भारतीय टू व्हीलर मार्केटमध्ये जुलै २०२६ मध्ये एक ऐतिहासिक बदल पाहायला मिळाला आहे. बऱ्याच टाईम पासून देशातील अव्वल स्थानावर असलेल्या होंडा मोटरसायकल अँड स्कूटर इंडियाला मागे टाकून टीव्हीएस मोटर कंपनीने पहिल्यांदाच मंथली स्कूटर विक्रीत प्रथम क्रमांक पटकावला आहे. टीव्हीएसच्या या घवघवीत यशामागे त्यांच्या ‘iQube’ या इलेक्ट्रिक स्कूटर मालिकेचा मोठा वाटा मानला जात आहे, जी सध्या देशात सर्वाधिक विकली जाणारी ई-स्कूटर ठरली आहे.
टीव्हीएस आणि होंडाच्या बाजारातील स्थितीत मोठा बदल
जुलै २०२५ च्या १,८३,६०७ युनिट्सच्या तुलनेत टीव्हीएसने जुलै २०२६ मध्ये तब्बल २,५६,६७५ स्कूटर्सची विक्री करत ४० टक्क्यांची मजबूत वाढ नोंदवली आहे. यामुळे टीव्हीएसचा बाजारातील वाटा २८.४६% वरून वाढून ३२.१५% वर पोहोचला आहे. दुसरीकडे, प्रसिद्ध ‘ॲक्टिव्हा’ मॉडेल असूनही होंडाची विक्री २,६५,५८७ युनिट्सवरून १२ टक्क्यांनी घसरून २,३३,३३७ युनिट्सवर आली. परिणामी होंडाचा मार्केट शेअर ४१.१७% वरून थेट २९.२३% वर खाली आला आहे.
इलेक्ट्रिक स्कूटर्स आणि इतर प्रमुख कंपन्यांची कामगिरी
इलेक्ट्रिक वाहनांच्या वाढत्या मागणीमुळे बजाजने आपल्या ‘चेतक’ श्रेणीच्या जोरावर सर्वाधिक ३०१% ची विक्रमी वाढ नोंदवत ४८,६८४ युनिट्सची विक्री केली आहे. याशिवाय सुझुकी १,२०,९९८ युनिट्ससह तिसऱ्या स्थानावर कायम असून (२८% वाढ), हिरो मोटोकॉर्पने आपल्या ‘विदा’ श्रेणीच्या जोरावर ६१,३४७ युनिट्सची विक्री केली आहे. ई-स्कूटर उत्पादक अथर एनर्जीने १०६% वाढीसह ३१,०४४ युनिट्स तर रिव्हर मोबिलिटीने २२६% ची वाढ नोंदवली आहे.
TVS Apache RTR 160 2V मध्ये मिळतायत हे भन्नाट फीचर्स! शोरूमला जाण्यापूर्वी नक्की जाणून घ्या!
संपूर्ण बाजारपेठेतील विक्री आणि सध्याचा ट्रेंड
संपूर्ण देशात जुलै २०२६ मध्ये एकूण ७,९८,१९० स्कूटर्सची विक्री झाली, जी गेल्या वर्षीच्या याच महिन्यातील ६,४५,०२२ युनिट्सच्या तुलनेत २४% जास्त आहे. भारतात पारंपरिक पेट्रोल स्कूटर्सच्या तुलनेत इलेक्ट्रिक स्कूटर्सची मागणी वेगाने वाढत आहे. टीव्हीएस आणि बजाज यांसारख्या भारतीय कंपन्यांनी ई-स्कूटर विभागात वेळेत आक्रमक पावले उचलल्याने त्यांना बाजारात मोठा फायदा होत आहे, तर होंडाची इलेक्ट्रिक सेगमेंट अद्याप मजबूत पकड घेऊ न शकल्याने त्यांच्या विक्रीवर परिणाम झाला आहे.
.png "Videos"){kind=small}
