PM Modi Birthday : पियूष गोयलांचा ‘सेवा’चा संकल्प; उत्तर मुंबईत 100 सुविधा केंद्रांसह ओपन जिमची घोषणा

PM Modi Birthday : पंतप्रधान नरेंद्र मोदी यांच्या वाढदिवसानिमित्त केंद्रीय मंत्री आणि उत्तर मुंबईचे खासदार पियूष गोयल यांनी मतदारसंघात विविध सेवा उपक्रम राबवले. 100 सुविधा केंद्रे, ओपन जिम, रक्तदान शिबिर आणि विकासकामांच्या उद्घाटनाची घोषणा यावेळी करण्यात आली.

• उत्तर मुंबईत 100 सुविधा केंद्रे उभारण्याची पियूष गोयलांची घोषणा.
• स्वच्छतागृह, पिण्याचे पाणी आणि परवडणारी लॉन्ड्री सेवा मिळणार.
• नागरिकांच्या आरोग्यासाठी मतदारसंघात ओपन जिम उभारण्याची योजना

 

PM Modi Birthday : पंतप्रधान नरेंद्र मोदी यांच्या वाढदिवसानिमित्त उत्तर मुंबईचे खासदार आणि केंद्रीय वाणिज्य व उद्योग मंत्री पियूष गोयल यांनी मतदारसंघात विविध सेवा आणि विकासकामांना वेग दिला. महिला सक्षमीकरणापासून नागरी सुविधा, आरोग्य, रक्तदान आणि युवा उद्योजकांशी संवाद अशा वेगवेगळ्या उपक्रमांमध्ये त्यांनी सहभाग घेतला.

चारकोपमधील ‘प्रगतीचा दिया’ वेल्फेअर सेंटरला भेट देत गोयल यांनी महिला लाभार्थींशी संवाद साधला. महिलांच्या अडचणी, त्यांचे अनुभव आणि भविष्यातील अपेक्षा जाणून घेत त्यांनी कल्याणकारी योजनांचा प्रत्यक्ष फायदा किती मिळतोय, याची माहिती घेतली.

यानंतर कांदिवलीतील दुर्गा साई एसआरए परिसरात त्यांनी लाभार्थी कुटुंबांच्या घरांना भेटी दिल्या. विकासकामं कागदावर न राहता ती थेट नागरिकांच्या दारापर्यंत पोहोचली पाहिजेत, असा संदेश यावेळी गोयल यांनी दिला.

‘मोदीजींच्या कर्तृत्वाची उंची हिमालयाएवढी’; मोदींच्या वाढदिवसानिमित्त एकनाथ शिंदेंचं भरभरून कौतुक, गुजरातीमधून भाषणाची सुरुवात

दरम्यान, उत्तर मुंबईतील नागरिकांसाठी एक महत्त्वाची घोषणा करण्यात आली. लवकरच 100 सुविधा केंद्रे सुरू करण्यात येणार असून, या केंद्रांमध्ये स्वच्छतागृह, स्वच्छ पिण्याचे पाणी आणि परवडणाऱ्या दरात लॉन्ड्री सेवा उपलब्ध करून देण्याची योजना आहे. विशेषतः या सुविधांची गरज असलेल्या वस्त्या आणि समुदायांमध्ये त्याचा फायदा होणार आहे.

याशिवाय उत्तर मुंबईत ओपन जिम उभारण्याची योजनाही गोयल यांनी जाहीर केली. युवक, ज्येष्ठ नागरिक आणि कुटुंबांना जवळच्या परिसरात व्यायामाची सुविधा मिळावी, हा त्यामागचा उद्देश असल्याचे सांगण्यात आले. पंतप्रधानांच्या वाढदिवसानिमित्त आयोजित रक्तदान शिबिरालाही गोयल यांनी भेट दिली. रक्तदात्यांचे आणि स्वयंसेवकांचे त्यांनी कौतुक केले.

‘शिंदेंना शिवसेना आणि धनुष्यबाण देताना काय निकष होते?’ सुप्रीम कोर्टाचा निवडणूक आयोगाला सवाल

बोरीवलीतील कल्पना चावला चौक, सरदार वल्लभभाई चौक आणि चिकुवाडी जॉगर्स पार्क येथील विकासकामांचे उद्घाटनही यावेळी करण्यात आले. तसेच वीर सावरकर मैदानावर आयोजित पारणा समारंभात त्यांनी सहभाग घेतला.

दिवसभराच्या दौऱ्यात गोयल यांनी बोरीवली आणि दहिसरमधील गणपती मंडपांनाही भेट दिली. यावेळी त्यांनी स्टार्टअप उद्योजकांशी संवाद साधत त्यांच्या व्यवसायाच्या कल्पना आणि प्रवासाबाबत चर्चा केली. एकूणच, मोदींच्या वाढदिवसानिमित्त उत्तर मुंबईत सेवा, नागरी सुविधा, आरोग्य आणि महिला सक्षमीकरणाचा मुद्दा केंद्रस्थानी राहिला.