वधू जमिनीवर आणि तिचा वर अवकाशात…! ‘अशा’ प्रकारे झाले होते जगातील पहिले अंतराळातील लग्न

first space wedding : आजपासून बरोबर २२ वर्षांपूर्वी, एकटेरिना दिमित्रीव्हने टेक्सासमध्ये जमिनीवर असताना आंतरराष्ट्रीय अंतराळ स्थानकावर अवकाशात राहत असलेले तिचे पती युरी मालेन्चेन्कोशी लग्न केले.

first space wedding : १० ऑगस्ट २००३ हा दिवस मानवाच्या प्रेमकथेत आणि अंतराळाच्या इतिहासात एक अनोखी नोंद करून गेला. आजपासून बरोबर २२ वर्षांपूर्वी, एक रशियन अंतराळवीर आणि त्याची वधू यांनी पृथ्वी-आणि-अंतराळ जोडणारे जगातील पहिले लग्न केले. वधू जमिनीवर होती आणि वर पृथ्वीपासून शेकडो किलोमीटर उंच, आंतरराष्ट्रीय अंतराळ स्थानकात (ISS) अवकाशात होता!

प्रेमाची अनोखी भेट

रशियाचे अनुभवी अंतराळवीर युरी मालेन्चेन्को त्या काळात ISS वर कार्यरत होते. दुसरीकडे, त्यांची अमेरिकन वधू एकटेरिना दिमित्रीव्ह टेक्सासमध्ये जमिनीवर होती. युरी यांचे अंतराळातील वास्तव्य वाढवल्यामुळे नियोजित पृथ्वीवरील लग्न रद्द झाले. मात्र अंतर आणि गुरुत्वाकर्षणाच्या पलीकडे गेलेले त्यांचे प्रेम या परिस्थितीतही थांबले नाही. दोघांनी तंत्रज्ञानाच्या मदतीने उपग्रहाद्वारे लग्नाचा थेट समारंभ आयोजित केला. युरी ISS मधून आणि एकटेरिना ह्युस्टनमधील नासाच्या जॉन्सन स्पेस सेंटर मधून जोडल्या गेल्या व्हिडिओ-कॉलवर विवाहबंधनात अडकले.

जागतिक घडामोडी संबंधित बातम्या वाचण्यासाठी येथे क्लिक करा : महासत्तांचा नवा डावपेच! चंद्रावर अणुऊर्जा तळ उभारण्यासाठी ‘या’ देशांमध्ये सुरु झालीये अनोखी अंतराळ स्पर्धा

लग्नाचा अविस्मरणीय दिवस

त्या दिवशी युरीने आपल्या स्पेस सूटवर बो टाय घातला होता, तर एकटेरिनाने पारंपारिक हस्तिदंती रंगाचा विवाहड्रेस नेसला होता. ह्युस्टनमधील स्पेस सेंटरमध्ये तिच्या वराचा कार्डबोर्ड कटआउट ठेवण्यात आला होता. डेव्हिड बोवीचे प्रसिद्ध गाणे पार्श्वभूमीवर वाजत असताना तिने त्या कटआउटला मिठी मारली  हा क्षण तिच्या आयुष्यातील सर्वात भावनिक क्षण ठरला. एकटेरिनाने न्यू यॉर्क टाईम्सला दिलेल्या मुलाखतीत सांगितले  “तो माझ्यापासून खूप दूर होता, पण तरीही आपल्या संवादामुळे तो माझ्या सर्वात जवळ होता. या लग्नातून हे स्पष्ट होते की माणसाला नेहमीच पुढे जाण्याची इच्छा आणि गरज असते.”

नियोजित स्वप्नातला बदल

मुळात हे लग्न पृथ्वीवर २०० पाहुण्यांच्या उपस्थितीत साजरे होणार होते. मात्र, युरीचे अंतराळातील कामकाज वाढले आणि नियोजन बदलावे लागले. त्यानंतर त्यांनी ठरवले  जिथे तो आहे, तिथेच लग्न होईल. आणि त्या धाडसी निर्णयाने इतिहास रचला.

जागतिक घडामोडी संबंधित बातम्या वाचण्यासाठी येथे क्लिक करा : ‘भारत-पाकिस्तानसह पाच युद्धे आम्ही थांबवली…’ ट्रम्प यांनी पुन्हा मारली बढाई; आता टॅरिफवर ‘हे’ धक्कादायक विधान

जगभरातील चर्चेचा विषय

त्या काळात हे लग्न जगभरातील माध्यमांनी गाजवले. कारण, ही केवळ प्रेमकथा नव्हती; ती मानवी जिद्दीची आणि तंत्रज्ञानाच्या सामर्थ्याची साक्ष होती. पृथ्वीवरील एका छोट्याशा सभागृहातून आणि अवकाशातील ISS मधून एकत्र आलेले वचन आजही जगातील सर्वांत अनोख्या विवाहांपैकी एक मानले जाते. आज, २२ वर्षांनंतर, ही घटना आपल्याला स्मरण करून देते की, खऱ्या प्रेमासाठी कोणतीही सीमा नसते मग ती हजारो किलोमीटरचे अंतर असो, अथवा पृथ्वी आणि अवकाश यांच्यामधील पोकळी असो.