ramesh mhatre
डोंबिवलीतील शास्त्रीनगर रुग्णालयातील डॉक्टर, नर्स आणि कर्मचाऱ्यांना मारहाण केल्याच्या प्रकरणात मोठी अपडेट समोर आली आहे. या प्रकरणातील आरोपी नगरसेवक रमेश म्हात्रे यांच्यासह तीन पुरुष आरोपींना जामीन मंजूर झाला आहे. जामिनाच्या अटींची पूर्तता केल्यानंतर रमेश म्हात्रे यांची आधारवाडी कारागृहातून सुटका करण्यात आली.
मात्र, न्यायालयाने जामीन देताना काही महत्त्वाच्या अटी घातल्या आहेत. त्यानुसार चार्जशीट दाखल होईपर्यंत रमेश म्हात्रे यांना महाराष्ट्रात प्रवेश करता येणार नाही. त्यामुळे कारागृहातून बाहेर आल्यानंतर ते थेट गोव्याच्या दिशेने रवाना झाले आहेत.
रमेश म्हात्रे यांना गोव्यात राहण्याचे निर्देश देण्यात आले आहेत. तसेच गोव्यातील अंजुना पोलिस ठाण्यात आठवड्यातून तीन वेळा हजेरी लावावी लागणार आहे. तपास यंत्रणेला सहकार्य करण्याचे आदेशही जामिनाच्या अटींचा भाग आहेत.
दरम्यान, रमेश म्हात्रे यांच्यासह तीन पुरुष आरोपींना जामीन मिळाला असला तरी या प्रकरणातील महिला आरोपीची अद्याप आधारवाडी कारागृहातून सुटका झालेली नाही.
या प्रकरणातील तपास जलदगतीने पूर्ण करून संबंधित पुरावे न्यायालयासमोर सादर करण्याचे निर्देश पोलिसांना देण्यात आले आहेत. यामध्ये घटनास्थळावरील CCTV फुटेज, साक्षीदारांचे जबाब आणि इतर महत्त्वाच्या पुराव्यांचा समावेश आहे. या प्रकरणाची पुढील सुनावणी 11 सप्टेंबर रोजी होणार आहे.
‘उद्धव ठाकरेंना जळी स्थळी काष्ठी पाषाणी शिंदेच दिसतात’; रामदास कदमांचा उद्धव ठाकरेंना टोला
दरम्यान, यापूर्वीच्या सुनावणीदरम्यान रमेश म्हात्रे यांनी उच्च न्यायालयाकडे जामिनासाठी विनंती केली होती. महाराष्ट्राबाहेर ठेवले तरी चालेल, मात्र जामीन द्यावा, अशी भूमिका त्यांनी न्यायालयासमोर मांडल्याचे सांगण्यात आले होते. अखेर न्यायालयाने काही कठोर अटी आणि शर्तींसह त्यांना जामीन मंजूर केला. त्यामुळे आधारवाडी कारागृहातून सुटका होताच रमेश म्हात्रे महाराष्ट्राबाहेर रवाना झाले आहेत. आता तपास आणि चार्जशीटच्या प्रक्रियेकडे सर्वांचे लक्ष लागले आहे.
.png "Videos"){kind=small}
