Border 2: वरुण धवनने झाशीमध्ये सुरु केले ‘बॉर्डर २’चे शूटिंग, सनी देओल आणि दिलजीत दोसांझही होणार लवकरच सामील!

बॉलिवूड अभिनेता वरुण धवनने अनुराग सिंग दिग्दर्शित 'बॉर्डर २' चे चित्रीकरण सुरू केले आहे. चित्रपटाच्या निर्मात्यांनी पोस्ट शेअर करून ही माहिती दिली आहे. तसेच आता लवकरच सनी देओल आणि दिलजीतही सेटवर सहभागी होणार आहे.

वरुण धवनने अखेर त्याच्या आगामी देशभक्तीपर अ‍ॅक्शन चित्रपट ‘बॉर्डर २’ च्या पहिल्या शेड्यूलचे शूटिंग सुरू केले आहे. अनुराग सिंग दिग्दर्शित या चित्रपटाच्या चित्रीकरणाचा पहिला टप्पा उत्तर प्रदेशातील झाशी येथे सुरू आहे. या चित्रपटात सनी देओल, दिलजीत दोसांझ आणि अहान शेट्टी यांच्याही प्रमुख भूमिका आहेत. सध्या ते शूटिंगमध्ये सामील झालेले नाहीत. परंतु ते लवकरच शूटिंगमध्ये सहभागी होणार आहेत.

वरुण धवन सेटवर हजर
झाशीच्या लष्करी छावणी परिसरात घडणारा, ‘बॉर्डर २’ हा चित्रपट त्याच्या आकर्षक कथानका आणि अ‍ॅक्शन सीक्वेन्ससह खऱ्या घटनांना पडद्यावर आणण्याचा प्रयत्न करतो. इंस्टाग्रामवर, निर्मात्यांनी बॉर्डर २ च्या सेटवरील एक फोटो शेअर केला आहे, ज्यामध्ये वरुण निर्माते भूषण कुमार आणि निधी दत्ता, सह-निर्माते शिव चनाना आणि दिग्दर्शक अनुराग सिंग यांच्यासोबत पोज देताना दिसत आहे. अभिनेता राखाडी रंगाचा टी-शर्ट आणि निळ्या जीन्समध्ये दिसला आहे. त्याने हा आउटफिट काळ्या लेदर जॅकेटसोबत पूर्ण केला आहे. त्याने कुमार आणि दत्ता यांच्यासोबत चित्रपटाचा क्लॅपबोर्ड धरला होता.

 

See more

निर्मात्यांनी शेअर केली पोस्ट
पोस्ट शेअर करताना, निर्मात्यांनी कॅप्शन दिले, ‘कृती, संयम आणि देशभक्ती!’ अभिनेता वरुण धवन यांनी निर्माते भूषण कुमार आणि निधी दत्ता, सह-निर्माते शिव चनाना आणि दिग्दर्शक अनुराग सिंग यांच्यासोबत झाशीच्या सुंदर छावणी भागात बॉर्डर २ चा प्रवास सुरू केला आहे. २३ जानेवारी २०२६ – एका अविस्मरणीय गाथेसाठी सज्ज व्हा.’ असे लिहून चित्रपटाच्या निर्मात्यानी चाहत्यांना आनंदाची बातमी दिली आहे. तसेच आता हा चित्रपट पाहण्यासाठी चाहते खूप उत्सुक आहेत.

वरुण धवनने व्यक्त केला आनंद
तथापि, येत्या काही महिन्यांत सनी देओल, अहान शेट्टी आणि दिलजीत दोसांझ हे देखील चित्रपटाचे चित्रीकरण सुरू करतील. ऑगस्ट २०२४ मध्ये, वरुणने एक्सवरील एका पोस्टमध्ये ‘बॉर्डर २’ चा भाग असल्याबद्दल आनंद व्यक्त केला होता. त्यांनी लिहिले होते, ‘जेपी सर आणि भूषण कुमार निर्मित ‘बॉर्डर २’ मध्ये भूमिका साकारणे हा माझ्या कारकिर्दीतील एक अतिशय खास क्षण आहे. आणि मला सनी पाजीसोबत काम करायला मिळाले, ज्यामुळे ते आणखी अद्भुत झाले. भारतातील सर्वात मोठा युद्ध चित्रपट बनवण्याचे आश्वासन देत, एका शूर सैनिकाची कहाणी पडद्यावर आणण्यास मी उत्सुक आहे. तुमच्या शुभेच्छांची मी आतुरतेने वाट पाहत आहे. जय हिंद.’ असे लिहून अभिनेत्याने आपला आनंद व्यक्त केला होता.

Saif Ali Khan: सारा आणि इब्राहिम वडील सैफला भेटण्यासाठी पोहचले रुग्णालयात; कडक सुरक्षेसह करीना कपूर देखील हजर!

या चित्रपटांमध्ये दिसणार अभिनेता
वर्क फ्रंटबद्दल बोलायचे झाले तर अलीकडेच वरुण धवन ‘बेबी जॉन’ या चित्रपटात कीर्ती सुरेश, वामिका गब्बी, जॅकी श्रॉफ आणि राजपाल यादव यांच्यासोबत दिसला होता. हा चित्रपट बॉक्स ऑफिसवर फ्लॉप ठरला. त्याच्या आगामी चित्रपटाबद्दल सांगायचे तर, तो ‘नो एन्ट्री 2’ या चित्रपटात दिसणार आहे, ज्यामध्ये दिलजीत दोसांझ आणि अर्जुन कपूर यांच्याही भूमिका आहेत. याशिवाय वरुण धवनकडे ‘बॉर्डर 2’ हा चित्रपटही आहे. या चित्रपटात तो सनी देओल, दिलजीत आणि अहान शेट्टीसोबत स्क्रीन शेअर करणार आहे.