शनिवार, 22 ऑगस्ट 2026
Neeraj Chopra
लुसाने डायमंड लीग स्पर्धेत २८ वर्षीय नीरज समोर सर्वात मोठे आव्हान श्रीलंकेचा रुमेश थरंगा पाथिरागे होता. नीरज चोप्राची स्पर्धेची सुरुवात खराब झाली, त्याने आपल्या पहिल्या प्रयत्नात केवळ ८३.५४ मीटरचा थ्रो केला. दरम्यान, श्रीलंकेच्या रुमेश थरंगा पाथिरागेने आपल्या पहिल्या प्रयत्नात ८५.९९ मीटरचा थ्रो करून आघाडी घेतली. परंतु, नीरजने आपल्या दुसऱ्या प्रयत्नात जोरदार कमबॅक केले आणि ८८.०५ मीटरचा थ्रो करून अव्वल स्थान पटकावले, जो त्याचा या हंगामातील सर्वोत्तम थ्रो होता. दरम्यान, रुमेशने आपल्या दुसऱ्या प्रयत्नात ८७.०६ मीटरचा थ्रो केला.ही नीरजची या हंगामातील सर्वोत्तम फेकही होती, यापूर्वी त्याने २०२६ च्या राष्ट्रकुल क्रीडा स्पर्धेत ८५.८३ मीटर थ्रो केला होता.
रुमेशपाथिरागेने आपल्या तिसऱ्या प्रयत्नात बाजी पलटवली. पाथिरागेने ८८.१४ मीटर भाला फेकला. जे नीरजच्या थ्रोपेक्षा फक्त ८ सेंटीमीटरने लांब होता. या शानदार कामगिरीमुळे त्याने पुन्हा पहिले स्थान पटकावले. तर नीरजने तिसऱ्या फेरीत ८३.७२ मीटर थ्रो केला. चौथ्या फेरीत नीरजचा फाऊल झाला. तर पाचव्या फेरीत त्याने थ्रो न फेकण्याचा निर्णय घेतला. तर त्याचा सहावा प्रयत्न केवळ ८२.१५ मीटरचा होता. दरम्यान, रुमेशने पाचव्या आणि सहाव्या प्रयत्नात फाऊल केला. मात्र, रुमेशची तिसरी फेक निर्णायक ठरली. २३ वर्षीय रुमेश पाथिरागे या हंगामात उत्कृष्ट फॉर्ममध्ये असून त्याने लुसानेमध्येही आपला प्रभावी फॉर्म कायम ठेवत प्रथम स्थान पटकावले. तर, ग्रेनेडाच्या अँडरसन पीटर्सने ८६.६९ मीटर थ्रो करून तिसरे स्थान पटकावले. त्याने आपल्या सहाव्या आणि अंतिम प्रयत्नात हे अंतर गाठले. हा त्याचा स्पर्धेतील सर्वोत्तम थ्रो होता.
यापूर्वी, नीरज चोप्राने स्कॉटलंडमधील ग्लासगो येथे झालेल्या राष्ट्रकुल क्रीडा स्पर्धा २०२६ मध्ये ८५.८३ मीटर थ्रो करून रौप्य पदक जिंकले होते. मात्र, या स्पर्धेतही नीरज सर्वोत्तम फॉर्ममध्ये नव्हता. तर, याच स्पर्धेत श्रीलंकेच्या रुमेशने ८९.७५ मीटर थ्रो करून सुवर्ण पदक जिंकले होते.
