Chhaava Movie: 'हमारी सबसे बडी कमाई...', थिएटरमधील छोट्या मुलाने दिलेली गर्जना ऐकून विकी भावुक
अभिनेता विकी कौशल प्रमुख भूमिकेत असलेल्या ‘छावा’ चित्रपटाला प्रेक्षकांकडून दमदार प्रतिसाद मिळतोय. छत्रपती संभाजी महाराजांच्या शौर्यावर आधारित चित्रपटाचे फक्त देशातच नाही तर, परदेशातही हाऊसफुल्ल शो पाहायला मिळत आहे. चित्रपटाने फक्त तीन दिवसातच १०० कोटींचा टप्पा गाठत बॉक्स ऑफिसवर खळबळ उडवून दिली आहे. छत्रपती संभाजी महाराजांच्या शौर्यावर आधारित असलेला हा चित्रपट पाहून प्रत्येक प्रेक्षक पाणावलेल्या डोळ्यांनी थिएटरमधून बाहेर पडताना दिसत आहे.
देशभरात ‘छावा’चित्रपटाला मिळत असलेला प्रतिसाद पाहून निर्मात्यांसह दिग्दर्शकच नाही तर, विकी कौशलही भारावला आहे. त्याने त्याच्या इन्स्टाग्राम अकाऊंटवर एका छोट्या मुलाचा व्हिडीओ शेअर केला आहे. शेअर केलेल्या व्हिडीओमध्ये एक लहान मुलगा शिवगर्जना देताना दिसतोय. ही गर्जना करतानाही त्याच्या डोळ्यात पाणी येत आहे. विकीने शेअर केलेला हा व्हिडीओ पाहून तुमच्याही डोळ्यात अश्रू येईल.
काही तासांपूर्वीच अभिनेता विकी कौशल ह्याने इन्स्टाग्रामवर एक व्हिडिओ शेअर केला आहे. त्या शेअर केलेल्या व्हिडिओमध्ये ‘छावा’पाहून एक पाच ते सहा वर्षांचा लहान मुलगा भावूक झाल्याचं दिसत आहे. व्हिडिओमध्ये, हा मुलगा हृदयावर हात ठेवून रडताना दिसत आहे. विक्की कौशलने इन्स्टाग्रामवर त्या लहान मुलाचा गर्जना देतानाचा व्हिडिओ शेअर करताना व्हिडिओला कॅप्शन दिलेय की, “आमची सर्वात मोठी कमाई! तुझा अभिमान आहे बाळा… मला तुला मिठी मारता आली असती तर बरे होईल. तुमच्या प्रेमाबद्दल आणि भावनांबद्दल सर्वांचे आभार. शंभू राजेंची कहाणी जगातील प्रत्येक घरात पोहोचावी अशी आमची इच्छा होती… आणि हे घडताना पाहणे हा आमचा सर्वात मोठा विजय आहे. चित्रपटगृहात छावा.”
व्हिडीओमध्ये पाच ते सहा वर्षांचा चिमुकला ‘छावा’चित्रपट थिएटरमध्ये संपल्यानंतर रडत छातीवर हात ठेवून गर्जना देताना दिसत आहे. चिमुकल्याने थिएटरमध्ये गारद म्हणून छत्रपती शिवाजी महाराज आणि छत्रपती संभाजी महाराजांना मानवंदना दिली आहे. यावेळी त्याने ‘छत्रपती शिवाजी महाराज की जय’ अशा घोषणाही दिल्या आहेत. सोशल मीडियावर हा व्हिडीओ तुफान व्हायरल होत आहे. या व्हिडीओवर अभिनेता आयुषमान खुराना, डान्सर धर्मेशनेही कमेंट केली आहे. दरम्यान, पाच ते सहा वर्षांच्या चिमुकल्याच्या व्हिडिओवर लाखो लाईक्स आणि कमेंट्सचा वर्षाव केला जात असून हजारो युजर्सने व्हिडिओ शेअर केला आहे.
‘छावा’चित्रपटाने पहिल्या तीन दिवसांत ११६ कोटी रुपयांची कमाई केली आहे. प्रदर्शनाच्या पहिल्या दिवशी चित्रपटाने ३१ कोटी, विकेंडच्या पहिल्या दिवशी म्हणजेच शनिवारी ३७ कोटी, रविवारी अर्थात रिलीजच्या तिसऱ्या दिवशी ४८. ५० कोटींची कमाई केलेली आहे. रविवारी चित्रपटाच्या कमाईत मोठी वाढ झाली होती. १४ फेब्रुवारीच्या दिवशी रिलीज झालेल्या लक्ष्मण उतेकर दिग्दर्शित ‘छावा’चित्रपटाने बॉक्स ऑफिसवर दमदार कमाई केली आहे. मीडिया रिपोर्ट्सनुसार, १०० कोटींचा टप्पा पार करणारा ‘छावा’चित्रपट हा विकी कौशलच्या करिअरमधील सहावा आणि रश्मिका मंदानाच्या करिअरमधील आठवा चित्रपट ठरला आहे.
.png "Videos"){kind=small}
