‘बिग बॉस ओटीटी ३’ ची विजेती सना मकबूल सध्या एका गंभीर आजाराने ग्रस्त आहे. सनाने सांगितले आहे की टॉलिवूड अभिनेत्री समांथा रुथ प्रभूप्रमाणे ऑटोइम्युन हेपेटायटिस (Autoimmune Hepatitis)नावाच्या आजाराने ती सुद्धा ग्रस्त आहे, जो यकृतासंबंधित गंभीर आजार आहे. या आजारात शरीराच्या पेशी यकृतावर हल्ला करतात. ज्यामुळे आरोगयाच्या अनेक गंभीर समस्या उद्भवू शकतात. सना मकबूलने नुकताच तिच्या आरोग्याबद्दल भारती सिंहच्या पॉडकास्टमध्ये हा धक्कादायक खुलासा केला आहे.
दरम्यान, सना मकबूलला हा आजार २०२० मध्ये झाला होता. सुरुवातीला कोणतीही विशिष्ट लक्षणे नव्हती, परंतु हळूहळू तिची तब्येत बिघडू लागली. त्यानंतर जेव्हा तिची चाचणी करण्यात आली तेव्हा तिला ऑटोइम्युन हेपेटायटिस (Autoimmune Hepatitis) असल्याचे आढळून आले. मुलाखतीत सना मकबूल म्हणाली की, “आरोग्याच्या कारणांमुळे मी अलीकडेच शाकाहारी झालेय. बऱ्याच लोकांना माहित नाही की मला ऑटोइम्यून हेपेटायटीस नावाच्या आजाराचे निदान झाले आहे. माझ्या शरीरातील पेशी माझ्या यकृतावर हल्ला करत आहेत. कधीकधी हा आजार ल्युपससारखा दिसतो, जो मूत्रपिंडांवर परिणाम करू शकतो किंवा संधिवातही होऊ शकतो. हा आजार २०२० मध्ये आढळून आला. याची कोणतीही विशिष्ट लक्षणे नाहीत. समांथा रूथ प्रभू यांना मायोसिटिस हा स्नायूंशी संबंधित आजार आहे. पण, मला यकृतासंबंधित आजार आहे.”
पुढे सना मकबूल म्हणाली की, “या आजाराशी लढण्यासाठी मला अनेक औषधांची मदत घ्यावी लागते. यासाठी मी स्टिरॉइड्स, इम्युनोसप्रेसन्ट्स किंवा काही औषधे घेत आहे. हा आजार पूर्णपणे बरा होऊ शकतो की नाही याबद्दल डॉक्टरांचे मत स्पष्ट नाही. हा आपल्या जीवनशैलीसंबंधित विकार आहे. यामुळे माझी तब्येत सतत बदलत असते. कधीकधी मला बरे वाटते, तर कधीकधी मला खूप अशक्तपणा जाणवतो. मला माहित नाही आता हे पूर्णपणे बरे होईल की नाही.” ‘बिग बॉस ओटीटी ३’ (Bigg Boss OTT 3) जिंकल्यानंतर सनाने अनेक म्युझिक व्हिडीओमध्ये काम केले. तिने ‘बिग बॉस १८’ चा विजेता करणवीर मेहराबरोबर एक म्युझिक व्हिडीओमध्ये काम केले आहे. अलीकडेच, ती नेझीबरोबर ‘भामाई’नावाच्या एका म्युझिक व्हिडीओमध्ये दिसली. त्यामुळे आजारपणातही सना तिच्या कामावर लक्ष केंद्रित करताना दिसत आहे.
.png "Videos"){kind=small}
