‘मी पाहुणा नाही तर इथला मुखिया, मायभूमीत आल्याचे मला समाधान’; केंद्रीयमंत्री ज्योतिरादित्य सिंधिया यांचे भावूक उद्गार

सुरुवातीला अवघे २० किल्ले असताना पराक्रमाची शर्थ करीत आणि गनिमी कावा यांचा अवलंब करून अत्यंत कमी काळात ३६५ किल्ल्यांचे स्वराज्य विस्तारित करण्याचे सामर्थ्य असणाऱ्या छत्रपती शिवरायांकडे होते.

कोरेगाव : इतिहासकाळात आम्ही महाराष्ट्राबाहेर गेलो असलो तरी, या मातीशी आमची नाळ कायम जुळलेली आहे. मी पाहुणा नाही तर इथला मुखिया आहे. मायभूमीत आल्याचे समाधान वाटते, असे भावूक उद्गगार केंद्रीय दूरसंचारमंत्री ज्योतिरादित्य सिंधिया यांनी कण्हेरखेड येथे काढले.

आपल्या मूळगावी सोमवारी केंद्रीय दळणवळणमंत्री आणि ईशान्य क्षेत्राचे विकासमंत्री जोतिरादित्य सिंधिया यांनी सदिच्छा भेट दिली व ग्रामस्थांशी संवाद साधला. यावेळी मंत्री शिंदे यांच्या पत्नी प्रियदर्शनीराजे शिंदे, युवराज महाआर्यमानराजे, सार्वजनिक बांधकाममंत्री छत्रपती शिवेंद्रसिंहराजे भोसले, आमदार मनोजदादा घोरपडे यांची प्रमुख उपस्थिती होती.

एक-एक मावळा जमवून छत्रपती शिवाजी महाराज यांनी स्वराज्याची स्थापना केली. सुरुवातीला अवघे २० किल्ले असताना पराक्रमाची शर्थ करीत आणि गनिमी कावा यांचा अवलंब करून अत्यंत कमी काळात ३६५ किल्ल्यांचे स्वराज्य विस्तारित करण्याचे सामर्थ्य असणाऱ्या छत्रपती शिवरायांकडे होते. त्यांनी घालून दिलेल्या मार्गावरून अनेक सरदारांनी अटकेपार घोडदौड केली, असे सांगून ज्योतिरादित्य शिंदे यांनी पानिपतच्या रणसंग्रामाला उजाळा दिला. यावेळी “हर हर महादेव…” अशी जोरदार घोषणा देत उपस्थितांमध्ये चैतन्य निर्माण केले.

इथल्या वाड्याचा दगड आणि दगड आपल्या पूर्वजांच्या पराक्रमाची साक्ष देत असल्याचे सांगून राष्ट्रमाता जिजाऊ, छत्रपती शिवराय, धर्मवीर संभाजीराजे यांच्या संकल्पनेतील स्वराज्य पुढे नेण्याचे काम अनेक सरदारांनी केले. त्यात शिंदे घराण्याचे योगदान बहुमोल असल्याचेही त्यांनी आवर्जून सांगितले.

“बचेंगे तो और भी लढेंगे” या दत्ताजी शिंदे यांच्या रणसंग्रामावरील प्रसंगाची आठवण करून देत असतानाच दहा वर्षानंतर पानिपतच्या रणसंग्रामास तोडीस तोड उत्तर देऊन मोघलांना धडा शिकवण्याची धमक शिंदे परिवारातील दिग्गजांनी दाखवली असल्याचेही आवर्जून सांगितले. तसेच अत्यंत कमी कालावधीत उत्तम कार्यक्रमाचे नियोजन केल्याबद्दल ग्रामस्थ व संयोजकांचेही कौतुक केले.

शिवेंद्रसिंहराजे भोसले यांनी त्यांच्या भाषणात ज्योतिरादित्य सिंधिया यांचे वडील माधवराव शिंदे, आजी विजयाराजे शिंदे यांच्याशी आपले वडील अभयसिंहराजे भोसले व आजी सुमित्राराजे भोसले यांचे वैचारिक आणि भावनिक नाते होते, असे सांगून कण्हेरखेडच्या सुपुत्रांनी राज्याबाहेर गाजवलेला पराक्रम वंदनीय असल्याचे सांगितले.

दरम्यान, कोणत्याही कार्यक्रमासाठी इतक्या संख्येने गावकरी जमत नाहीत. तुमचे या गावाशी असलेले ऋणानुबंध अखंड असल्यानेच मोठ्या जिव्हाळ्यातून हा जनसागर येथे जमला आहे. पराक्रमी सरदार घराण्यांची शिवछत्रपतींवर श्रद्धा तसेच स्वराज्यावर अपार निष्ठा असल्यामुळे शिवस्वराज्य अटकेपार पोहोचले, असेही त्यांनी सांगितले.

मायभूमीची माती लावली कपाळी 

ज्योतिरादित्य सिंधिया, प्रियदर्शनी शिंदे व युवराज महाआर्यमानराजे यांनी कण्हेरखेड गावांमध्ये प्रवेश करताच गावच्या कमानीसमोर आपल्या मायभूमीच्या चरणी माथा टेकवला व कण्हेरखेडची माती आपल्या कपाळी लावली. आपल्या गावाविषयीची ही कृतज्ञता उपस्थितांना विशेष भावली.