शनिवार, 24 ऑक्टोबर 2026
Vaibhav Sooryavanshi
गेल्या काही सामन्यांपासून वैभवला अंतिम ११ खेळाडूंमध्ये स्थान देण्याची मागणी होत होती. परंतु संघ व्यवस्थापनाने वैभवला आपल्या संधीची वाट पाहावी लागेल असे म्हटले होते. परंतु,आजच्या सामन्यात वैभवला ईशान किशनच्या जागी खेळण्याची संधी मिळाली. या सामन्यात वैभव आपली छाप सोडू शकला नाही. तो ८ चेंडूमध्ये ४ धावा करुन बाद झाला. परंतु, त्याने मैदानात उतरताच आणखी एक विक्रम केला आहे. (Vaibhav Sooryavanshi )
वैभव सूर्यवंशी भारतीय संघासोबत पहिल्यांदाच न्यूझीलंड दौऱ्यावर आहे. पहिल्या टी-२० सामन्यासाठी त्याला अंतिम ११ खेळाडूंमध्ये स्थान देण्यात आले नव्हते. पहिल्या सामन्यात ईशान किशनला मांडीला दुखापत झाली. यानंतर, बीसीसीआयने सांगतिले की, तो दुसऱ्या टी-२० सामन्यात खेळणार नाही. त्याच्या जागी वैभवला तिसऱ्या क्रमांकावर खेळण्याची संधी देण्यात आली आहे. सूर्यवंशी आता न्यूझीलंडविरुद्ध आंतरराष्ट्रीय सामना खेळणारा सर्वात तरुण खेळाडू ठरला आहे. त्याने वयाच्या १५ वर्षे आणि २११ दिवसांत हा पराक्रम केला आहे.
वैभवने बांग्लादेशच्या मोहम्मद शरीफचा विक्रम मोडला आहे. तो १८ डिसेंबर २००१ रोजी हॅमिल्टन कसोटी सामना खेळला होता, तेव्हा त्याचे वय १६ वर्षे आणि ६ दिवस होते. आकिब नावेदही न्यूझीलंडमध्ये खेळला होता, तेव्हा त्याचे वय १६ वर्षे आणि १८५ दिवस होते. भारतासाठी हा विक्रम यापूर्वी सचिन तेंडुलकरच्या नावावर होता. सचिनने वयाच्या १६ वर्षे आणि २८४ दिवसांनी न्यूझीलंडकडून पदार्पण केले होते. आता हे सर्व विक्रम मोडून वैभवने अव्वल स्थान पटकावले आहे.
वैभव सूर्यवंशीसाठी २०२६ हे वर्ष आतापर्यंत चांगले ठरले आहे. त्याने आयपीएलमध्ये उत्कृष्ट कामगिरी केली. यामुळे त्याला भारतीय संघाच्या टी-२० संघात स्थान मिळाले. त्याने इंग्लंडमध्ये पदार्पण केले, मात्र तेथील त्याची कामगिरी विशेष प्रभावी नव्हती. झिम्बाब्वेचा दौरा त्याच्यासाठी एक महत्त्वाचा टप्पा ठरला. त्याने या दौऱ्यावर दोन अर्धशतके झळकावली.
वैभवने अद्याप भारतीय भूमीवर पदार्पण केलेले नाही. अफगाणिस्तानविरुद्धच्या तीन सामन्यांच्या टी-२० मालिकेत त्याला संधी देण्यात आली नाही. अलीकडेच, भारताने वेस्ट इंडिजविरुद्ध पाच सामन्यांची टी-२० मालिका खेळली, ज्यात त्याला सर्व सामन्यांसाठी बेंचवर बसवण्यात आले होते. वैभवने आतापर्यंत भारतासाठी आठ टी-२० आंतरराष्ट्रीय सामने खेळले असून, त्यात त्याने २४६ धावा केल्या आहेत, ज्यात त्याची सर्वोत्तम धावसंख्या ८१ आहे.
संजू सॅमसन (विकेटकीपर), अभिषेक शर्मा, वैभव सूर्यवंशी, श्रेयस अय्यर (कर्णधार), तिलक वर्मा, नितीश कुमार रेड्डी, नमन धीर, अक्षर पटेल, भुवनेश्वर कुमार, अर्शदीप सिंग, प्रिन्स यादव.
