.png "Videos"){kind=small}
Israel military evacuation Arak : इराण आणि इस्रायलमधील संघर्ष आता अत्यंत धोकादायक वळणावर पोहोचला आहे. गुरुवारी इस्रायली सैन्याने इराणच्या अरक हेवी वॉटर रिऍक्टर परिसरात राहणाऱ्यांना तात्काळ तेथेून बाहेर जाण्याचा इशारा दिला आहे. उपग्रह छायाचित्रासह जारी केलेल्या या इशाऱ्यानंतर, इस्रायलकडून अरक अणुभट्टीवर थेट हल्ला होण्याची शक्यता व्यक्त केली जात आहे.
हे छायाचित्र इस्रायली सैन्याने त्यांच्या अधिकृत सोशल मीडिया ‘X’ हँडलवर शेअर केले आहे. त्यात अरक अणुभट्टीला लाल वर्तुळात दाखवण्यात आले असून, ही पद्धत इस्रायलने यापूर्वीही मोठ्या हल्ल्यांपूर्वी वापरली आहे. त्यामुळे तणावाची पातळी आणखी वाढली असून, यामुळे इराणविरोधातील संभाव्य मोठ्या हल्ल्याची शक्यता बळावली आहे.
अरक रिऍक्टर म्हणजे अणुबॉम्बचा दुसरा मार्ग?
इराणच्या तेहरानपासून सुमारे २५० किमी अंतरावर असलेल्या अरक येथील हेवी वॉटर रिऍक्टरमुळे, इराण प्लुटोनियमच्या माध्यमातून अणुबॉम्ब विकसित करू शकतो, असा इस्रायलचा दावा आहे. यामुळे युरेनियम व्यतिरिक्त इराणला आण्विक शस्त्रसज्जतेचा दुसरा मार्ग खुला होतो, हे इस्रायलसाठी अत्यंत चिंताजनक मानले जात आहे. याआधीही इस्रायली हल्ल्यांमध्ये नतान्झ येथील युरेनियम समृद्धीकरण केंद्र, तेहरानजवळील सेंट्रीफ्यूज वर्कशॉप आणि इस्फहान अणुशक्ती केंद्राला लक्ष्य करण्यात आले आहे. या कारवायांमध्ये इराणचे अनेक वरिष्ठ अणुशास्त्रज्ञ आणि जनरल ठार झाले आहेत, अशी माहिती समोर आली आहे.
जागतिक घडामोडी संबंधित बातम्या वाचण्यासाठी येथे क्लिक करा : अमेरिकेचे ‘हे’ शस्त्र इराणच्या घरात घुसून घालू शकते धुमाकूळ; 300 फूट खाली लपलेला ‘Fordow Plant’ धोक्यात
सातव्या दिवशीही हल्ले सुरू, दोन्ही देशांमध्ये जीवघेणा संघर्ष
१३ जूनपासून सुरू झालेल्या संघर्षाच्या सातव्या दिवशीही इस्रायल आणि इराण यांच्यातील लढा अधिक तीव्र झाला आहे. गुरुवारी इस्रायलने तेहरान आणि आजूबाजूच्या भागांवर हवाई हल्ले केले. यास उत्तरादाखल, इराणने इस्रायलवर क्षेपणास्त्रे डागली आणि नागरिकांना बंकरमध्ये लपण्याचा सल्ला दिला आहे. हल्ल्यांमध्ये इस्रायलमध्ये ६३९ लोकांचा मृत्यू झाला असून त्यात २६३ नागरिकांचा समावेश आहे, तर १,३०० हून अधिक लोक जखमी झाले आहेत. इराणच्या हल्ल्यांमध्येही इस्रायलमधील किमान २४ जण ठार आणि शेकडो जखमी झाल्याचे वृत्त आहे.
खामेनींच्या वक्तव्यानंतर इस्रायलचा तडाखा
गुरुवारीचा इस्रायली हल्ला, इराणचे सर्वोच्च नेते अयातुल्ला खामेनी यांच्या तीव्र वक्तव्यानंतर करण्यात आला. खामेनींनी अमेरिकेच्या आत्मसमर्पणाच्या आवाहनाला नकार दिला आणि जर अमेरिका हल्ला करेल, तर त्याला मोठी किंमत मोजावी लागेल, असा इशारा दिला होता. त्यानंतर लगेच इस्रायलकडून पुन्हा एकदा हवाई हल्ला केला गेला.
जगाच्या चिंता वाढल्या, आण्विक युद्धाचा धोका?
इराण आणि इस्रायल यांच्यातील संघर्षामुळे पश्चिम आशियात तणावाची पातळी शिगेला पोहोचली आहे. अरकसारख्या अणुभट्ट्यांवर संभाव्य हल्ल्यांमुळे, हा संघर्ष आण्विक टप्प्यावर जाण्याची शक्यता निर्माण झाली आहे. विशेषतः इस्रायलकडून सार्वजनिकरित्या अणुभट्टी दर्शवून इशारा दिला जाणे, ही नाट्यमय घडामोड असून पुढील काही तास अत्यंत निर्णायक ठरू शकतात, असे जागतिक तज्ज्ञांचे मत आहे.
जागतिक घडामोडी संबंधित बातम्या वाचण्यासाठी येथे क्लिक करा : ‘मी आता काळ आहे, जगाचा संहार करणारा…’ वाचा नक्की कोण आहे जगाला युद्धाच्या उंबरठ्यावर आणणारा ‘हा’ माणूस?
अरक अणुभट्टी रिकामी करण्याचा इशारा
अरक अणुभट्टी रिकामी करण्याचा इशारा, सात दिवस चाललेला संघर्ष आणि उघडपणे दाखवण्यात आलेली युद्ध तयारी — हे सर्व घटक इराण-इस्रायल युद्ध अधिक गहिरं होण्याचे संकेत देत आहेत. दोन्ही देशांच्या आक्रमक कारवाया पाहता, हा संघर्ष केवळ प्रादेशिक मर्यादेत न राहता आंतरराष्ट्रीय स्थैर्यावरही परिणाम करू शकतो, अशी भीती निर्माण झाली आहे.
