ऑनलाईन की ऑफलाईन? विद्यापीठाच्या परीक्षा अखेर…

सावित्रीबाई फुले पुणे विद्यापीठाच्या (Savitribai Phule Pune University) सत्र परीक्षा ऑनलाईन होणार असल्याचे निश्चित झाले आहे. सोमवारी झालेल्या व्यवस्थापन परिषदेत विद्यापीठाच्या अंतिम परीक्षा ऑनलाईन (Pune University Exam) घेण्याचा निर्णय घेण्यात आला.

By कृपादान आवळे

Updated On: Jan 31, 2022 | 05:30 PM

ऑनलाईन की ऑफलाईन? विद्यापीठाच्या परीक्षा अखेर…

पुणे : सावित्रीबाई फुले पुणे विद्यापीठाच्या (Savitribai Phule Pune University) सत्र परीक्षा ऑनलाईन होणार असल्याचे निश्चित झाले आहे. सोमवारी झालेल्या व्यवस्थापन परिषदेत विद्यापीठाच्या अंतिम परीक्षा ऑनलाईन (Pune University Exam) घेण्याचा निर्णय घेण्यात आला. त्यामुळे विद्यार्थ्यांमध्ये परीक्षा ऑनलाईन होणार की ऑफलाईन असा निर्माण झालेला संभ्रम दूर झाला आहे. त्यामुळे येत्या १५ फेब्रुवारीपासून सुरु होणाऱ्या परीक्षा आता ऑनलाईन होणार आहेत.

सावित्रीबाई फुले पुणे विद्यापीठाच्या सत्र परीक्षा 15 फेब्रुवारीपासून ऑनलाइन घेण्याची तयारी परीक्षा व मूल्यमापन मंडळाद्वारे सुरु होती. उच्च व तंत्रशिक्षणमंत्री उदय सामंत यांनी विद्यापीठांच्या परीक्षा ऑनलाइन घ्याव्यात, अशा सूचना दिल्या होत्या. त्यानुसार पुणे विद्यापीठाकडून 21 जानेवारीपर्यंत विद्यार्थ्यांकडून अर्ज भरून घेण्यात आले.

परीक्षेसाठी साधारण साडेसहा लाखांहून अधिक विद्यार्थ्यांनी अर्ज भरले आहेत. संबंधित विद्यार्थ्यांची परीक्षा 15 फेब्रुवारीपासून ऑनलाइन घेण्याचे निश्चित झाले होते. मात्र, विद्यापीठाच्या व्यवस्थापन परिषदेत किमान अंतिम वर्षाच्या परीक्षा ऑफलाइन घेणे गरजेचे आहे, असा प्रस्ताव मांडण्यात येणार असल्याची चर्चा सुरु होती. त्यामुळे परीक्षा कशा होणार, याबाबत विद्यार्थ्यांमध्ये संभ्रम निर्माण झाला होता.

दरम्यान, परीक्षा ऑनलाइन की ऑफलाइन, याचे स्पष्टीकरण विद्यापीठाने द्यावे, अशी मागणी विद्यार्थ्यांसह संघटनांनी केली होती. मात्र, अखेर विद्यापीठाच्या परीक्षा ऑनलाईन घेण्याचा निर्णय सोमवारी झालेल्या व्यवस्थापन परीषदेत घेण्यात आला.