सोमवार, 12 ऑक्टोबर 2026
'सोमेश्वर'मध्ये सुनेत्रा पवारांची एकतर्फी बाजी! २१ पैकी २१ जागांवर विजयाचे संकेत; पुरुषोत्तम जगतापांना मोठा धक्का
मतमोजणीच्या प्रारंभी ‘ब’ वर्ग संस्था प्रतिनिधी मतदारसंघातून राष्ट्रवादी पुरस्कृत पॅनेलचे संग्राम सोरटे यांनी १३३ पैकी ९३ मते मिळवत ॲड. महेश राणे यांचा पराभव केला. त्यानंतर राष्ट्रवादीच्या कार्यकर्त्यांनी जल्लोष केला. मात्र, दिवंगत उपमुख्यमंत्री अजितदादा पवार यांच्या निधनाला वर्ष पूर्ण झाले नसल्याने गुलालाची उधळण आणि फटाक्यांची आतषबाजी टाळण्यात आली.
गट क्रमांक एकमधील नींबूत-खंडाळा मतदारसंघातून प्रमोद काकडे, अभिजित काकडे आणि डॉ. वसंतराव दगडे यांनी साडे आठ हजारांहून अधिक मताधिक्याने विजय मिळविला. गट क्रमांक दोनमधील मुरूम-वाल्हे मतदारसंघात कारखान्याचे माजी अध्यक्ष राजवर्धन शिंदे, विक्रम भोसले आणि ऋषिकेश गायकवाड यांनी ६ हजार ५७२ मताधिक्याने बाजी मारली. डॉ. दगडे यांना पुरंदरचे आमदार विजय शिवतारे यांचा पाठिंबा होता.
या निवडणुकीत ८४ टक्के मतदान झाले होते. बारामती, पुरंदर तसेच सातारा जिल्ह्यातील खंडाळा आणि फलटण या भागांत कार्यक्षेत्र असलेल्या कारखान्याच्या निवडणुकीत ८३ उमेदवार रिंगणात होते. पुरुषोत्तम जगताप यांनी ऐनवेळी स्वतंत्र पॅनेल उभे केले, तर युगेंद्र पवार यांनीही स्वतंत्र आव्हान दिले. जगताप यांच्या पॅनेलला भाजपचे माजी आमदार संजय जगताप यांनी पाठिंबा दिला होता. दुसरीकडे, आमदार विजय शिवतारे यांनी सुनेत्रा पवार यांच्या पॅनेलला साथ दिली.
निवडणूक प्रतिष्ठेची असल्याने सुनेत्रा पवार, खासदार पार्थ पवार आणि जय पवार यांनी बारामतीत तळ ठोकून प्रचारयंत्रणा सक्रिय ठेवली होती. अजितदादांच्या रणनीतीचा अवलंब करत राष्ट्रवादीने पदाधिकारी आणि कार्यकर्त्यांची मोट बांधली. विरोधी पॅनेलचे पाच ते सहा उमेदवार विजयी होतील, असा अंदाज व्यक्त होत असतानाच मतमोजणीतील कल राष्ट्रवादीच्या बाजूने झुकला.
सायंकाळी सहा वाजेपर्यंत पहिल्या दोन गटांसह ‘ब’ वर्ग मतदारसंघाचा निकाल जाहीर झाला होता. उर्वरित मतमोजणीला विलंब होत असल्याने मध्यरात्रीनंतरही प्रक्रिया सुरू राहण्याची शक्यता होती.
