०६ इमारतींचा समावेश आहेत. त्यात ग्रामपंचायत, अंगणवाडी, स्मशानभूमीच्या कामांचा समावेश आहे, अशीही माहिती यावेळी देण्यात आली.
जिल्हा परिषदेच्या इतिहासात प्रथमच…
जिल्हा परिषदेच्या इतिहासात प्रथमच जिल्ह्यातील २४६ किलोमीटर लांबीचे रस्ते पूर्ण करण्यात आले. त्यापैकी १२५ किलोमीटर लांबीचे रस्त्यांचे डांबरीकरण करून पूर्ण करण्यात आले. जिल्हा परिषदेच्या पदाधिकाऱ्यांसह अधिकाऱ्यांनी एकजुटीने केलेल्या कामामुळे; तसेच मोठ्या प्रमाणात वर्क ऑर्डर काढण्यात आल्याने हे शक्य झाले.
– प्रमोद काकडे, सभापती, बांधकाम व आरोग्य विभाग, जिल्हा परिषद
.png "Videos"){kind=small}
