खो-खो मध्ये महाराष्ट्र दोन्ही संघांची विजयी घोडदौड; पुरुष व महिला गटात कर्नाटकचा धुव्वा उडवीत उपांत्य फेरीत धडक
38th National Games 2025 : महाराष्ट्र संघाने खो खो स्पर्धेत आपल्या विजयी रथाची घौडदौड सुरूच ठेवली आहे. महाराष्ट्राच्या दोन्ही संघाने धमाकेदार खेळाचे प्रदर्शन करीत कर्नाटक संघाला पराभूत करीत उपांत्य फेरीत धडक मारली.
हल्दवानी : गतविजेत्या महाराष्ट्राच्या पुरुष व महिला खो खो संघांनी हल्दवानी येथे सुरू असलेल्या ३८ व्या राष्ट्रीय क्रीडा स्पर्धेत कर्नाटकचा धुव्वा उडवीत उपांत्य फेरीत धडक दिली. महाराष्ट्राच्या पुरुष संघाने एक डाव १२ गुणांनी बाजी मारली, तर महिलांनी ६ गुणांनी विजय मिळवित आगेकूच केली.
कर्नाटकवर 12 गुणांनी मात
पुरुष खोखो गटात महाराष्ट्रने कर्नाटकवर एक डाव १२ गुणांनी (३४-२२) मात केली. विजयी संघाकडून कर्णधार गजानन शेंगाळ (२.३० मि. संरक्षण व २ गुण), शुभम थोरात (१.४० मि., २.०५ मि. संरक्षण व ६ गुण), रामजी कश्यप (१.३५ मि. संरक्षण व ६ गुण), सौरभ आडावकर (१.४५ मि. संरक्षण व २ गुण) यांनी उत्कृष्ट खेळाचे प्रदर्शन केले. कर्नाटककडून संघाप्पा (१.१० मि. संरक्षण व २ गुण), गौतम एम. के (६ गुण) यांनी दिलेली झुंज अपयशी ठरली.
महिला गटात झालेल्या चुरशीच्या सामन्यात महाराष्ट्राने कर्नाटक संघावर ६ गुणांनी (३२-२६) मात केली. महाराष्ट्रच्या विजयात प्रियांका इंगळे (२ मि. संरक्षण व २ गुण), संध्या सुरवसे (२ मि. व १.२० मि. संरक्षण व ४ गुण), संपदा मोरे (०.५० मि. संरक्षण व १६ गुण), गौरी शिंदे (१.३० मि., १.४० मि. संरक्षण व २ गुण), अश्विनी शिंदे (१.३० मि., १.३० मि. संरक्षण) यांनी मोलाची कामगिरी बजावली. तर कर्नाटककडून मोनिका (१.२० मि., १.४० मि. संरक्षण व ६ गुण), चित्रा बी. (२.१० मि. संरक्षण व ४ गुण), तेजस्विनी के. आर. (१.३० मि. व १.२० मि. संरक्षण) यांनी चांगला खेळ केला. मात्र, त्यांना महाराष्ट्राचा विजयरथ रोखण्यात यश आले नाही.
.png "Videos"){kind=small}
