सुनील तटकरे यांचं नशीब बलवत्तर; ‘त्या’ हेलिकॉप्टरमधून करणार होते प्रवास, पण…

पुण्यामध्ये बावधन बुद्रुक गावाजवळ हेलिकॉप्टर क्रश झाले. पुण्यामध्ये हेलिकॉप्टर क्रश होण्याची ही दुसरी वेळी आहे, या अपघातामध्ये हेलिकॉप्टरमध्ये असणाऱ्या तीन जणांचा दुर्दैवी मृत्यू झाला आहे. आश्चर्याची गोष्ट म्हणजे हे हेलिकॉप्टर अजित पवार गटाचे प्रदेशाध्यक्ष आणि खासदार सुनील तटकरे घ्यायला जाणार होते. सुनील तटकरे हे याच हेलिकॉप्टरमधून प्रवास करणार होते

पुणे : पुणे शहरामध्ये पुन्हा एकदा हेलिकॉप्टर कोसळल्याची घटना घडली आहे. शहरातील बावधन बुद्रुक गावाजवळ एक हेलिकॉप्टर क्रॅश झाल्याची माहिती समोर आली आहे. मिळालेल्या माहितीनुसार या अपघातामध्ये तीन जणांनी आपला जीव गमावला आहे. ग्रामस्थांनी हिंजवडी पोलीस नियंत्रण कक्षाला माहिती दिल्यानंतर पोलीस आणि वैद्यकीय पथक घटनास्थळी रवाना झाले असून मदतकार्य सुरु आहे. पुण्यातील ऑक्सफर्ड काऊंटी रिसॉर्टच्या हेलिपॅडवरुन उड्डाण घेतल्यानतंर अवघ्या तीन मिनिटातच या हेलिकॉप्टरला अपघात झाला. याबाबत आता धक्कादायक माहिती समोर आली आहे. अजित पवार गटाचे प्रदेशाध्यक्ष आणि खासदार सुनील तटकरे हे या अपघातग्रस्त विमानाने प्रवास करणार होते, अशी माहिती समोर आली आहे.

मिळालेल्या माहितीनुसार, पुण्यातील ऑक्सफर्ड काऊंटी रिसॉर्टच्या हेलिपॅडवरुन आज सकाळी 7.30 वाजता एका हेलिकॉप्टरने उड्डाण घेतले. त्यानंतर हेलिकॉप्टर मुळशी भागातील डोंगराळ परिसरातून उड्डाण घेत होते. पुण्यातील पावसाचा जोर ओसरला असला तरी डोंगराळ भागात दाट धुके पसरले आहे. या धुक्यामुळे हेलिकॉप्टरच्या वैमानिकाचा अंदाज चुकला आणि हेलिकॉप्टर थेट दरीत कोसळले, असा प्राथमिक अंदाज वर्तवला जातो आहे. हे हेलिकॉप्टर हेरिटेज एव्हिएशन कंपनीचे होते. ऑक्सफर्ड काऊंटी रिसॉर्ट आणि एचईएमआरएल या केंद्र सरकारच्या संस्थेदरम्यान असलेल्या डोंगराळ भागात हा अपघात झाला.

हे देखील वाचा : पुण्यात हेलिकॉप्टर क्रॅश,तिघांचा मृत्यू

पुण्यामधील हे अपघातग्रस्त हेलिकॉप्टर खासदार सुनील तटकरे यांना घेण्यासाठी मुंबईच्या दिशेने रवाना झाले होते. मात्र त्यापूर्वीच पुण्यामध्ये या हेलिकॉप्टरचा अपघात झाला. काल देखील (दि.01) सुनील तटकरे यांनी याच ट्विन इंजिन ऑगस्टा बनावटीच्या याच हेलिकॉप्टरने प्रवास केला होता. विशेष म्हणजे सुनील तटकरे हे काल या हेलिकॉप्टरने पुण्याहून परळीला गेले होते आणि त्यानंतर ते याच हेलिकॉप्टरने पुण्याला परतले होते. यानंतर सुनील तटकरे हे हेलिकॉप्टर पुण्यातच सोडून मुंबईला रवाना झाले. हे हेलिकॉप्टर सुनील तटकरे यांना नेण्यासाठी पुण्याहून मुंबईच्या दिशेने रवाना झाले होते. मात्र त्यापूर्वीच या हेलिकॉप्टरला अपघात झाला. तटकरे यांना घेऊन ते हेलिकॉप्टरने रायगड जिल्ह्यातील सुतारवाडी येथे जाणार होते. मात्र सकाळीच हे हेलिकॉप्टर बावधन बुद्रुक परिसरातील दरीत कोसळले.