ben gurion airport attack today
Houthis target Israel missiles : इराणसोबत १२ दिवस चाललेल्या युद्धानंतर इस्रायलने काहीसा दिलासा घेतला होता. मात्र केवळ चार दिवसांतच येमेनमधील हुथी बंडखोरांनी इस्रायलवर पुन्हा क्षेपणास्त्र डागल्याने संपूर्ण देशात घबराट पसरली आहे. हा हल्ला इस्रायलच्या दक्षिणेकडील भागात करण्यात आला असून, यावेळी हवाई इशारे (सायरन) वाजवण्यात आले आणि हवाई संरक्षण यंत्रणा सक्रिय करण्यात आली.
शनिवारी इस्रायली लष्कराने जाहीर केले की, येमेनच्या दिशेने डागले गेलेले क्षेपणास्त्र हे बेन गुरियन आंतरराष्ट्रीय विमानतळाच्या अत्यंत जवळ, फक्त ७५ मीटर अंतरावर पडले. सुदैवाने या हल्ल्यात कोणतीही जिवितहानी झाली नसली, तरी सुरक्षेच्या दृष्टीने मोठा इशारा मानला जात आहे. इस्रायलमधील एकमेव प्रमुख विमानतळ म्हणून ओळखल्या जाणाऱ्या या केंद्रावर झालेला संभाव्य हल्ला अत्यंत गंभीर आहे.
१३ जूनपासून सुरू असलेले इस्रायल-इराण युद्ध २४ जून रोजी युद्धबंदीनंतर थांबले होते. मात्र त्यानंतर अवघ्या चार दिवसांतच, येमेंमधून हुथी बंडखोरांकडून पुन्हा हल्ला करण्यात आला. हे क्षेपणास्त्र दक्षिण इस्रायलमध्ये डागण्यात आले, ज्यामुळे विमानतळ परिसरात तणावाचे वातावरण निर्माण झाले. इस्रायली लष्कराने सांगितले की, हल्ल्याचे स्रोत, उद्दिष्ट आणि परिणाम यांची चौकशी सुरू असून, धोका निष्प्रभ करण्यासाठी सर्व उपाययोजना राबवण्यात येतील.
जागतिक घडामोडी संबंधित बातम्या वाचण्यासाठी येथे क्लिक करा : युद्ध आहे की Meme War! ‘Daddy शिवाय पर्याय नाही…’ इराणने डोनाल्ड ट्रम्पचे नाव घेऊन इस्रायलला डिवचले
ऑक्टोबर २०२३ मध्ये गाझा पट्ट्यावरील युद्ध सुरू झाल्यापासून येमेंमधील हुथी बंडखोर आणि इस्रायल यांच्यातील तणाव वाढत चालला आहे. गाझाच्या लोकांसाठी पाठिंबा दर्शवताना, हुथींनी इस्रायली मालकीच्या जहाजांवर लाल समुद्रात हल्ले सुरू केले आणि वेळोवेळी इस्रायलच्या दिशेने क्षेपणास्त्रे डागली. अमेरिका आणि इस्रायलने मिळून हुथी बंडखोरांवर जोरदार हवाई हल्लेही केले होते, परंतु तरीही या गटाने आपले हल्ले सुरू ठेवले आहेत. यापूर्वी, मे महिन्यातही हुथींनी इस्रायलच्या हवाई संरक्षण यंत्रणेला चकवून तेल अवीवजवळ बॅलिस्टिक क्षेपणास्त्र डागले होते.
🚨 Sirens sounding in southern Israel following projectile fire from Yemen 🚨
— Israel Defense Forces (@IDF) June 28, 2025
credit : social media
बेन गुरियन विमानतळाजवळ क्षेपणास्त्र पडल्याने अनेक आंतरराष्ट्रीय उड्डाणे रद्द किंवा वळवावी लागली. सुरक्षा यंत्रणा आणि वैमानिक यांच्यासाठी ही घटना अत्यंत धोकादायक मानली जात आहे. ज्या ठिकाणी हे क्षेपणास्त्र पडले, ते टर्मिनल-३ पासून अवघ्या काही मीटर अंतरावर होते. विशेष म्हणजे, ही घटना इस्रायलच्या संरक्षण व्यवस्थेची कमजोरी उघड करते, कारण याआधी अनेक वेळा हुथी हल्ले हवेतच निष्प्रभ करण्यात आले होते. मात्र या घटनेमुळे स्पष्ट होते की, हुथी गटाची क्षेपणास्त्र क्षमता आणि उद्दिष्ट अचूकतेने हल्ला करण्यासाठी सक्षम आहे.
या घटनेनंतर अमेरिकेसह अनेक पाश्चिमात्य देशांनी इस्रायलला आपले समर्थन जाहीर केले असून, येमेनच्या हुथींविरोधात कारवाईसाठी समर्थनही दर्शवले आहे. मिडल ईस्टमधील तणावाचे वातावरण पुन्हा चिघळू शकते, अशी शक्यता वर्तवली जात आहे.
जागतिक घडामोडी संबंधित बातम्या वाचण्यासाठी येथे क्लिक करा : Canada-China Relations : कॅनडाचा चीनवर मोठा घाव! ‘या’ कंपनीला देशातून हाकलले, राष्ट्रीय सुरक्षेचा मुद्दा ऐरणीवर
इराणसोबत युद्ध थांबले असले, तरी इस्रायलच्या सुरक्षेसमोर नवीन आव्हाने कायम आहेत. येमेनमधून झालेला हल्ला केवळ भौगोलिक दृष्टिकोनातूनच नव्हे, तर राजकीय आणि लष्करी दृष्टीनेही गंभीर आहे. इस्रायलसाठी आता मोठी जबाबदारी आहे – देशांतर्गत शांतता राखण्याची आणि बाह्य शत्रूंना आक्रमणाच्या आधी रोखण्याची!
.png "Videos"){kind=small}
