वसईत पुन्हा ‘सिरियल रेपिस्टची’ दहशत, आणखी एका चिमुरडीवर केला बलात्कार

रेहान कुरेशी नावाचा विकृत हे कृत्य करीत होता. रस्त्यात शाळकरी मुलींना अडवून त्यांना आडमार्गाला नेऊन विनयभंग तसेच बलात्कार करत होता.

वसई । रवींद्र माने : पोलिसांच्या हाती न लागलेल्या आणि काही काळ थंडावलेल्या सिरीयल रेपिस्टमी आणखी एका चिमुरडीवर बलात्कार केल्याची घटना नालासोपारात घडली आहे.

२०१८ साली नालासोपारा शहरात काही विकृत माणसं चिमुकल्या मुलींना चाॅकलेटचे आमीष दाखवून आणि निर्जन स्थळी नेऊन त्यांच्यावर बलात्कार करीत होती. त्याला अटक केल्यानंतर काही काळ हा प्रकार शांत झाला होता. त्यानंतर गेल्या ऑक्टोबर महिन्यात अल्पवयीन मुलींचे अपहरण करून तिच्यावर लैंगिक अत्याचार करणाऱ्या विकृतांची दहशत पसरली होती. दोन विकृत वसई विरार आणि नालासोपारा शहरामध्ये सध्या शाळकरी मुलींना रस्त्यात हेरून, घराबाहेर खेळणार्‍या चिमुकल्याना आडोशाला नेऊन त्यांच्यावर लैंगिक अत्याचार करत होते. या प्रकऱणी तुळींज पोलीस ठाण्यात दोन गुन्हे दाखल करण्यात आले होते. पोलिसांनी या दोन्ही विकृत आरोपींना पकडण्यासाठी पथके बनवून आरोपींची छायाचित्रे ठिकठिकाणी लावण्यात आली होती. तसेच त्यांची माहिती देणार्‍यास बक्षिस जाहीर करण्यात आले होते.

रेहान कुरेशी नावाचा विकृत हे कृत्य करीत होता. रस्त्यात शाळकरी मुलींना अडवून त्यांना आडमार्गाला नेऊन विनयभंग तसेच बलात्कार करत होता. नालासोपार्‍यातील अनेक मुलींवर त्याने अशा प्रकारे अत्याचार केले होते. ३ मुलींनी तशा तक्रारी दिल्या होत्या. मुंबई, नवी मुंबई, ठाणे, मीरा रोड, भाईंदर येथील शेकडो मुलींवर त्याने अशाप्रकारे लैगिक अत्याचार केल्याची उघड झाले होते. दोन वर्षे त्याची दशहत होती. नंतर त्याला गुन्हे शाखेने अटक केली होती.
त्यानंतर दोन विकृत असे प्रकार करीत होते. त्यापैकी एक विकृत विशाल कनोजिया याला गुन्हे शाखा ३ च्या पथकाने वाराणसी येथील केंट रेल्वे स्थानक परिसरातून अटक केली होती. उत्तर प्रदेश पोलिसांच्या विशेष तपास पथकाच्या (एसटीएफ) मदतीने ही कारवाई कऱण्यात आली होती. मात्र दुसरा विकृत पोलिसांच्या हाती लागला नव्हता.

पोलीस या विकृताचा शोध घेत असतानाच या मोकाट असलेल्या विकृताने मंगळवारी दुपारी नालासोपारा येथील एका चिमुकलीला आपले लक्ष बनवले. नालासोपारा पूर्वेला राहणारी ७ वर्षीय मुलगी दुपारी घराजवळ खेळत होती. त्यावेळी एका विकृताने या मुलीला त्याने बळजबरीने पळवून इमारतीच्या गच्चीवर नेले आणि तिच्यावर अनैसर्गिक लैंगिक अत्याचार केला. या प्रकरणी आचोळे पोलीस ठाण्यात या विकृताविरोधात अनैसर्गिक बलात्कार (कलम ३७७), अपहरण (कलम ३६३) तसेच बालकांच्या लैंगिक अत्याचारापासून संरक्षण (पोक्सो) च्या कलम ४, ६, ८ आणि १० अन्वये गुन्हा दाखल केला आहे.
पोलीस मार्गावर असतानाही या विकृताने एका मुलीवर बलात्कार केल्याने खळबळ उडाली आहे. स्थानिक पोलिसांबरोबर गुन्हे शाखेची पथके परिसर पिंजून काढून आरोपीचा शोध घेत आहेत. लवकरच आम्ही आरोपीला पकडून असा विश्वास गुन्हे शाखेच्या अधिकार्‍यांनी व्यक्त केला आहे.