खंडित वीजपुरवठा पूर्ववत न झाल्यास आंदोलनाचा इशारा

ग्रामपंचायत हद्दीतील पथदिव्यांचा वीजपुरवठा आगाऊ सूचना न देता महावितरणने खंडित केला आहे. विषयी विचारणा केली असता वीजबिलाचे कारण देण्यात आले. सदर वीजबिलाचे कशाप्रकारे नियोजन करायचे यासाठी ग्रामविकास खात्याकडून कोणतेही ठोस मार्गदर्शन उपलब्ध नाही. ग्रामपंचायत हद्दीतील पथदिवे चालू ठेवणे ही पंचायतीची जबाबदारी आहे.

मुरुड जंजिरा : ऐन पावसाळ्याच्या तोंडावर तालुक्यातील ग्रामपंचायतींच्या पथदिव्यांचा (Grampanchayat Street Lights) वीजपुरवठा (Power Outage) कोणतीही पूर्व सूचना न देता बंद करण्यात (Shut Down) आल्याने ग्रामस्थांना रात्रौ-अपरात्रौ विषारी साप आणि विंचू जीवजिवाणू पासून वेळप्रसंगी केव्हाही जीवितास धोका, अपघाताची शक्यता लक्षात घेऊन तातडीने पथदिव्यांचा वीजपुरवठा पूर्ववत (Power Outage Restore) सुरू राहाणे अत्यंत गरजेचे आहे.

ग्रामपंचायतींचा खंडित करण्यात आलेला वीज पुरवठा तातडीने सुरळीत पुर्ववत करण्यात न आल्यास याविरोधात ग्रामस्थांच्या वतीने आंदोलन करण्याचा इशारा बोर्ली सरपंच चेतन जावसेन, भोईघर सरपंचकाशिनाथ वाघमारे व मांडला सरपंच सुचिता सुरेश पालवणकर यांनी एका निवेदनाद्वारे पंचायत समितीचे गटविकास अधिकारी सुभाष वाणी यांना देण्यात आला आहे.

त्यांनी दिलेल्या निवेदनात म्हटले आहे की, ग्रामपंचायत हद्दीतील पथदिव्यांचा वीजपुरवठा आगाऊ सूचना न देता महावितरणने खंडित केला आहे. विषयी विचारणा केली असता वीजबिलाचे कारण देण्यात आले. सदर वीजबिलाचे कशाप्रकारे नियोजन करायचे यासाठी ग्रामविकास खात्याकडून कोणतेही ठोस मार्गदर्शन उपलब्ध नाही. ग्रामपंचायत हद्दीतील पथदिवे चालू ठेवणे ही पंचायतीची जबाबदारी आहे. आम्ही लोकप्रतिनिधी म्हणून सदर सोई पुरवण्यासाठी बांधिल आहोत. परंतु आमची इच्छा असून सुद्धा पथदिव्यांची बिले भरण्यास हतबल आहोत. सदर बिले कशाप्रकारे भरायची, किती भरायची, भरण्यासाठी कशाप्रकारे नियोजन करायचे याचे मार्गदर्शन होणे गरजेचे आहे. परंतु सदर वीजबिला बाबतचे योग्य ते नियोजन होईपर्यंत पथदिवे पूर्ववत करण्यासाठी महावितरणाला कळविण्यात यावे. जेणेकरून पावसाळा सुरू झाला असल्याने ग्रामस्थांची गैरसोय होणार नाही. ग्रामविकास खाते व ऊर्जा खाते यांच्यातील संवादाच्या अभावामुळे नाहक ग्रामस्थांना मनस्ताप सहन करावा लागत आहे.

यावर तातडीने ठोस निर्णय घेऊन ग्रामपंचायत हद्दीतील पथदिव्यांचा वीजपुरवठा पूर्ववत करण्यासाठी महावितरणाला निर्देश द्यावेत व पथदिव्याचा वीजपुरवठा पूर्ववत सुरू करण्यात यावा अन्यथा याविरोधात आम्हाला आंदोलन करण्याशिवाय दुसरा पर्याय राहणार नाही मग याची सर्वस्वी जबाबदारी आपणावर राहील, असे देण्यात आलेल्या निवेदनात म्हटले आहे. यावेळी बोर्ली सरपंच चेतन जावसेन, भोईघर सरपंच काशिनाथ वाघमारे व मांडला सरपंच सुचिता सुरेश पालवणकर उपस्थित होते.