Mojtaba Khamenei : मोजतबा खामेनी यांच्या मृत्यूची बातमी कधीही येऊ शकते समोर; मोसादचा धक्कादायक दावा; नेमकं काय घडलं?

Mojtaba Khamenei Critical: इस्रायली माध्यमांनी दावा केला आहे की इराणचे सर्वोच्च नेते मोजतबा खामेनी यांची प्रकृती गंभीर असून त्यांना रुग्णालयात दाखल करण्यात आले आहे, ज्यामुळे तेथे खळबळ उडाली आहे.

• गंभीर प्रकृतीचा दावा
• सार्वजनिक अनुपस्थिती कायम
• इराणकडून दावे फेटाळले

पश्चिम आशियातील भू-राजकारणात पुन्हा एकदा मोठी हलकल्लोळ उडाली आहे. इराणचे सर्वोच्च नेते मोजतबा खामेनी (Mojtaba Khamenei) यांच्या प्रकृतीबाबत इस्रायली आणि आंतरराष्ट्रीय माध्यमांमध्ये खळबळजनक दावे केले जात आहेत. इस्रायलच्या एका प्रमुख दूरचित्रवाणी वाहिनीने आणि वृत्तपत्रांनी दिलेल्या वृत्तानुसार, मोजतबा खामेनी यांची प्रकृती अत्यंत गंभीर असून त्यांना तातडीने उपचारासाठी रुग्णालयात दाखल करण्यात आले आहे. या वृत्तामुळे इराणच्या सर्वोच्च राजकीय आणि सुरक्षा वर्तुळात खळबळ उडाली असून, देशांतर्गत तसेच आंतरराष्ट्रीय स्तरावर त्यांच्या प्रकृतीविषयी विविध तर्कवितर्क लढवले जात आहेत.

गेल्या काही महिन्यांपासून इराण आणि इस्रायलमधील संघर्ष टोकाला गेला आहे. २८ फेब्रुवारी रोजी झालेल्या अमेरिका-इस्रायलच्या संयुक्त लष्करी हल्ल्यामध्ये मोजतबा खामेनी यांचे वडील आणि तत्कालीन सर्वोच्च नेते मारले गेले होते. त्यानंतर, देशात निर्माण झालेल्या पोकळी भरून काढण्यासाठी मोजतबा खामेनी यांनी सर्वोच्च नेतेपदाची धुरा सांभाळली होती. परंतु, पदभार स्वीकारल्यापासून आजतागायत ते एकदाही कोणत्याही सार्वजनिक कार्यक्रमात प्रत्यक्ष दिसलेले नाहीत. त्यांनी प्रशासकीय कामकाज केवळ लेखी निवेदनांद्वारे आणि अत्यंत मर्यादित मध्यस्थांच्या माध्यमातून चालवले आहे.

जागतिक घडामोडी संबंधित बातम्या वाचण्यासाठी येथे क्लिक करा : US News: ‘तुम्ही मालक नाही, केवळ भाडेकरू आहात!’ ट्रम्प यांच्या 3,500 कोटींच्या व्हाईट हाऊस बॉलरूम प्रकल्पाला न्यायालयाकडून स्थगिती

सुरुवातीच्या लष्करी हल्ल्यांमध्ये त्यांच्या चेहऱ्यावर आणि शरीरावर गंभीर जखमा झाल्याची माहिती गुप्तचर अहवालांमधून समोर आली होती. या तीव्र जखमांमुळेच त्यांना सार्वजनिक वावरापासून दूर राहावे लागले आहे, असे मानले जात आहे. इराणचे राष्ट्राध्यक्ष मसूद पेझेश्कियन यांनी अलीकडेच एका मुलाखतीत उघडपणे कबूल केले होते की, सध्या सर्वोच्च नेत्यांशी थेट आणि सुलभ संवाद साधणे अत्यंत कठीण झाले आहे. राष्ट्राप्रमुखांच्या या विधानामुळे खामेनी यांच्या प्रकृती आणि कार्यक्षमतेबद्दलच्या शंकांना अधिक बळ मिळाले आहे.

इस्रायली दूरचित्रवाणी वाहिनी ‘चॅनल १४’ आणि जेरुसलेम पोस्टच्या सूत्रांनुसार, मोजतबा खामेनी यांची प्रकृती अत्यंत नाजूक आहे. एका सूत्राने तर असेही म्हटले आहे की, आगामी काळात त्यांच्या प्रकृतीबाबत किंवा हौतात्म्याबाबत कोणतीही मोठी बातमी समोर आल्यास त्यात आश्चर्य वाटायला नको. या दाव्यांमुळे इराणची अंतर्गत सुरक्षा यंत्रणा आणि गुप्तचर विभाग पूर्णपणे सतर्क झाले आहेत. दरम्यान, अमेरिकेचे माजी राष्ट्राध्यक्ष डोनाल्ड ट्रम्प यांनीही अलीकडेच टिप्पणी केली होती की, सुरुवातीच्या लष्करी हल्ल्यांनंतर खामेनी शारीरिकदृष्ट्या जवळपास ९० टक्के थकले असून त्यांची स्थिती बिकट आहे.

जागतिक घडामोडी संबंधित बातम्या वाचण्यासाठी येथे क्लिक करा : FSSAIच्या कारवाईमुळे चर्चेत आली ‘Old Monk’ रम; जाणून घ्या जालियनवाला बाग हत्याकांडाशी कसा आहे ‘या’ ब्रँडचा ऐतिहासिक संबंध?

दुसऱ्या बाजूला, सौदी अरेबियातील वृत्तसंस्था ‘अल-हदथ’ने इस्रायली सुरक्षा सूत्रांचा हवाला देत असाही दावा केला आहे की, मोजतबा खामेनी सद्यस्थितीत इराणमध्ये अस्तित्वात किंवा सुरक्षित ठिकाणी नाहीत. या सर्व आंतरराष्ट्रीय दाव्यांवर तीव्र प्रतिक्रिया देताना इराणच्या आरोग्य मंत्रालयाने सर्व अफवा फेटाळून लावले आहेत. मंत्रालयाच्या अधिकाऱ्यांचे म्हणणे आहे की, सर्वोच्च नेत्यांना झालेल्या जखमा पूर्णपणे किरकोळ असून ते अजिबात धोक्यात नाहीत. ते पूर्णपणे सुरक्षित असून देशातील सर्व धोरणात्मक निर्णय आणि लष्करी हालचालींचे नियंत्रण त्यांच्याच मार्गदर्शनाखाली सुरू आहे.

जरी इराण सरकारकडून त्यांच्या सुरक्षेची आणि प्रकृतीची हमी दिली जात असली, तरी प्रत्यक्ष सार्वजनिक वावर शून्य असल्यामुळे या दाव्यांवर शंका घेतली जात आहे. मध्य पूर्व भागातील सध्याचे अत्यंत तणावपूर्ण वातावरण पाहता, मोजतबा खामेनी यांच्या प्रकृतीविषयीची ही अनिश्चितता इराणच्या राजकारणात मोठा भूकंप घडवून आणू शकते. जर या दाव्यांमध्ये तथ्य निघाले, तर इराणच्या इस्लामिक रिपब्लिकच्या पुढील राजकीय प्रवासाला कलाटणी मिळू शकते, ज्यावर संपूर्ण जगाचे लक्ष लागून आहे.