Jaffar Express : 2 महिन्यात 3 वेळा हल्ला! जाणून घ्या जाफर एक्सप्रेस का आहे बंडखोरांच्या निशाण्यावर?

Jaffar Express blast Balochistan December 2025 : पाकिस्तानातील बलुचिस्तानमधील बलुच बंडखोरांनी जाफर एक्सप्रेस आणि बोलन मेलवर बॉम्बस्फोट केले, ज्यामुळे रेल्वे रुळांचे नुकसान झाले आणि रेल्वे सेवा विस्कळीत झाल्या.

• दुहेरी बॉम्बस्फोट: बलुच बंडखोरांनी जाफर एक्सप्रेस आणि बोलन मेलला लक्ष्य करत मुशकाफ आणि दश्त भागात रेल्वे ट्रॅक उडवले.
• वाहतूक ठप्प: स्फोटामुळे ३ फूट रेल्वे ट्रॅकचे नुकसान झाले असून, बलुचिस्तानचा इतर तीन प्रांतांशी असलेला रेल्वे संपर्क तुटला आहे.
• हाय अलर्ट: प्रवाशांच्या सुरक्षेसाठी क्वेट्टाहून निघणाऱ्या सर्व गाड्या आता केवळ सुरक्षा मंजुरीनंतरच सोडल्या जाणार आहेत.

Jaffar Express blast Balochistan December 2025 : पाकिस्तानचा (Pakistan) बलुचिस्तान प्रांत पुन्हा एकदा हिंसाचाराच्या वणव्यात होरपळत आहे. बलुच बंडखोरांनी आपले हल्ले तीव्र केले असून, यावेळी त्यांनी पाकिस्तानची जीवनवाहिनी मानल्या जाणाऱ्या ‘जाफर एक्सप्रेस’ (Jaffer Express) आणि ‘बोलन मेल’ या प्रवासी गाड्यांना लक्ष्य केले आहे. शुक्रवारी झालेल्या दोन भीषण बॉम्बस्फोटांमुळे रेल्वे रुळांचे मोठे नुकसान झाले असून, बलुचिस्तानचा इतर प्रांतांशी असलेला संपर्क पूर्णपणे तुटला आहे. या घटनेमुळे पाकिस्तानच्या सुरक्षा यंत्रणेच्या दाव्यांवर पुन्हा एकदा प्रश्नचिन्ह निर्माण झाले आहे.

मुशकाफ आणि दश्तमध्ये भीषण स्फोट

क्वेट्टाचे वरिष्ठ पोलीस अधीक्षक (SSP) शाहिद नवाज यांनी दिलेल्या माहितीनुसार, पहिला स्फोट मुशकाफ परिसरात झाला, ज्यामध्ये मुख्य रेल्वे लाईनचा सुमारे ३ फूट भाग पूर्णपणे उद्ध्वस्त झाला. त्यानंतर काही वेळातच मास्तुंग जिल्ह्यातील दश्त भागात दुसरा स्फोट झाला. या दोन्ही स्फोटांचा मुख्य उद्देश जाफर एक्सप्रेस आणि बोलन मेल या गाड्यांना रुळावरून उतरवणे हा होता. सुदैवाने, या गाड्या थेट स्फोटाच्या तडाख्यात आल्या नाहीत, अन्यथा मोठी जीवितहानी झाली असती. मात्र, रुळांच्या नुकसानीमुळे शेकडो प्रवाशांना तासनतास निर्जन भागात अडकून पडावे लागले.

जागतिक घडामोडी संबंधित बातम्या वाचण्यासाठी येथे क्लिक करा : Epstein Files : जेफ्री एपस्टाईनशी संबंधित किमान 16 फायली गहाळ! 24 तासांत ट्रम्पचे फोटोही डिलीट; अमेरिकेत तुफान गदारोळ

प्रवाशांची सुरक्षा धोक्यात; रेल्वे सेवा विस्कळीत

या हल्ल्यानंतर पाकिस्तान रेल्वेने खबरदारीचा उपाय म्हणून सर्व गाड्यांचे वेळापत्रक रद्द केले आहे. एसएसपी नवाज यांनी स्पष्ट केले की, जोपर्यंत सुरक्षा दले संपूर्ण ट्रॅकची तपासणी करून ‘क्लिअरन्स’ देत नाहीत, तोपर्यंत एकही गाडी क्वेट्टाहून सोडली जाणार नाही. प्रवाशांची गर्दी आणि भीतीचे वातावरण पाहता, शनिवारी पेशावरसाठी केवळ एक विशेष जाफर एक्सप्रेस सोडण्यात आली. मात्र, नियमित सेवा अद्यापही ठप्प असल्याने प्रवाशांचे प्रचंड हाल होत आहेत.

See more

Baloch Army carried out a major attack in Pakistan; BLA took more than 150 passengers hostage, including Army personnels, in the Jaffar Express train going from Quetta.
Six Pakistan Army soldiers were also killed in the Hijack process.#Balochistan #TrainHijack pic.twitter.com/ZjAo2rwX21 — Oxomiya Jiyori 🇮🇳 (@SouleFacts) March 11, 2025

credit : social media and Twitter

जाफर एक्सप्रेस: बंडखोरांचे मुख्य लक्ष्य

जाफर एक्सप्रेसवर हल्ला होण्याची ही पहिलीच वेळ नाही. गेल्या दोन महिन्यांत या गाडीवर किमान तीन वेळा हल्ले झाले आहेत. मार्च महिन्यात तर बंडखोरांनी चक्क ट्रेनचे अपहरण केले होते, ज्यामध्ये २० प्रवाशांना आपला जीव गमवावा लागला होता. बलुच लिबरेशन आर्मी (BLA) सारख्या संघटना पाकिस्तान सरकारवर दबाव आणण्यासाठी सातत्याने रेल्वे आणि पायाभूत सुविधांना लक्ष्य करत आहेत. बंडखोरांच्या मते, या रेल्वेचा वापर पाकिस्तान सरकार बलुचिस्तानमधील नैसर्गिक संसाधनांची लूट करण्यासाठी करत आहे.

जागतिक घडामोडी संबंधित बातम्या वाचण्यासाठी येथे क्लिक करा : Tarique Rahman: कट्टरपंथीयांचा काळ बनून परतणार तारिक रहमान; ज्याच्या एका आवाजावर उभा राहतो अख्खा Bangladesh

गृहयुद्धाच्या उंबरठ्यावर बलुचिस्तान?

बलुचिस्तानमधील परिस्थिती दिवसेंदिवस हाताबाहेर जात आहे. एकीकडे आर्थिक संकट आणि दुसरीकडे वाढता बंडखोर हिंसाचार यामुळे पाकिस्तान सरकार हतबल झाले आहे. रेल्वे ट्रॅकची दुरुस्ती करण्याचे काम युद्धपातळीवर सुरू असले तरी, बंडखोरांच्या धास्तीमुळे कामगारांनाही तिथे जाण्यास भीती वाटत आहे. अशा वातावरणात सामान्य नागरिक मात्र भीतीच्या सावटाखाली जगत आहेत.