मशवी गावाव्हाळ येथे खाजगी बस आणि रिक्षाचा भीषण अपघात, अपघातामध्ये तिघे जखमी

अपघात झाल्यावर जखमींना आचरा रुग्णालयात उपचारासाठी दाखल करण्यात आले होते.अधिक उपचारासाठी ओरोस येथे हलविण्यात आले.

देवगड: आचरा देवगड रस्त्यावर मशवी गावाव्हाळ येथील अवघड वळणावर खाजगी बसने दहिबावच्या दिशेने जाणाऱ्या रिक्षेला जोरदार धडक दिल्याने अपघात झाला. ही धडक एवढी भीषण होती की रिक्षामध्ये उजव्या बाजूस बसलेल्या नऊ वर्षाच्या मुलाचा उजवा पायांचे दोन तुकडे झालेत. रिक्षातील मुलाचे आईवडीलही जखमी झालेत. अपघात झाल्यावर जखमींना आचरा रुग्णालयात उपचारासाठी दाखल करण्यात आले होते.अधिक उपचारासाठी ओरोस येथे हलविण्यात आले. या अपघात झाल्याचे समजल्यानंतर देवगड पोलीस ठाण्याचे पोलीस विजय बिर्जे, सागर चौगले घटनास्थळी दाखल झाले होते.

या अपघातात रिक्षामधील रुद्र लवू घाडी वय 9, लवू धोंडू घाडी वय 45, रुचिता लवू घाडी 40 रा सर्व दहिबाव हे गंभीर जखमी झालेत. तर रिक्षा चालक रिक्षा वसंत गोविंद परब रा पोईप यांना किरकोळ दुखापत झाली.दहिबाव येथील लवू घाडी हे आपल्या कुटुंबासोबत पत्नीच्या माहेरी मालडी येथे काही दिवसापूर्वी गेले होते. ते मालडी येथून बुधवारी सकाळी आचरा मार्गे देवगड- दहीबांव येथे पोईप येथील रिक्षाने मालडी येथून पत्नी रुचिता व मुलगा रुद्र यांच्या समवेत जात होते.

सकाळी साडे नऊच्या सुमारास आचरा देवगड रस्त्यावर माशवी गावव्हाळ येथील अवघड वाळणावर आले असता समोरून आचराच्या दिशेने येणाऱ्या आराम बसने (आराम बस नंबर MH04 GP. 1875) रिक्षेच्या (रिक्षा नंबर MHO7 F 2115) उजव्या बाजूला जोरदार धडक दिली ही धडक एवढी जोरदार होती की काही अंतर रिक्षा फरफटत जाऊन कलंडली. धडकेत उजव्या बाजूला बसलेला रुद्र घाडी याचा उजवा पाय रिक्षा आणि आरामबसचा भागात सापडल्याने पायाचे दोन तुकडे झालेत. तर रिक्षातील लवू घाडी व रुचिता यांनाही डोक्याला व कानाच्या मागे गंभीर दुखापत झाली. अपघातानंतर आराम बस चालक बस तेथेच टाकून पसार झाला होता.