Pune News : नगरसेवक अमोल बालवडकर यांचा सत्ताधारी भाजपला कोंडीत पकडण्याचा प्रयत्न; उपस्थित केला कायदेशीर मुद्दा

सत्ताधारी भाजपने नगरसेवक बालवडकर आणि सुहास टिंगरे यांच्या ‘स’ यादीतील तरतुदीचे वर्गीकरण केले होते. याविषयावरुन राज्यातील सत्ताधारी असलेल्या महायुतीमधील अजित पवार यांच्या राष्ट्रवादी काँग्रेस आणि सत्ताधारी भाजप या दोन घटक पक्षांत वाद निर्माण झाला आहे.

पुणे : नगरसेवकांनी सुचविलेल्या ‘स’ यादीतील कामांविषयी नगरसेवक अमोल बालवडकर यांनी कायदेशीर मुद्दे उपस्थित करत, सत्ताधारी भाजपला कोंडीत पकडण्याचा प्रयत्न केला. महापौर मंजुषा नागपुरे यांनी या विषयावर पुढील बैठकीत चर्चा होईल, असे नमूद करत तूर्तास या विषयावरील वाद टाळला आहे.

सत्ताधारी भाजपने नगरसेवक बालवडकर आणि सुहास टिंगरे यांच्या ‘स’ यादीतील तरतुदीचे वर्गीकरण केले होते. याविषयावरुन राज्यातील सत्ताधारी असलेल्या महायुतीमधील अजित पवार यांच्या राष्ट्रवादी काँग्रेस आणि सत्ताधारी भाजप या दोन घटक पक्षांत वाद निर्माण झाला आहे. महापालिकेच्या बजेटमधील ‘स’ यादीअंतर्गत होणाऱ्या निधी वाटपाच्या वैधानिकतेवर आणि पारदर्शकतेवर राष्ट्रवादी काँग्रेस पक्षाचे (अजित पवार गट) नगरसेवक अमोल बालवडकर यांनी मंगळवारी मुख्य सभेच्या कामकाजादरम्यान प्रश्नचिन्ह उपस्थित केले.

महापालिकेत हजारो कोटी रुपयांच्या निधीचे वाटप प्रभागनिहाय ‘अ, ब, क, ड’ असा वर्गवारीचा घाट घालून कोणत्या कायद्यानुसार आणि नियमानुसार केले जात आहे, असा थेट सवाल करत बालवडकर यांनी सत्ताधारी आणि प्रशासनाला चांगलेच कोंडीत पकडले.

‘स’ यादीतील निधी वाटपाच्या मुद्द्यावरून वातावरण तापले. “आपण महापालिकेच्या तिजोरीतील एक-एक रुपयाचा हिशोब ठेवतो; परंतु नगरसेवकांच्या प्रभागांसाठी हजारो कोटी रुपयांची तरतूद करताना नियमांची पायमल्ली का केली जात आहे? असा प्रश्न बालवडकर यांनी उपस्थित केला. या वेळी सभागृहात उपस्थित असलेल्या सत्ताधाऱ्यांकडून यावर कोणतेही स्पष्टीकरण देण्याचे टाळण्यात आले. अखेर स्थायी समिती अध्यक्षांनी यावर “प्रशासनच अधिकृत खुलासा करेल,” असे सांगत हात वर केले.

विशेष म्हणजे निधीचे वितरण करणाऱ्या स्थायी समिती अध्यक्षांनी याबाबत महापालिका आयुक्तांकडे स्पष्टीकरण मागितल्याचे सभागृहापुढे सांगितले. यातून स्थायी समिती अध्यक्षच नियमांबाबत अनभिज्ञ असल्याचे दिसून आले. मात्र, या महत्त्वाच्या विषयावर खुलासा करण्यासाठी महापालिकेचे मुख्य लेखापाल सभागृहात उपस्थित नसल्याचे कारण सांगत महापौरांनी या संवेदनशील विषयावर पुढील बैठकीत प्रशासनाने खुलासा करावा, असे निर्देश दिले.

Rohit Pawar on Drug Inspector Exam Cancelled : एमपीएससीचा पेपर फुटल्याचे पुरावे दिले होते! परीक्षा रद्द झाल्यावर रोहित पवार आक्रमक