Kalyan Dombivli Election: कल्याण-डोंबिवली मनपा आरक्षण सोडतीचा मुहूर्त ठरला; ११ नोव्हेंबरला अत्रे नाट्यगृहात होणार सोडत

कल्याण-डोंबिवली मनपा निवडणुकीची मोठी बातमी! प्रभाग आरक्षण सोडत ११ नोव्हेंबरला आचार्य अत्रे नाट्यमंदिरात होणार. SC, ST, OBC आणि महिला जागांचे आरक्षण पॅनल पद्धतीने निश्चित होणार.

• KDMC निवडणूक आरक्षण सोडत ११ नोव्हेंबरला
• पॅनल पद्धतीमुळे इच्छुकांचे लक्ष
• महिलांसाठीच्या जागांचे आरक्षण होणार निश्चित

कल्याण-डोंबिवली महानगर पालिकेच्या आगामी पालिका निवडणुकीसाठी जाहीर झालेल्या प्रभाग रचनेनंतर आता प्रभाग आरक्षण सोडतीचे वेध लागले आहेत. येत्या आठवड्यातील मंगळवारी ११ नोव्हेंबरला पालिकेच्या आचार्य अत्रे नाट्य मंदिरात प्रभाग आरक्षण सोडत काढण्यात येणार आहे. यामध्ये अनुसूचित जाती, अनुसूचित जमाती, मागासवर्गीय प्रवर्ग आणि महिलांसाठीच्या जागांचे आरक्षण निश्चित करण्यात येणार आहे. आरक्षित प्रभागातून निवडणूक लढणाऱ्या इच्छुक उमेदवारांचे या प्रभाग आरक्षण सोडतीकडे लक्ष लागून राहिले आहे.

प्रथमच चार सदस्यीय पॅनल पद्धत

राज्य निवडणूक आयोगाच्या आदेशाने केडीएमसी आगामी पालिका निवडणुकीचा कार्यक्रम जाहीर झाला असून त्यानुसार निवडणूक प्रक्रियेला सुरुवात झाली आहे. कल्याण-डोंबिवली महानगर पालिकेची आगामी पालिका निवडणूक प्रथमच चार सदस्यीय पॅनल पद्धतीने घेतली जाणार आहे. १२२ सदस्य निवडीसाठी १२२ प्रभागांतून चार सदस्यांचे २९ पॅनल तर तीन सदस्यांचे दोन पॅनल अशा ३१ पॅनलची निवडणूक घेतली जाणार आहे. त्या अनुषंगाने प्रभाग रचना जाहीर करून तिला शासनाने अंतिम मंजुरी दिली आहे.

मुंबई-अहमदाबाद महामार्गावर खड्ड्यांचं साम्राज्य; रस्त्याच्या दुरावस्थेमुळे अपघातात वाढ

महिलांसाठीच्या जागांचे आरक्षण होणार निश्चित

त्यानंतर सार्वत्रिक निवडणुकीसाठी प्रभागांचे सोडत पद्धतीने आरक्षण काढण्याचे निर्देश निवडणूक आयोगाने दिल्याने त्यानुसार कल्याण-डोंबिवली पालिका निवडणुकीसाठी येत्या मंगळवारी ११ नोव्हेंबरला कल्याणातील आचार्य अत्रे नाट्य मंदिरात ही सोडत काढली जाणार आहे. यामध्ये अनुसूचित जाती (SC), अनुसूचित जमाती (ST), मागासवर्गीय प्रवर्ग (OBC) आणि महिलांसाठीच्या जागांचे आरक्षण निश्चित करण्यात येणार आहे.

सोडतीनंतरचे वेळापत्रक:

• १७ नोव्हेंबरला प्रसिद्धी,
• २४ नोव्हेंबरला हरकती व सूचना दाखल करण्याची अंतिम तारीख,
• २५ नोव्हेंबर ते ०१ डिसेंबर या कालावधीत हरकतींचा विचार व अंतिम आरक्षणाचा निर्णय,
• तर २ डिसेंबरला अंतिम आरक्षण शासन राजपत्रात प्रसिद्ध केली जाणार आहे.

केडीएमसीची सार्वत्रिक पालिका निवडणूक प्रथमच पॅनल पद्धतीने होणार असल्याने सर्वच वर्गांची आरक्षणे नव्याने सोडत पद्धतीने काढली जाणार आहेत. त्यामुळे कोणता प्रभाग महिलांसाठी राखीव असणार, कोणता प्रभाग ओबीसी, एससी, एसटी प्रवर्गासाठी आरक्षित होणार, याकडे सर्वांचे लक्ष लागून राहिले आहे.

Bhiwandi News : वीजदर वाढीला न्यायालयाची स्थगिती; वीज नियामक आयोगाला दणका