पुणे : पुण्यातील नॅशनल इन्स्टिट्यूट ऑफ व्हायरोलॉजीच्या (NIV) पथकाने बाधित रुग्णांच्या तपासणीसाठी घेतलेल्या नमुन्यांमधून मंकीपॉक्स विषाणू (Monkeypox Virus) वेगळे केले आहेत. जिवंत विषाणू काढण्यासाठी वैज्ञानिकांची एक टीम तयार करण्यात आली होती. १४ जुलैपासून व्हायरस शोधण्यासाठी प्रयोगशाळेत रात्रंदिवस काम करत होती. ११ दिवसांनंतर एनआयव्हीने सांगितले की, टीमला रुग्णाच्या नमुन्यातून मंकीपॉक्स विषाणू वेगळे करण्यात यश आले आहे.
या विषाणूच्या मदतीने शास्त्रज्ञ लवकरच संसर्ग (Infection) ओळखण्यासाठी चाचणी किट शोधण्यात सक्षम होतील. यासोबतच सीरियन उंदरांमध्ये (Syrian Rat) जिवंत विषाणूचा वापर करून त्याची तीव्रता आणि उपचारांबाबत महत्त्वाची माहिती काढता येणार आहे. याशिवाय मंकीपॉक्सविरोधी लसही (Vaccine) शोधली जाऊ शकते.
शास्त्रज्ञांनी ही भारताची ऐतिहासिक कामगिरी असल्याचे म्हटले आहे. हे मोठे यश असल्याचे एनआयव्हीच्या वरिष्ठ शास्त्रज्ञ डॉ.प्रज्ञा यादव यांनी सांगितले. २०२०मध्ये जेव्हा कोरोना महामारी सुरू झाली, त्या काळात आम्ही प्रथम कोरोना विषाणूला वेगळे केले. त्यानंतर चाचणी किट तयार करण्यात आली आणि कोवॅक्सिन लस देखील शोधण्यात आली. यावेळी मंकीपॉक्स वेगळे करण्यात आले आहे. त्याची चाचणी किट, उपचार आणि लस इत्यादींबाबत पुढील अभ्यास लवकरच सुरू होईल, असेही त्यांनी सांगितले.
लस, चाचणी किट बनवण्यासाठी काढली निविदा
भारतीय वैद्यकीय संशोधन परिषदेने (ICMR) चाचणी किट आणि लस तयार करण्यासाठी बुधवारी संध्याकाळी उशिरा निविदा जारी केली. खाजगी कंपन्यांच्या सहकार्याने ते लवकरच अँटी मंकीपॉक्स लस आणि त्याची चाचणी किट तयार करतील. प्रत्येक चाचणी किट किंवा लसीच्या डोसवरही रॉयल्टी मिळेल. सध्या, कोवॅक्सिन लसीवर पाच टक्के रॉयल्टी मिळते. मंकीपॉक्सवर अद्याप कोणतीही लस उपलब्ध नाही. तसेच ते ओळखण्यासाठी कोणतेही चाचणी किटही उपलब्ध नाही.
